Baghlayani Bible
2 राजा 4
एलीशा रे चार नऊखे काम
एक दिन यहोवे रे नबीया रे चेलेया री लाड़िया बीचा ते एक जवाणस एलीशा नबीए गे आई की रोणे लगी ओर बोलणे लगी, “तेरा दास मेरा लाड़ा जो तां साथे काम करो था मरी गा ओर तूँ जाणेया कि से यहोवे रा डर मानणे वाल़ा था ओर जेसरा से कर्जदार था से आई रा, ताकि मेरे दुँईं माठेया खे आपणे दास बनाणे खे लई जाओ।” एलीशा नबीए तेसा ते पूछेया, “आऊँ तेरिया तँईं क्या करुँ? मांगे बता कि तेरे कअरे क्या ए?” तेसे बोलेया, “तेरी दासिया रे कअरे एक आँडी तेलो खे छाडी की ओर कुछ नि ए।” तिने बोलेया, “तूँ बारे जाई की आपणिया सबी पड़ोसणिया ते खाली पांडे मांगी की ली आओ ओर थोड़े पांडे नि ल्याऊणे। तेबे तूँ आपणे माठेया समेत आपणे कअरे जा ओर दरवाजा बन्द करी की तिना सबी पांडेया दे तेल लटणा ओर जो परी जाओ सेयो लग राखणे।” तेबे से तेथा ते चली गी ओर आपणे माठेया समेत आपणे कअरो रा दरवाजा बन्द कित्तेया, तेबे सेयो तो तेसा गे पांडे ल्याऊँदे गये ओर से पाँदी रई। जेबे पांडे तेले की परी गे, तेबे तेसे आपणे माठेया खे बोलेया, “मांगे एक ओर पांडा ली आओ;” तिने तेसा खे बोलेया, “ओर पांडे नि ए।” तेबे तेल रूकी गा। तेबे तेसे जाई की परमेशरो रे पग्त एलीशा खे ये बताईता ओर तिने बोलेया, “जा तेल बेची की कर्ज परी दे ओर जो रई जाओ, तिजी साथे तूँ आपणे पाऊआ समेत आपणा गुजारा कर।”
तेबे एकी दिनो री गल्ल ए कि एलीशा नबी शूनेम शईरो दे गया, जेती एक अमीर जवाणस थी ओर तेसे से रोटी खाणे खे आपणे कअरे बुलाया। जेबे-जेबे से तिसिये जाओ था, तेबे-तेबे से तेसारे ओर तेसारे लाड़े साथे तेती रोटी खाणे खे रूको था। एक दिन तेसे जवाणसे आपणे लाड़े खे बोलेया, “सुण ये जो बार-बार आसा गे ते ऊई की जाओआ से माखे परमेशरो रा कोई पवित्र पग्त लगोआ। आसे आपणे कअरो रिया पाँदलिया मञ्जला दे एक छोटा जा कमरा बणाऊँए ओर तिदे तेसखे एक माँजा, एक मेज, एक कुर्सी ओर एक दिऊआ राखूँए, ताकि जेबे-जेबे से आसा रे कअरे आओ, तेबे-तेबे तेथी रूकेया करो।”
एक दिन से शूनेम शईरो खे आया, ओर तेती जाई की तेस कअरो री उबली मञ्जला रे कमरे दे रूकेया जो तेसखे बणाई राखेया था, ओर तेथी सईगा। ओर तिने आपणे सेवक गेहजिये खे बोलेया, “तेसा शूनेमिन जवाणसा खे बुला आऊँ तेसा ते कुछ गल्ल करना चाऊँआ।” तेसरे बुलाणे ते से तेस सामणे खड़ी ऊई। तेबे तिने गेहजिये खे बोलेया, “एसा खे बोल कि तैं आसा रिया तँईं एड़ी बड़ी फिकर करी राखी, तो आसे तेरिया तँईं क्या करिए? तूँ क्या चाए ई कि आसे तेरी चर्चा राजा या परदान सेनापतिये गे करुँ?” तेसे ज्वाब दित्तेया, “आऊँ तो आपणे ई लोका बीचे रऊँई ओर मेरिया जरूरता रा सारा समान बी मांगे अया।” बादो ते तिने बोलेया, “तो एसा रिया तँईं क्या करना चाईयो?” गेहजिये ज्वाब दित्तेया, “आसे जाणूंए कि एसा रे कोई पाऊ नि ए ओर एसा रा लाड़ा स्याणा ए।” एलीशे आपणे सेवको खे बोलेया, “तेसा खे दुबारा बुलाई की ल्याओ।” जेबे तिने से बुलाई, तेबे से एलीशा रे कमरे रे द्वारो पाँदे खड़ी ऊई गी। तेबे एलीशे बोलेया, “जेबे बसन्त ऋतुआ रे दिन पूरे ऊणे वाल़े ऊणे, तेबे तेरे एक पाऊ ऊणा।” जवाणसे ज्वाब दित्तेया, “ओ मेरे स्वामी! तूँ परमेशरो रा पग्त, मांते चूठ नि बोलणा।” कुछ मीन्ने बाद जवाणस गर्भवती ऊई ओर बसन्त ऋतुआ रा जो बखत एलीशे तेसा खे दसेया था, तेस बखते जेबे दिन पूरे ऊए, तेबे तेसा रे पाऊ जम्मेया। जेबे पाऊ बड़ा ऊईगा, तेबे से एक दिन आपणे बाओ गे गया जेती लोक फसल बाडणे लगी रे थे। अचाणक से जोरे की चिंगेया, “आह्! मेरे बाओ, मेरे सिरो दे बड़ी पारी पीड़ लगी री।” तेबे बाओए आपणे सेवको खे बोलेया, “एसखे फटाफट कअरे एसरी माया गे लई जा।” से तेसखे चकी की तेसरी माया गे लईगा, तेबे से त्याड़िया तक तेसा रिया गोदा दे बैठेया दा रया, तेबे मरी गा। तेबे तेसे रोंदे ऊए ऊबे चढ़ी की से पाऊ परमेशरो रे पग्त एलीशा रे माँजे पाँदे लटयाल़ी ता, ओर निकल़ी कि द्वार बन्द कित्तेया, तेबे उतरीगी। तेबे तेसे आपणे लाड़े खे आका पाई की बोलेया, “माखे परमेशरो रे नबीए ते मिलणा जरूरी ए, मांगे एक सेवक ओर एक गह्दी फटाफट पेजी दे, ताकि आऊँ फटाफट वापस बी आई जाऊँ।” तिने बोलेया, “आज तूँ तेती कऊँ चली री? आज ना तो नवां चाँद ए ओर ना ई रामो रा दिन” तेसे ज्वाब दित्तेया, “सब ठीक ऊई जाणा।” तेबे तेसे जवाणसे गह्दिया पाँदे काठी बानी की आपणे सेवको खे बोलेया, “फटाफट चल ओर जदुओ तक आऊँ नि बोलूँ रूकणा नि।”
जेबे सेयो चलदे-चलदे कर्मेल पाह्ड़ो पाँदे परमेशरो रे पग्तो रे नेड़े पऊँचे। तेसा खे दूरा ते देखी की परमेशरो रे पग्त एलीशे आपणे सेवक गेहजिये खे बोलेया, “देख, तेथी से शूनेमिन जगा री जवाणस ए। एबे एसा साथे मिलणे खे दौड़ी की जा ओर तेसा ते पूछ कि तूँ ठीक ए? तेरा लाड़ा बी ठीक ए? ओर पाऊ बी ठीक ए?” जेबे से पूछी तेबे तेसे ज्वाब दित्तेया, “आ, ठीक ए।” से पाह्ड़ो पाँदे परमेशरो रे पग्तो गे पऊँची ओर दु:खी ऊई की तेसरे पैर पकड़ने लगी, तेबे गेहजी तेसा गे गया, ताकि तेसा खे ताका देई की टाओ, पर परमेशरो रे पग्त एलीशे बोलेया, “एसा खे छाडी दे, एसा रा मन बेचैन ए; पर यहोवे मांगे एसा रे दु:खो रे बारे दे कुछ नि बताई राखेया।” तेबे से बोलणे लगी। “क्या मैं आपणे प्रभुए ते पाऊए री आशीष मांगी थी? क्या मैं बोलेया नि था कि माखे तोखा नि दे?” तेबे एलीशे गेहजिये खे बोलेया, “आपणा लक बान ओर मेरा डण्डा आथो दे लई की चट चली जा, बाटा दे अगर ताखे कोई मिलो तो तेसरा सुख-साँद नि पूछणा ओर जे कोई तेरा सुखसाँद पूछो, तो तेसखे कोई ज्वाब नि देणा ओर मेरा ये डण्डा तेस पाऊए रे मुंए पाँदे राखी देणा।” तेबे पाऊए रिये माये एलीशा नबीए खे बोलेया, “यहोवे री ओर तेरी जिन्दगिया री कसम मां तूँ नि छाडणा।” तेबे एलीशा नबी उठी की तेसा पीछे-पीछे चलेया। तिना ते पईले गेहजी पऊँचेया ओर तिने डण्डा पाऊए रे मुंए पाँदे राखी ता, पर कोई आवाज नि सुणी ओर ना तेसदे कोई अरकत ऊई, तेबे से एलीशा गे मिलणे खे वापस आया ओर तेसगे बताईता, “पाऊ नि जागेया।” जेबे एलीशा कअरे आया, तेबे क्या देखेया कि पाऊ मरेया दा तेसरे माँजे पाँदे पड़ी रा। तेबे से पीतरे कल्ला गया ओर द्वार बन्द करी ता ओर यहोवे ते प्रार्थना कित्ती। तेबे से चढ़ी की पाऊए पाँदे एड़ा लेटीगा कि आपणा मूँ तेसरे मुंए साथे ओर आपणी आखी तेसरी आखी साथे ओर आपणे आथ तेसरे आथो साथे मलाई ते ओर से पाऊए पाँदे लेटीगा, तेबे पाऊए रा शरीर गर्म ऊणे लगेया। तेबे से तेसखे छाडी की कअरे ओरे-पोरे कूमणे लगेया ओर फेर चढ़ी की पाऊए पाँदे लेटीगा; तेबे पाऊए सात बार छिकेया ओर आपणी आखी खोलिया। तेबे एलीशे गेहजिये खे बुलाई की बोलेया, “शूनेमिन जवाणसा खे बुलाई लो।” जेबे तेसरे बुलाणे ते से तेसगे आई, तेबे तेसे बोलेया, “आपणे पाऊए खे चकी लो।” से पीतरे कमरे दे गई ओर तेसरे पैरा पाँदे पड़ी की जमीना तक चूकी की माथा टेकेया; तेबे आपणे पाऊए खे चकी की बारे चली गी। बादो ते एलीशा गिलगाल शईरो खे वापस ऊईगा। तेस बखते देशो दे अकाल़ था ओर भविष्यबक्तेया रे चेले तेस सामणे बैठी रे थे ओर तिने आपणे सेवको खे बोलेया, “पतीला चढ़ाई की भविष्यबक्तेया रे चेलेया खे कुछ पक्का।” तेबे कोई भविष्यबक्ता मैदानो खे साग तोड़ने गया ओर कोई बणो ते बेल टोल़ी की जंगल़ी फल़ तोड़ी की ल्याया ओर बाडी की पतीले दे पकाणे खे पाईते पर सेयो तिजी खे नि पछयाणो थे। तेबे तिने तिना माणूंआ खे पतीले ते खाणे खे दित्तेया। खांदे बखते सेयो चींगणे लगे ओर बोलणे लगे, “ओ परमेशरो रे पग्त, पतीले दे जईर ए” ओर सेयो तेते बीचा ते नि खाई सके। तेबे एलीशे बोलेया, “मांगे कुछ आटा ली आओ।” तेबे तिने से पतीले दे पाई की बोलेया, “ये एबे ठीक ए तुसे सब खाई सकोए।” तेबे पतीले दे नुकशाण करने री कोई चीज नि रई।
एलीशा रा 100 लोका खे खाणा खुलाणा
एक दिन कोई माणूं बालशालीशा ते, पईलिया फसला रिया जौ रिया बीइ रोटिया ओर आपणी बोरिया दे अरे सिल्ले परमेशरो रे पग्तो गे ली आया; तेबे एलीशे आपणे सेवको खे बोलेया, “तिना लोका खे खाणे खे दे।” तेसरी सेवा-टईल करने वाल़े सेवके बोलेया, “क्या आऊँ 100 माणूंआ सामणे इतणा ई राखूँ।” एलीशे बोलेया, “लोका खे देई दे, ताकि सेयो खाओ, कऊँकि यहोवा ईंयाँ बोलोआ कि तिना रे खाणे ते बाद बी कुछ बची जाणा।” तेबे तिने तिना ते आगे राखी ता ओर यहोवे रे वचनो रे मुताबिक तिना रे खाणे ते बाद कुछ खाणा बची बी गया।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.