Baghlayani Bible
निर्गमन 24
यहोवा ओर इस्राएलिया बीचे वाचा बानणे रा बखाण
फेर यहोवे मूसे खे इस्राएली लोका रिया तँईं बिधि-बिधान देणे ते बाद बोलेया, “तैं हारूण, नादाब, अबीहू ओर इस्राएलिया रे 70 स्याणेया समेत मांगे पाह्ड़ो पाँदे ऊबे आई की दूरो ते माथा टेकणा। जेबे सेयो दूरो ते माथा टेकणे लगी रे ओ तेबे बस मूसा यहोवे रे नेड़े आओ; पर सेयो लोक तेस साथे ऊबे नि आओ।”
तेबे मूसे लोका गे जाई की यहोवे रे जरीये सखाई रिया सारिया गल्ला ओर नियम सुणाई ते; तेबे सबी लोके मिली की बोलेया, “जितणिया गल्ला यहोवे बोली राखिया, सेयो सब गल्ला आसा मानणियां।” तेबे मूसे यहोवे रे जरीये बोले रे सारे वचन लिखी की राखी ते ओर तिने दूजे दिने प्यागा उठी की पाह्ड़ो निठे इस्राएलो रे बारा गोत्रा रे मुताबिक बारा खम्बे खड़े करी की एक बेदी बणाई। तेबे मूसे कई इस्राएली जवान पेजे, जिने यहोवे खे होमबलि ओर बाच्छूआ री मेलबलि चढ़ाई।
ओर मूसे आदा खून तो लई की कटोरे रे राखेया ओर आदा बेदिया पाँदे छिड़की ता। तेबे तिने वाचा री कताब लई की इस्राएली लोका गे पढ़ी की सुणाई; तिजी खे सुणी की लोके बोलेया, “जो कुछ यहोवे बोली राखेया से सब आसा करना ओर तेसरी आज्ञा मानणी।” तेबे मूसे कटोरे बीचा ते खून लई की लोका पाँदे छिड़की ता ओर तिना खे बोलेया, “देखो, ये तेसा वाचा रा खून ए, जो यहोवे इना सबी वचना रे आधारो पाँदे तुसा साथे बानी राखी।” तेबे मूसा ओर तेसरा पाई हारूण ओर हारूणो रे दोनो पाऊ नादाब ओर अबीहू ओर इस्राएलिया रे 70 स्याणे पाह्ड़ो पाँदे गये। ओर तिने तेती इस्राएलो रा परमेशर देखेया; ओर तेसरे पैरा निठे नीलमणिया रा चबूतरा जा था, जो नीले सर्गो जेड़ा साफ-सुथरा था। पर सेयो इस्राएलिया रे परमेशरो खे देखी की बी नाश नि ऊए ओर तिने परमेशरो री मौजुदगिया रे रोटी खाई।
मूसे रा सीनै पाह्ड़ो पाँदे चढ़ना
तेबे यहोवे मूसे खे बोलेया, “पाह्ड़ो पाँदे चढ़ी की मांगे आओ ओर तेती रओ ओर मां ताखे पात्थरो री तख़्तिया ओर आपणा लिखेया रा बिधि-बिधान ओर आज्ञा देणियां, ताकि तूँ तिना खे सिखाओ।”
तेबे मूसा यहोशू नाओं रे आपू साथे मताद करने वाल़े खे लई की परमेशरो रे पाह्ड़ो पाँदे चढ़ीगा। ओर मूसा पाह्ड़ो पाँदे चढ़ने ते पईले इस्राएलो रे स्याणेया खे ये बोली गा कि जदुओ तक आसे तुसा गे फेर नि आऊँगे, तदुओ तक तुसे एथी आसा खे न्याल़दे रओ ओर सुणो, हारूण ओर हूर तुसा साथे ए; इजी खे जे केसी रा कोई मकद्दमा ऊल़जी रा ओ तो तिना दुँईं गेई जाणा। तेबे मूसा पाह्ड़ो पाँदे चढ़ीगा ओर बादल़ पाह्ड़ो पाँदे छाई गे।
ओर यहोवे रा तेज सीनै पाह्ड़ो पाँदे आया ओर से बादल़ पाह्ड़ो पाँदे छे दिना तक छाया रा रया ओर सातुए दिने यहोवे मूसे खे बादल़ो बीचा ते आका पाईया। ओर इस्राएली लोका खे यहोवे रा तेज पाह्ड़ो री चूँडिया पाँदे प्रचण्ड आगी जेड़ा दिशो था। तेबे मूसा बादल़ो बीचे जाई की पाह्ड़ो पाँदे चढ़ीगा ओर मूसा पाह्ड़ो पाँदे चाल़ी दिन ओर चाल़ी रात रया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.