Kulvi Outer Seraji Bible
भौंरु 4
नर
मेरी झ़ूरीऐ तूह भाल़ केही बित्ती आसा,
तूह आसा हेरनी बेघै बधिया।
घुंढू भितरी ढबा तेरी आछी पालल़ी ज़ेही
तेरअ मूंड आसा बाकरीए हेल़्ही ज़िहअ
ज़ुंण गलाद धारे ढल़ाना दी आसा होथदी लागी दी।1
तेरै दांद आसा मुनी दी शेती भेडे हेल़्ही ज़िहै शेतै
ज़ुंण ज़ात एभै पै पाणीं जैंदरा का न्हैऊई उझै निखल़ी
तिंयां आसा सोभै एकी रंगे अर तिन्नां मांझ़ै निं एक बी भेड़ शोठुई आथी।
तेरै होठ आसा लाला रांगे डोरी ज़िहै अर
तेरअ मुंह आसा दिला लोभणैं आल़अ।
घुंढू बाती शुझिआ तेरै दोहरै गलेटै नारदाणैं ज़िहै।
तेरअ कैल़अ आसा राज़ै दाबेदे उछ़टै कोटा ज़िहअ
हेरनअ बित्तअ ज़ुंण तेऊ अस्त्र-शस्त्रा लै बणाअं
अर ज़ेथ हज़ार ढाल़ा आसा किल्ली डाही दी,
तिंयां सोभै ढाल़ा आसा शूर-बीरे।
तेरी दुहै हिक्का आसा हरनीए दोगल़ बच़ै ज़ेही
ज़ुंण सुरघे फूला जैंदरी आसा च़रदै लागै दै।
ज़ांऊं तैणीं दोत्ती ठांढी बागरी निं फिरे
अर राच भैई निं मुक्के,
मुंह रहणअ तेभै तैणीं तिन्नां धारा प्रैंदै
ज़ेता का लोवान अर गंधरसे
खुशबू आसा लागी दी।
ए मेरी झ़ूरीऐ, तूह आसा सोभी गल्ला दी लोभणैं आल़ी,
ताह दी निं खोट आथी ई।
ए मेरी बेटल़ीऐ, तूह एछ लाबानोन धारा का मुंह संघै,
लाबानोना का एछ तूह मुंह संघै।
अमाना, सनीर अर हर्मोन धारे च़ुंडी
ज़िधी सिह अर च़राघ रहा,
तिधा का होथ तूह उंधै।
मुल्है लाई बरी दी मेरी झ़ूरीऐ,
तंऐं लोभअ मेरअ दिल
आपणीं आछिए एकी झपकै अर गल़े हारा करै।
तेरअ मुल्है झ़ूरनअ आसा दाखे रसा का बी मिठअ,
तेरअ सैंट आसा सोभी रंगे मसालै का खास्सअ खुशबूदार।
मेरी झ़ूरीऐ, तेरै होठै आसा मखीरा ज़िहअ सुआद,
तेरी ज़िभ आसा मुल्है मखीर अर दुधा ज़ेही।
तेरै झिकल़ै का एछा लाबानोन ज़ेही खुशबू।
मेरी बेटल़ीऐ, मेरी झ़ूरीऐ,
तूह आसा मेरी आपणीं बागा अर
ज़ाईरू पाणींए बाऐ ज़ेही
ज़ेथ फेर दुआल आसा दैनी दी कि तेथ भितरी कुंण डेऊई निं सके,
तेथ आसा टिप्परू लागै दै
तिंयां बझ़ा बागा दी नारदाणें बुटी ज़िहै ज़ेथ बधिया फल़ लागा,
तेथ आसा मैहंदी, जटामांसी
केसर, लोवान, मुश्क,
दाल़चिनी, गंधरस, अगर
बगैरा भांती-भांतीए मसालैदार बुटी लागी दी।
तूह आसा बागा दी पाणींए सोबल़,
ज़ाईरू पाणींए बाऐ अर
लाबानोने धारा का बगदी गाडा ज़ेही।
शोहरी
ओ उतर दिशा बाखे बागरीऐ ज़ाग,
ओ दखणा बाखे बागरीऐ मेरै बागा दी लाग।
तेते खुशबू लोल़ी सारै दी छिंघुई।
मेरअ लोभी लोल़ी आपणैं एऊ बागा दी आअ
अर तेऊ लोल़ी एते बधिया का बधिया फल़ खाऐ।
Source notes (1)
- Cross-reference सैणीं. 5:19
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.