Kulvi Outer Seraji Bible
भज़न 73
चिऊथअ भाग
(भज़न 73:1—89:52)
बिधाता आसा भलअ
असापो भज़न
बिधाता आसा इज़राईला लै भलअ,
खासकर तिन्नां लै ज़ुंण दिले शुचै आसा।
पर मंऐं हेरअ त हैअ छ़ाडी अर
मेरअ शाह गअ त चुटी,
किल्हैकि मेरअ दिल ज़ल़ा त ऐहा गल्ला भाल़ी कि
शरेरै अर कदुष्ट मणछ आसा राज्ज़ी-मौज़ी।
तिन्नां निं किछ़ै दाह खीज़ हंदी अर
तिंयां ज़िऊआ नरोगी ज़िन्दगी!
नां तिन्नां होरी मणछा ज़ेही आफ़त हंदी पल़ी दी,
नां किज़ू गल्ले खरी हंदी!
तिन्नों घमंड ताह इहअ आसा ज़ेही गल़ै सुन्नें कंठी!
उपद्रभ अर ज़ुल्म करनअ हआ तिन्नां लै पिठी च़ादरू ज़िहअ!
तिन्नें दिलै आसा उपद्रभ ई,
तिंयां हआ आपणैं मन्नैं कदुष्ट ई तरकिबा बणाऊंदै लागै दै।
तिंयां हआ होरीए सुहांगा लागै दै अर तिन्नें खाखा का निखल़ा गाल़ी ई,
तिंयां आसा शरेरै अर तिंयां सोठा होरी हारनै-मारने ई तरकिबा।
तिंयां आसा इहै शरेरै कि तिंयां बोला स्वर्गै बेठै दै बिधाता लै बी बूरअ!
अर होरी लै बी फिरा तिंयां हुकम करदै!
तिंयां पाआ धर्मीं मणछा बी कबाता
अर तिन्नें गल्ला पाआ तिंयां पाणीं ज़ेही झुटी!
तिंयां कदुष्ट बोला इहअ पै, “बिधाता ज़ुंण परम प्रधान परमेशर आसा, सह किज़ै ज़ाणा?
तेऊ का निं किछ़ै थोघ लागदअ कि इधी किज़ै हुअ!”
तज़ी बी रहा ईंयां कदुष्ट मणछ राज्ज़ी-मौज़ी!
इना का हआ धन-माया होर बी खास्सी!
मंऐं निं एक पाप बी किअ अर
आपणअ मन्न शुचअ डाही मुंह किज़ै भेटअ?
मुंह हआ धैल़ किज़ै नां किज़ै आफ़त पल़ी दी,
हर धैल़ै भेटा मुंह सज़ा!
ज़ै हुंह बी एही कदुष्ट गल्ला करदअ,
सह हणअ त मेरअ तेरी परज़ा संघै छ़ल़-कपट किअ द।
हुंह थक्कअ इना गल्ला सोठी-सोठी
पर ईंयां आसा मेरी समझ़ा का बागै!
तेखअ डेऊअ हुंह तेरी पबित्र ज़ैगा,
तिधी पुजी लागअ मुखा थोघ कि कदुष्ट मणछा किज़ै फल भेटा।
तूह बिधाता डाहा तिन्नां च़िफली ज़ैगा खरैल़ी अर
तिधा का बधल़ूई निं तिंयां खल़ै उझ़दै रहंदै।
तिंयां हआ घल़ी-पला दी खतम
तिन्नां लै पल़ा नच़ानक एही डरैऊंणी आफ़त कि तिन्नों निं नाअं-नशाण बी रहंदअ।
हे मेरै मालक, ज़िहअ राच भैई करै सुपनअ बृथा हआ,
तिहै ई करनै ताह तिंयां लोप, ज़ांऊं ताह उझ़ुई जाणअ।
मेरअ मन्न त खाट्टअ अर
दिल थिअ चुटी गअ द,
हुंह त पशू ज़िहअ कबुधी अर बेसमझ़,
हुंह निं ताह बिधाता समझ़ी बोल़अ।
तज़ी बी रहअ हुंह कबल्लअ ताह नेल़ अर
तंऐं थिअ मेरअ हाथ ढाकी डाहअ द।
तेरी सलाह ती मुंह आजू नढैऊंदी लागी दी,
तेतो फल भेटअ मुंह खिरी इहअ कि तंऐं किअ मेरअ अदर।
मेरअ निं स्वर्गै ताखा सुआई होर कोहै आथी,
इधी ऐहा पृथूई बी निं मुंह ताखा सुआई होर किछ़ै लोल़ी।
मेरअ दिल अर मन्न आसा हारी गअ द,
पर तूह बिधाता आसा मेरअ बल
मुंह आसा सदा तेरी ई ज़रुरत।
ज़ुंण ताखा दूर हआ, तिन्नां पल़णीं सज़ा भुगतणी ई,
ज़ुंण ताल्है विश्वास घात करा, तिंयां करनै ताह पठी बरैबाद।
पर मुल्है आसा ताह बिधाता नेल़ रहणअ ई भलअ,
मेरी शरण लणें ज़ैगा आसा तूह ई मेरअ मालक,
ज़ुंण तंऐं मुल्है किअ, तिंयां गल्ला खोज़णीं मुंह सोभी का।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.