Kulvi Outer Seraji Bible
भौंरु 3
नार
च़ैन्नै सुत्ती हआ मुंह राची कबल्लै
आपणैं लोभिए सुपनै,
हुंह रही तेऊ लोल़ी लागी पर सह निं मुंह भेटअ।
तेखअ बोलअ मंऐं आप्पू लै इहअ,
मुंह डेऊणअ आपणैं लोभी लोल़ी सारी नगरी,
तेते सोभी बाता अर बज़ारै,
हुंह रही तेऊ लोल़ी लागी पर सह निं मुंह भेटअ।
तेखअ भेटै मुंह नगरीए पहरी बी हांढदै-फिरदै लागै दै,
मंऐं पुछ़अ तिन्नां का, “तम्हैं मेरअ लोभी बी भाल़अ?”
ज़ांऊं हुंह तिन्नां सेटा का धख आजू डेऊई,
तेतरी गअ मुंह आपणअ लोभी भेटी,
मंऐं दैनी तेऊ लै पिड्डी मल़्हैची अर सह निं मंऐं
तेभै तैणीं छ़ाडअ ज़ांऊं तैणीं मंऐं आपणैं घअरै
तैहा पांडा निं पजैल़अ ज़िधी हुंह हुई ज़ल्मीं दी आसा।
एरुशलेम नगरीए बेटल़ीओ, मेरी आसा तम्हां का अरज़,
तम्हैं काढा हरनी अर घोर्हल़े सोह कि
ज़ेभै तैणीं हाम्हैं झ़ूरी करी पठी निं रज्ज़े तेभै तैणीं निं हाम्हां झ़ैऊई, नां छ़ेल़ी।
चिऊथी गिह
साथणीं
रेगीस्ताना का अह धूँए बादल़ा ज़िहअ किज़ै आसा लागअ द एछदअ?
एता संघै आसा भांती-भांतीए मसालै, लोवान अर खुशबूदार तेले
शोभली बास्स लागी दी?
भाल़ा, अह आअ राज़अ सुलैमान पालकी दी बेशी!
इज़राईले शूर-बीरा मांझ़ै शाठ ज़ण्हैं आसा
तेऊ ओर्ही-पोर्ही अर आजू-पिछ़ू लागै दै हांढदै।
तिंयां आसा सोभै तलबारा आल़ै अर
सोभ आसा तिंयां जुध बिद्या दी सेठ।
तिंयां सका राची घणैं न्हैरै बी जुध करी।
ज़हा पालकी दी राज़अ सुलैमान आसा बेठअ द,
सह आसा लाबानोने किम्मती काठा करै बणाईं दी।
तेते पाअ आसा च़ंदी करै महल़ै दै
अर तेतो कठैम्ह आसा सुन्नैं करै
थाल्लै बेशणा लै गाद्दी दी आसा
बैंज़णीं रांगो गलाफ लाअ द अर
मांझ़ै आसा तेथ एरुशलेम नगरीए शोहरी
बधिया बूणती पाई दी।
सियोन नगरीए बेटल़ीओ, बागै निखल़ा,
भाल़ा, राज़अ सुलैमान आअ
तेऊ आसा सह ई मुगट बान्हअ द
ज़ुंण तेऊए ईजै तेऊए बैहे धैल़ी
तेऊए मुंडै बन्हैऊंअ त।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.