Baghlayani Bible
निर्गमन 7
तेबे यहोवे मूसे खे बोलेया, “देख, आऊँ ताखे फिरौनो रिया तँईं परमेशरो जेड़ा ठराऊँआ ओर तेरा पाई हारूण तेरिया तँईं बोलणे वाल़ा ठईरना। जो-जो आज्ञा आऊँ ताखे देऊँ, सेई तैं बोलणा ओर हारूणो सेयो फिरौनो गे बोलणिया, ताकि से इस्राएलिया खे मिस्र देशो ते निकल़ने देओ। पर मां आपणे चिह्न ओर अचम्बे रे काम मिस्र देशो रे बऊत दखाणे फेर बी मां फिरौनो रा मन काठा करी देणा।1 तेबे बी फिरौनो तुसा री नि सुणनी ओर मां मिस्र देशो रे आपणा आथ बढ़ाई की मिस्रिया खे पारी सजा देई की आपणी सेना, मतलब आपणे इस्राएली लोक मिस्र देशो ते निकयाल़ी लणे। जेबे मां मिस्रो पाँदे आथ बढ़ाई की इस्राएली तिना बीचा ते निकयाल़ने, तेबे मिस्रिया जाणी लणा कि आऊँ यहोवा ए।”
तेबे मूसे ओर हारूणे यहोवे रिया आज्ञा रे मुताबिक ई कित्तेया। मूसा ओर हारूण जेबे फिरौनो साथे गल्ला करने लगे, तेबे मूसा तो 80 साला रा था ओर हारूण 83 साला रा था।
हारूणो री चमत्कारी सोठी
तेबे यहोवे मूसा ओर हारूणो खे ईंयाँ बोलेया, “जेबे फिरौन तुसा खे बोलो कि आपणा अचम्बे रा कोई एड़ा काम दखाओ जेते कि पता चली सको कि तुसे यहोवे मांगे पेजी राखे, तेबे तैं हारूणो खे बोलणा, ‘आपणी सोठी लई की फिरौनो सामणे सेटी दे, ताकि से साप बणी जाओ।’ ”
तेबे मूसे ओर हारूणे फिरौनो गे जाई की यहोवे री आज्ञा रे मुताबिक कित्तेया ओर जेबे हारूणे आपणी सोठी फिरौन ओर तेसरे काम करने वाले़या सामणे राखी ती, तेबे से साप बणीगी। तेबे फिरौने पण्डत ओर जादू-टोणा करने वाल़े बुलाए ओर मिस्रो रे जादूगरे आई की आपणे-आपणे तंत्र-मंत्रो साथे तेड़ा ई कित्तेया। तिने बी आपणी-आपणी सोठी राखी ती ओर सेयो बी साप बणीगिया। पर हारूणो री सोठी तिना सबी री जादूए रिया सोठिया खे खाईगी। फेर बी फिरौनो रा मन ओर बी टीठ ऊईगा ओर यहोवे रे वचनो रे मुताबिक तिने मूसा ओर हारूणो रिया गल्ला नि मानिया।
मिस्रिया पाँदे दस पारी मुसीबता पड़ने रा बखाण
तेबे यहोवे मूसे खे बोलेया, “फिरौनो रा मन काठा ऊईगा रा ओर तेस ये लोक जाणे नि देणे। इजी री खातर प्यागा रे बखते फिरौनो गे जा, से नदिया री तरफा खे बारे आऊणा ओर जो सोठी साप बणीगी थी, तिजी खे तैं आथो रे लई की नील नदिया रे कनारे तेस साथे मिलणे खे खड़े रणा ओर तैं फिरौनो खे ईंयाँ बोलणा, ‘इब्रिया रे परमेशर यहोवा आऊँ ये बोलणे खे तांगे पेजी राखेया कि तूँ मेरी प्रजा रे लोका खे जाणे दे, ताकि सेयो सुनसाण जगा रे मेरी आराधना करो, पर एबुए तक तैं मेरा कईणा नि मानेया।’ ”
यहोवा ईंयाँ बोलोआ कि इजी ते तां जाणी लणा कि आऊँ यहोवा ई परमेशर ए; देख, मां आपणी सोठी नील नदिया रे पाणिए पाँदे बाणी ओर पाणी खून बणी जाणा ओर जो मछलिया नील नदिया रे ए, सेयो मरी जाणिया ओर नील नदिया रे सड़यान आऊणे लगी जाणी ओर नील नदिया रा पाणी पीणे खे मिस्रिया रा जिऊ नि बोलणा। फेर यहोवे मूसे खे बोलेया, “हारूणो खे बोल कि आपणी सोठी लई की मिस्र देशो रे जितणी पाणिए री नदिया, नईरा, झीला ओर बांयी ए, तिना सबी पाँदे आपणा आथ बढ़ा, ताकि तिना रा पाणी खून बणी जाओ ओर सारे मिस्र देशो रे काठ ओर पात्थर दुँईं प्रकारा रे पाणिए रे पांडेया रे खून ई खून ऊई जाओ।”2
पईली मुसीबत-नील नदिया रे पाणिए रा खून बणना
तेबे मूसे ओर हारूणे यहोवे रिया आज्ञा रेई मुताबिक कित्तेया, मतलब तिने सोठी चकी की फिरौन ओर तेसरे काम करने वाले़या सामणे नील नदिया पाँदे बायी ओर नदिया रा सारा पाणी खून बणीगा ओर नील नदिया रे जो मछलिया थिया सेयो मरी गिया ओर नदिया ते सड़यान आऊणे लगी ओर मिस्री लोक नदिया रा पाणी नि पी सके ओर सारे मिस्र देशो रे सबी जगा खून ई खून दिखणे लगेया।3 तेबे मिस्रो रे जादूगरे आपणे तंत्र-मंत्रो साथे तेड़ा ई कित्तेया, तेबे बी फिरौनो रा मन टीठ ऊईगा ओर पईले जेड़ी यहोवे रे कईणे रे मुताबिक तिने मूसे ओर हारूणो री नि मानी। फिरौने इजी पाँदे बी त्यान नि दित्तेया ओर मूँ फेरी की आपणे मईलो खे चलीगा। ओर बऊत सारे मिस्री लोक पीणे रे पाणिए खे नील नदिया रे नेड़े-तेड़े खणने लगे, कऊँकि सेयो नदिया रा पाणी नि पी सको थे। जदुओ ते यहोवे नील नदिया रे पाणिए खे खून बणाया, तदुओ ते सात दिन ऊई चुके थे।
Source notes (3)
- Footnote प्रेरित 7:36
- Footnote प्रकाशित 8:8, प्रकाशित 11:6
- Footnote प्रकाशित 16:3
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.