Baghlayani Bible
2 राजा 3
इस्राएलो दे यहोरामो रे राज्य री शुरूआत
इस्राएलो रे राजा यहोशापातो रे राज्य रे ठारूए सालो रे अहाबो रा पाऊ यहोराम सामरिया शईरो दे यहूदा पाँदे राज करने लगेया ओर बारा साल तक राज करदा रया। तिने से कित्तेया जो यहोवे री नजरा रे बुरा था, तेबे बी तिने आपणे माया-बाओ रे बराबर नि कित्तेया, बल्कि आपणे बाओ रे बाल देवते री बणाई री मूर्ति दूर करी ती। पर तेबे बी से नबातो रे पाऊ राजा यारोबामो रे एड़े पापो रे जेड़े तिने इस्राएलो ते बी करवाये थे करदा रया ओर तिना ते नि फिरेया। मोआबो रा राजा मेशा बऊत सारिया पेडा-बाकरिया राखो था ओर इस्राएलो रे राजे खे एक लाख पेडा रे बच्चे ओर एक लाख खाडूआ री ऊन करो री रीतिया ते देया करो था। जेबे अहाब राजा मरी गा, तेबे मोआबो रा राजा इस्राएलो रे नवें राजे रे खलाफ ऊईगा। तेस बखते राजा योरामे सामरिया शईरो ते निकल़ी की सारे इस्राएलो रे लोका री गिणती कित्ती। ओर तिने जाई की यहूदा रे राजा यहोशापातो गे सन्देसा पेजेया, “मोआबो रे राजे मां साथे बगावत करी राखी, क्या तां मां साथे मोआबो साथे लड़ने खे चलणा?” तिने बोलेया, “आ, मां जाणा, जेड़ा तूँ तेड़ा आऊँ, जेड़ी मेरी प्रजा, तेड़ी तेरी प्रजा ओर जेड़े तेरे कोड़े, तेड़े मेरे बी कोड़े ए।” फेर तिने पूछेया, “आसा कुणजी बाटा रिये जाणा?” तिने ज्वाब दित्तेया, “एदोमो रिया उजाड़ जगा रिये ऊई की।” तेबे इस्राएलो रा राजा ओर तेसरी सेना ओर यहूदा रा राजा ओर एदोमो रा राजा ओर तेसरी सेना चले ओर जेबे सात दिन तक कूमी की चली चुके, तेबे सिपाईया ओर तेस पीछे-पीछे चलणे वाल़े डांगरा खे कोई पाणी नि मिलेया। ओर इस्राएलो रे राजे बोलेया, “हाय! यहोवे यो तीन राजे इजी खे कट्ठे कित्ते, ताकि आसे मोआबो री सेना रे आथो दे ऊई जाईए।” पर यहूदा रे राजा यहोशापाते बोलेया, “क्या एती यहोवे रा कोई नबी नि ए, जेसरे जरीये आसे यहोवे ते पूछूँ?” इस्राएलो रे राजे रे किने कर्मचारिये ज्वाब देई की बोलेया, “आ, शापातो रा पाऊ एलीशा जो एलिय्याह री सेवा करेया करो था, से तो एती ए।” तेबे राजा यहोशापाते बोलेया, “तेसगे यहोवे रा वचन पऊँचेया करोआ।” तेबे इस्राएलो रे राजा ओर यहोशापात ओर एदोमो रा राजा तेसगे गये। तेबे एलीशे इस्राएलो रे राजे खे बोलेया, “मां साथे तेरा क्या काम ए? आपणे बाओ रे भविष्यबक्तेया गे ओर आपणी माया रे नबिया गे जा।” इस्राएलो रे राजे तेसखे बोलेया, “एड़ा नि बोल, कऊँकि यहोवे ये तीन राजे इजी खे कट्ठे करी राखे, ताकि इना खे मोआबो रे आथो दे करी देयो।” एलीशे बोलेया, “सेना रा यहोवा जेस सामणे आऊँ आजीर रऊँआ, तेसरी जिन्दगिया री कसम जे आऊँ यहूदा रे राजा यहोशापातो री इज्जत नि करदा, तो मां ना तो तेरी तरफा खे मूँ करना था ओर ना तूँ देखणा था। एबे कोई बजाणे वाल़ा मांगे ली आओ।” जेबे बजाणे वाल़ा बजाणे लगेया, तेबे यहोवे री शक्ति एलीशा पाँदे ऊई ओर तिने बोलेया, “एते नाल़े दे तुसे लोक इतणा खणो कि इदे गड्डे ई गड्डे ऊई जाओ। कऊँकि यहोवा ईंयाँ बोलोआ कि तुसा सामणे ना तो अव्वा चलणी ओर ना बर्खा ऊणी; तेबे बी ये नाल़ा पाणिए साथे परी जाणा ओर आपणे गाय-बल़द ओर डांगरा समेत तुसे पी सकोए। ओर ये यहोवे री नजरा दे छोटी जी गल्ल ए; यहोवे मोआब सेना बी तुसा रे आथो दे करी देणी। तेबे तुसे जाई की सारे गढ़वाल़े ओर खरे शईर नाश करी देणे ओर सारे अच्छे डाल़ बाडी देणे ओर पाणिए रिया सारी जगा पात्थरे की परी देणियां ओर सारे अच्छे डोरूआ दे पात्थर सेटी की सेयो खराब करी देणे।” दूजे दिने प्यागा नज्जो री बलि चढ़ाणे रे बखते एदोमो रिया तरफा ते पाणी बह्यी की आया ओर देश पाणिए साथे परी गा। ये सुणी की कि तीनो राजा आसा साथे लड़ने खे आऊणे लगी रे, जितणे मोआबी मर्दा री उम्र अथियार बानणे जोगी थी, सेयो सारे बुलाई की कट्ठे कित्ते ओर बन्ने पाँदे खड़े ऊए। प्यागा खे जेबे सेयो उठे तेस बखते सूरजो रिया किरणा तेस पाणिए पाँदे एड़िया पड़िया कि से मोआबिया रे सामणे रिया तरफा खे खूनो जेड़ा लाल दिशणे लगेया। तेबे सेयो बोलणे लगे, “ये तो खून ऊणा, पक्का सेयो राजा एकी-दूजे खे मारी की नाश ऊईगे ऊणे, इजी री खातर एबे ओ मोआबियो लूट लणे खे चलो।” जेबे सेयो इस्राएलो रे डेरे गे आए ई थे तदुओ खे इस्राएली उठी की तिना खे काणे लगे ओर सेयो तिना सामणे ते नठीगे ओर सेयो मोआबो रे लोका खे कांदे-कांदे तिना रे देशो दे पऊँची गे। तिने तिना रा शईर टाल़ी ता। सबी इस्राएली सिपाईए तिना रिया फसला वाल़े डोरूआ दे एक-एक पात्थर पाई की डोरू परी ते। तिने पाणिए रिया सारिया जगा परी तिया ओर सारे अच्छे-अच्छे डाल़ बाडी ते। आखरी दे राजधानी कीरहरासत ई बची। पर तेथो रे लोक बी खरेबण चलाणे वाल़ेया केरी ले, ओर नाश करीते। ये देखी की कि आसे युद्धो ते आरने लगी रे, मोआबो रे राजे 700 तलवार चलाणे वाल़े मर्द आपू साथे लई की एदोमो रे राजे तक अथियार बानी की पीड़ा खे चीरदे ऊए पऊँछणे री कोशिश कित्ती, पर पऊँची नि सकेया। तेबे तिने आपणा जेठा पाऊ जो तेसरी जगा पाँदे राज करने वाल़ा था पकड़ी की शईरो री दवाला पाँदे होमबलि चढ़ाया। इजी बजा ते इस्राएली लोक बऊत ई डरीगे, ओर तेसखे छाडी की आपणे देशो खे वापस ऊईगे।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.