भज़न 60

छ़ुटकारै लै अरज़

गाज़ै-बाज़ै आल़ेए सैणैं लै राज़ै दाबेदो शूशनेदूत रागा दी खास भज़न। तेऊ लिखअ अह भज़न तधू, ज़धू उतर सिरीया देशे सैना संघै जुध थिअ लागअ द, ज़धू लूंणै खागा दी जोआब फिरी डेऊअ अर तेऊ पाऐ तै तिधी बारा हज़ार एदोमी मारी।

1हे परमेशर, तंऐं डाहै हाम्हैं शोटी अर हाम्हैं पाऐ तंऐं हारी,

तूह आसा हाम्हां का रुश्शअ द, ऐबै कर हाम्हां भिई तिहै ई ज़िहै थिऐ।

2तंऐं किई धरती दी ज़ाज़री संघा पाई तेथ द्रटा,

ऐबै ज़ोल़ एता भिई नांईं ता च़ाल्‍ली पठी ढूल़ी।

3तंऐं रहैऊई आपणीं परज़ा का खास्सी खरी,

तंऐं पणैऊंअं हाम्हां का इहअ दाखो रस ज़ेते नशै टिम्भल़ुई करै धरनीं बधल़िआ।

4ज़ुंण तेरी डरा हेठै रहा, तिन्‍नां लै दैनी तंऐं चतैनगी,

ताकि तिंयां बरैबाद हणैं का बच़े।

5हे परमेशर, तूह बच़ाऊ हाम्हां आपणैं महान बला करै,

ज़हा लै तूह झ़ूरा, तिंयां लोल़ी तै बच़ै।

6हे परमेशर, तूह आसा पबित्र अर तंऐं आसा इहअ बोलअ द,

“मुंह हणीं शकेम नगरी बांडदा खुशी अर

मुंह दैणीं सक्‍कोत सऊंऐं मुल्खे ज़ैगा नापी करै मेरी परज़ा लै बांडी।

7गलाद आसा मेरअ अर मनिश्शे बी आसा मेरअ ई,

एप्रैम देश आसा मेरअ टोप

अर यहूदा आसा मेरै राज़ बलो नशाण।

8पर मोआब आसा मेरअ हाथा धोणेंओ भांडअ,

एदोमा लै शोटणअ मुंह आपणैं खूरो पोलल़अ नछ़ैण कि तेऊओ मालक आसा हुंह आप्पै।

पलिश्ती कै इहअ सोठा कि तिन्‍नें हणीं ज़ै-ज़ैकार अर तिंयां कै मुखा ज़िती सका?”

9“हे बिधाता, बडी-बडी उछ़टी दुआली आल़ी नगरी हुंह कहा पजैल़णअ?

मुल्है एदोम देशे लोगा का ज़ीत कहा दैणीं?

10तंऐं कै हाम्हैं पठी डाहै शोटी?

हे परमेशर, ऐबै कै तूह म्हारी सैना आजू-आजू हांढणअ निं आथी?

11हे बिधाता, म्हारै दुशमणा का बच़णा लै कर म्हारी मज़त,

किल्हैकि मणछे मज़त हआ बृथा!

12ज़ै तूह परमेशर हाम्हां संघै होए, तै जाणैं हाम्हैं ज़िती,

ताह हेरनै म्हारै दुशमण हारी।”