Baghlayani Bible
बिधान 27
बिधानो खे पात्थरो पाँदे लिखणे री आज्ञा
तेबे इस्राएलो रे स्याणेया लोका समेत मूसे प्रजा रे लोका खे आज्ञा दित्ती, “जितणी आज्ञा आऊँ आज तुसा खे देऊँआ, सेयो सब मानणियां। जेबे तुसे यरदन नदिया ते पार ऊई की तेते प्रदेशो रे पऊँचो, जो तुसा रा परमेशर यहोवा तुसा खे देओआ, तेबे बड़े-बड़े पात्थर खड़े करी देणे ओर तिना पाँदे चूना लगाणा। तेबे नदिया खे टपणे ते बाद तिना पात्थरा पाँदे बिधानो रिया सारिया गल्ला लिखणिया, ताकि जो प्रदेश तुसा रे बुजुर्गा रा परमेशर यहोवा आपणे वादे रे मुताबिक तुसा खे देओआ ओर जो सच्चो खेई बऊत ई पजणे वाल़ा ए, तेते प्रदेशो रे तूँ जाई सके। फेर जिना पात्थरा रे बारे दे मैं आज आज्ञा देई राखी, सेयो तुसे यरदन नदिया ते पार ऊई की एबाल पाह्ड़ो पाँदे खड़े करने ओर तिना रे चूना लगाणा।”
ओर तेथी आपणे परमेशर यहोवे खे पात्थरा री एक बेदी बनाणी, तिना पात्थरा पाँदे कोई लोए रा औजार नि चलाणे। आपणे परमेशर यहोवे री बेदी अनकढ़े पात्थरा री बणाई की तिजी पाँदे तेसखे होमबलि चढ़ाणी। ओर तेथी मेलबलि चढ़ाई की रोटी खाणी ओर आपणे परमेशर यहोवे सामणे खुशी मनाणी। तिना पात्थरा पाँदे एते बिधानो रिया सारिया गल्ला साफ-साफ लिखी देणियां।
एबाल पाह्ड़ो ते स्रापित वचन
फेर मूसे ओर लेवी पुरोईते सब इस्राएलिया खे ये बी बोलेया, “ओ इस्राएलियो, शान्त रओ ओर ये गल्ल सुणो; आजके दिने तुसे आपणे परमेशर यहोवे रे निज लोक बणी गे रे। इजी री खातर आपणे परमेशर यहोवे री गल्ल मानणी ओर तेसरी जो-जो आज्ञा ओर बिदिया आज आऊँ ताखे देऊँआ तिना रे मुताबिक काम करना।”
स्रापित वचन
तेबे तेस ई दिने मूसे प्रजा रे लोका खे ये आज्ञा दित्ती, “जेबे तुसे यरदन नदिया ते पार चली जाओ तेबे शिमोन, लेवी, यहूदा, इस्साकार, यूसुफ ओर बिन्यामीन, इना सबी कुला रे माणूं इस्राएली समाजो रे लोका खे गिरिज्जीम पाह्ड़ो पाँदे खड़े ऊई की आशीर्वाद सुणाओ। पर रूबेन, गाद, आशेर, जबूलून, दान ओर नप्ताली, इना सबी कुला रे माणूं इस्राएली समाजो रे लोका खे एबाल पाह्ड़ो पाँदे खड़े ऊई की स्राप सुणाओ।”
तेबे लेवी वंशो रे लोक सबी इस्राएली समाजो रे लोका खे जोरे की आका पाई की बोलो, स्रापित ओ से माणूं जो कोई मूर्ति कारीगरो ते बणवाई की या खुदवाई की गुप्त जगा रे तेतेरी प्रतिष्ठा करो, कऊँकि इजी ते यहोवा नफरत करोआ। तेबे सब लोक बोलो, आमीन्।
आपणे माया-बाओ रा बेज्जती करने वाल़ा माणूं स्रापित ए। तेबे सब लोक बोलो, आमीन्।
स्रापित ओ से माणूं जो केसी दूजे रे बन्ने खे टाओ। तेबे सब लोक बोलो, आमीन्।
स्रापित ओ से जो अन्दे खे बाटा ते पटकाई देओ। तेबे सब लोक बोलो, आमीन्।
स्रापित ओ से जो परदेशी, अनाथ या बिदुआ रा न्याय बिगाड़ो। तेबे सब लोक बोलो, आमीन्।
स्रापित ओ से जो आपणी सौतेली माया साथे कुकर्म करो, कऊँकि से आपणे बाओ रा टखण क्वाड़ोआ। तेबे सब लोक बोलो, आमीन्।
स्रापित ओ से जो केसी डांगरो साथे कुकर्म करो। तेबे सब लोक बोलो, आमीन्।
स्रापित ओ से जो आपणी बईणी साथे चाए से सक्की ओ, चाए सौतेली, कुकर्म करो। तेबे सब लोक बोलो, आमीन्।
स्रापित ओ से जो आपणी सासुआ साथे कुकर्म करो। तेबे सब लोक बोलो, आमीन्।
स्रापित ओ से जो केसी खे बी लूकी की काओ। तेबे सब लोक बोलो, आमीन्।
स्रापित ओ से जो निर्दोष माणूंए खे काणे खे रिश्वत लओ। तेबे सब लोक बोलो, आमीन्।
जो कोई माणूं बिधानो रे नियमा खे नि मानो, से स्रापित ए। तेबे सब लोक बोलो, आमीन्।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.