Kulvi Outer Seraji Bible
भौंरु 5
नर
मुल्है लाई बरी दी, मेरी झ़ूरीऐ,
हुंह गअ आपणैं बागा लै एछी,
मंऐं हेरअ गंधरस अर बलसान चुंघी,
हुंह आसा काशणीं संघी मखीरा खांदअ लागअ द,
दुध अर दाखो रस बी हेरअ मंऐं झुटी।
साथणीं
साथी-संघीओ, तम्हैं रहा खांदै पिंदै लागी
ज़ेभै तैणीं तम्हैं रज्ज़ी निं जाए।
च़ौथी गिह
नार
हुंह ती सुत्ती दी पर
दिलै ती ज़ागती रही दी।
मुंह हुअ इहअ सुपनअ कि
मेरअ लोभी लागअ बागै मेरै दुआरा टोक्कदअ अर
मुल्है इहअ बोल्दअ,
“मेरी बेटल़ी, मेरी झ़ूरी, मेरी पालल़ीऐ,
मुल्है खोल्ह पोर्ही दुआर!
मेरै मुंडै पल़अ पाल़अ अर
मुंडे शराल़ भिज़ै तेता करै पठी।”
नार
पर मंऐं बोलअ इहअ,
“हुंह आसा आपणैं झिकल़ै खोल्ही
अर हाथ-खूर धोई सुत्ती गई दी,
ऐबै कै हुंह झिकल़ै भिई बान्हूं अर आपणैं खूर भिई मैलै करूं?”
मेरै लोभी पाअ दुआरे खाढा बाती
आपणअ हाथ भितरा लै
तेखअ उबल़अ तेऊ लै मेरअ दिल,
तेखअ हुई हुंह आपणैं लोभी भितरी छ़ाडणा लै तैर,
ज़ांऊं मंऐं दुआरे मुठ ढाकी,
मेरै हाथे गुंठी का लागै खुशबूदार तेले टिप्पू अल़दै।
ज़ेभै सह मुल्है बोल्दअ त लागअ द, तेभै ती हुंह धख डरी दी
पर ज़ेतरी मंऐं आपणैं लोभी लै दुआर घुआल़अ,
तेभा लै गअ सह डेऊई!
हुंह लागी तेऊ लोल़ी पर सह निं मुंह भेटअ अर
मंऐं लाई तेऊ लै हाक्का बी
पर तेऊ निं होह बी किअ!
मुंह भेटै नगरीए पहरी हांढदै-फिरदै लागै दै,
तिन्नैं किई हुंह च़िक्की करै नर्तान अर
ज़ुंण नगरीए दुआली पहरी थिऐ, तिन्नैं छ़ड़ैऊअ मुखा मेरअ च़ादरू।
एरुशलेम नगरीए बेटल़ीओ,
तम्हैं काढा सोह, ज़ै तम्हां मेरअ लोभी भेटे,
तेऊ का खोज़ै इहअ कि हुंह आसा तेऊए झ़ूरी लै चाछल़दी लागी दी।
साथणीं
ओ सोभी का सुंदर नार,
तेरअ लोभी कै होरी सोभिए लोभी का खास्सअ बधिया आसा?
तेऊ दी किज़ै आसा इहअ खास
कि तंऐं बझ़ैल़ै हाम्हां का सोह खाणैं?
नार
मेरअ लोभी आसा शेतअ-गोरअ मोट्टअ-धोटअ बधिया,
सह आसा हज़ारो दी एक।
तेऊओ मुंह आसा च़ोखै सुन्नैं ज़िहअ अर
तेऊए मुंडे शराल़ आसा काऊड़ै ज़िहै काल़ै।
तेऊए आछी च़मका पालल़ी ज़ेही
ज़ुंण दुधा दी न्हैऊई गाडे बाढै आसा होए बेठै दै।
तेऊए गलेटै आसा इहै रगैटै ज़िहै
ज़ेथ रंगा फूल अर खुशबूदार मसालै आसा लागै दै,
तेऊए होठ आसा सुरघे फूला ज़िहै
ज़ेता का खुशबूदार रस रहा निटरदअ लागी।
तेऊए बाह आसा सनांगणूं बान्हीं सुन्नें छ़ल़ी ज़ेही
ज़ेथ किम्मती रतन आसा लागै दै,
तेऊए घेर आसा हाथी दांदा ज़ेही ल्हाशी
ज़ुंण नीलमणीं किम्मती पात्थरा करै हआ सज़ाऊअ द।
तेऊए ज़ांघा आसा संगमरमरे थाम्हा ज़ेही
ज़ेथ सुन्नें ज़ोल़ आसा लाऐ दै
सह आसा हेरनअ लाबानोन धारा
अर बडी केल़ुई ज़िहअ दिला लोभणैं आल़अ।
तेऊए च़ुंज़ी माख्खू दैणैंओ लागा च़ाअ,
एरुशलेम नगरीए बेटल़ीओ,
अह ई आसा मेरअ लोभी अर
अह ई आसा मेरअ साथी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.