Kulvi Outer Seraji Bible
भौंरु 2
झ़ूरी करै हआ सोभै गल्ला शोभली
हुंह आसा शारोन सऊंऐं मुल्खै फुल्लअ द गलाबो फूल
उटी रेल़ी धारा लागअ द सुरघो फूल।
नर
मेरी झ़ूरीऐ, होरी बेटल़ी जैंदरी ज़ाण्हिंआं तूह ज़ेही
कांडै जैंदरी सुरघे फूला ज़ेही।
नार
मेरै लोभिआ, तूह बी आसा होरी मर्धा जैंदरी इहअ
ज़िहअ बणैं होरी बूटा जैंदरी सेओ बूट,
मुंह एछा तेरी छ़ैल्ली दी बेशणेओ मज़अ,
अर तेरै फल़ आसा खाणां लै मिठै।
तंऐं पजैल़ी हुंह आपणीं धामा दी
अर ज़ुंण फ्रहरअ मुंह प्रैंदै आसा, सह आसा तेरी मुल्है झ़ूरी।
मुल्है दै दाख खैऊई करै बल अर
सेओ खैऊई फरेऊ मेरअ शाह हरअ!
मुंह आसा दिलो रोग लागअ द।
तेरी खिंज़ी बाह लोल़ी ती मेरै शरैहणैं हुई,
खाणैं हाथै लोल़ी तंऐं मुल्है मल़्हैची दैनी।
एरुशलेम नगरीए बेटल़ीओ, मेरी आसा तम्हां का अरज़,
तम्हैं काढा हरनी अर घोर्हल़े सोह कि
ज़ेभै तैणीं हाम्हैं झ़ूरी करी पठी निं रज्ज़े तेभै तैणीं निं हाम्हां झ़ैऊई, नां छ़ेल़ी।
दुजी गिह
नार
मुखा आसा आपणैं लोभिए बोल शुण्हदै लागै दै! शूणां,
सह आसा लागअ द धारा का छ़ाहल़ा दैई अर
धारठी लंघी मुंह सेटा लै एछदअ।
मेरअ लोभी आसा घोर्हल़ अर
खारकै हरना ज़िहअ,
सह आसा म्हारी दुआली पिछ़ू खल़्हुअ द।
सह आसा ताक्कीए ज़ाल़ी बाती पांडा लागअ द भाल़अ
अर सह आसा मुंह संघै गल्ला करदअ लागअ द।
नर
ए मेरी झ़ूरीऐ, हुंह झ़ूरा ताल्है खास्सअ!
च़ाल्ल, मुंह संघै एछ।
हिंऊंद गअ मुक्की, अर सरग बी गअ बिझुई,
खील-फूल फुल्लै, बसंते ऋत गई पुजी,
च़ेल्लू-पखीरूओ गिहा लाणैंओ बगत गअ पुजी,
बणां-बूटा का लागी पालल़ी गिहा बोल्दी शुण्हदी।
फेडूए बूटा दी च़ाल्लै फेडू पाक्की,
दाखे बेला दी लागै दै फूला का आसा शोभली बास्स लागी दी।
मेरी शोभली झ़ूरीऐ, हुंह झ़ूरा ताल्है खास्सअ,
च़ाल्ल, मुंह संघै एछ।
तूह आसा कबूतरी ज़ेही
ज़ुंण भिल़ीए द्रटा दी आसा लुक्की रही दी।
मुंह दै तेरअ शोभलअ मुंह भाल़णैं
अर तेरअ मिठअ बोल शुणनै।
म्हारी बागा आसा दाखे फूल खिल्लै दै,
ज़ुंण होछ़ै शैल़ठै आसा, तिंयां लणैं हाम्हां ढाकी,
ताकि तिंयां म्हारी बागा बरैबाद नां करे।
नार
मेरै लोभिआ, हुंह आसा तेरी अर
तूह आसा मेरअ,
तूह च़राऊआ आपणीं भेडा सुरघे फूला जैंदरी।
ज़ांऊं तैणीं दोत्ती ठांढी बागरी निं फिरे
अर राच भैई निं जाए,
तेभै तैणीं रह तूह खारकै हरना ज़िहअ बणी
ज़ुंण धारे ढल़ाना दी त्रुपल़ै दैआ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.