Kulvi Outer Seraji Bible
भज़न 72
राज़ै लै धर्मीं अर भलाईए अरज़
राज़ै सुलैमाने गिह
हे परमेशर, ज़ीबाण, राज़ै का खोज़ धर्म अर नसाफ करनअ,
ज़िहअ तूह आसा तिहअ ई।
सह लोल़ी सारी परज़ा लै मानदार अर धर्मीं रहअ अर
रैनै-गरीबो लोल़ी तेऊ मानदारी संघै नसाफ किअ।
सारै देशे सोभी ज़ैगा लोल़ी शांती अर
धर्मीं राज़ हुअ।
राज़ै लोल़ी ती रैनै-गरीबो मानदारी संघै नसाफ किअ,
छ़ुटै-मुक्कै दै लान्हें लोल़ी ती मज़त किई अर
तिन्नां छेऊणैं आल़ै लै लोल़ी सज़ा भेटी।
ज़ेभै तैणीं सुरज़ अर ज़ोथ आसा,
तेभै तैणीं लोल़ी तेरी परज़ा तेरी ज़ै-ज़ैकार करदी रही।
राज़अ लोल़ी त परज़ा लै इहअ भलअ हुअ ज़ेही
शुक्की ज़ैगा बरसात हआ अर ज़ैगा हरी-भरी हआ।
तेऊए राज़ा दी लोल़ी धर्मीं मणछ फल़ै-फुल्लै अर
ज़ेभै तैणीं सरगै ज़ोथ आसा तेभै तैणीं लोल़ी तेऊ राज़ा दी शांती रही।
तेऊओ राज़ लोल़ी एकी समुंदरा का दुजै समुंदरै तैणीं अर
एप्रात दरैऊआ का पृथूईए दुजै बाढा तैणीं हुअ।
उज़र रेगीस्तानै बस्सै दै लोगै लोल़ी तेऊ सेटा माथअ टेक्कअ,
तेऊए दुशमणै लोल़ी तेऊ सेटा धरनीं माट्टै दी नाक रघोल़अ।
तरशीश1 देशे राज़ै अर होरी टापू दी राज़ करनै आल़ै राज़ै लोल़ी तेऊ लै कारअ दैनअ,
अर शेबा अर सबा मुल्खे राज़ै लोल़ी तेऊ सेटा भैंट आणी।
सोभी राज़ै लोल़ी तेऊ सेटा माथअ टेक्कअ अर
सोभी देशे लोगै लोल़ी तेऊए च़ाकरी किई।
किल्हैकि ज़ुंण रैनै गरीबै तेऊ सेटा पकार पाई, तेऊ राज़ै बच़ाऊऐ तिंयां,
ज़ुंण छ़ुटै मुक्कै दै थिऐ, तिन्नों किअ तेऊ नसाफ।
सह करा रैनै-गरीबा लै झींण,
अर तेऊ बच़ाऊई तिन्नें ज़िन्दगी।
तेऊ बच़ाऊऐ तिंयां ज़ुल्म अर उपद्रभा का,
तेऊ लै आसा तिन्नें ज़िन्दगीए किम्मत खास्सी।
तेऊ राज़ैओ राज़ लोल़ी सदा रहअ!
शेबा नगरी का लोल़ी तेऊ लै सुन्नअ दैनअ,
तेऊ राज़ै लै लोल़ी ताह बिधाता सेटा सदा अरज़ हुई
अर ताखा लोल़ी सदा तेऊ लै बर्गत भेटी।
तेऊ देशै लोल़ी बतेर्हअ नाज़ हुअ,
धारा लोल़ी खास्सी फसल हुई,
नाज़े सील लोल़ी तेथ लाबानोन धारे केल़ुई ज़िहै लाम्मै हुऐ।
तेऊ देशे नगरी लोल़ी मणछा करै
घैहणींए घाह ज़ेही भरी हुई।
तेऊ राज़े शोभा लोल़ी सदा-सदा लै सरगे सुरज़ा ज़ेही रही,
सोभी देशै लोल़ी ताह बिधाता का एही अरज़ किई,
“ज़ेही तंऐं तेऊ राज़ै लै बर्गत दैनी,
तेही बर्गत दै तूह हाम्हां लै बी।
हे इज़राईले परमेशर बिधाता, हाम्हां करनी तेरी ज़ै-ज़ैकार
इहै च़मत्कार सका तूह ई करी।
हाम्हां करनी तेरै महान नाओंए सदा ज़ै-ज़ैकार।
तेरी शोभा लोल़ी सारी पृथूई दी भर्हुई।
एवमस्तू, भिई बोला हाम्हैं एवमस्तू।”
ताह बिधाता सेटा आसा मुंह ईशैई शोहरू राज़ै दाबेदे एचल़ी ई अरज़।
Source notes (1)
- Footnote तरशीश तेऊ ज़मानैं ज़ेतरअ भाल़अ हेरअ द थिअ, तेथ त तरशीश पछ़मा बाखा सिऊंआं। ज़ेता लै आझ़काला स्पेन बोला।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.