Kulvi Outer Seraji Bible
भज़न 59
आपणीं फाज़त लै अरज़
गाज़ै-बाज़ै आल़ेए सैणैं लै अल-तशहेत रागा दी राज़ै दाबेदो खास भज़न, ज़धू राज़ै शाऊलै तेऊए घअरा फेर पहरअ पाअ कि तिंयां तेऊ मारी पाए।
हे मेरै परमेशर, तूह बच़ाऊ मुंह मेरै दुशमणा का,
हुंह गोटअ इनै फेरा-फेर ऐबै बच़ाऊ इना का मुंह तूह ई।
तूह बच़ाऊ मुंह इना कदुष्ट मणछा का,
इना हत्या करनै आल़ै का कर मेरी फाज़त।
भाल़! तिंयां आसा मुंह मारी पाणा लै ताखुऐ दै,
ईंयां नर्दैई मणछ हुऐ मुंह मारना लै कठा।
अह निं एता लै हुअ कि मंऐं किअ होए कोई पाप!
हे बिधाता, नां मंऐं किज़ै कशूर किअ आथी!
हे परमेशर, भाल़णीं दै, उझ़ू, ऐबै कर मेरी मज़त।
ए स्वर्गे सारी सैने मालक बिधाता, ऐबै उझ़ू, ऐबै एछ तूह मेरी मज़त करदअ,
तूह आसा इज़राईलो परमेशर!
ऐबै ज़ाग संघा दै इना विश्वास घाती लै सज़ा,
इना नर्दैई अर कदुष्टा लै निं किछ़ै झींण करी।
तिंयां मेरै दुशमण एछा सान्हां संघा लागा कुक्करा ज़िहै ख्रिशदै,
संघा रहा नगरी फेर ठुल़्दै लागी।
हे बिधाता, तिन्नें हाक्का अर धमकी शुण,
तिन्नें खाखा, ज़िभ आसा तलबारा ज़ेही,
तिंयां सोठा आप्पू इहअ कि तिन्नां निं कोहै आथी शूणअ लागअ द!
पर हे बिधाता, ताह फुक्कणी इना पराई ज़ातीए लोगा लै हास्सी अर
ताह करनअ तिन्नों सुहांग।
हे परमेशर, मुंह आसा तेरै ज़ोरो भरोस्सअ,
मेरी शरण लणें ज़ैगा आसा तूह ई।
तूह झ़ूरा मुल्है अर तूह जाणअ मुंह भेटी,
ताह रहैऊंणै मुखा मेरै दुशमण हारदै मेरी आछी।
तिन्नां निं मारी आथी, नांईं ता लोग जाणैं बिस्सरुई।
हे मेरै मालक बिधाता, तिन्नां छिंग खद्रेल़ी करै ओर्ही-पोर्ही
संघा लोल़ी तिंयां हारै, तेरै लोगा लै बच़णे ढाल़ आसा तूह ई।
पाप आसा तिन्नें होठै, तिन्नें निखल़ा हर बैणा दी पाप,
ज़िहअ झ़ुठअ बोल़णा लै तिंयां घमंड करा,
तिंयां लोल़ी तै मुंह तिन्नां ई गल्ला दी शाचै।
तिन्नां कर तूह आपणैं रोश्शा करै बरैबाद,
तिन्नां कर पठी खतम।
तेखअ इहअ करै लागणअ सोभी का थोघ कि याकबे आद-लुआदा प्रैंदै करा तूह परमेशर आप्पै राज़
अर तेरअ राज़ आसा सारी पृथूई दी।
तिंयां एछा सान्हां संघा लागा कुक्करा ज़िहै ख्रिशदै,
संघा रहा नगरी फेर ठुल़्दै लागी।
ज़िहअ कि तिंयां आसा फेर रोटीए ठोर-म्हारा लोल़ै लागै दै,
ज़ै तिन्नां नांई भेटअ, संघा रहा तिंयां सारी राची ख्रिशदै लागी।
पर मुंह करनी तेरै ज़ोरे ज़ै-ज़ैकार,
तेरी अटल़ झ़ूरीए बोल़णीं मुंह दोत्ती धैल़ गिह।
किल्हैकि तूह आसा मुल्है उछ़टै गहल़ा ज़िहअ
ज़ेथ हुंह आफ़ते पलका शरण लआ।
मुंह करनी तेरी ज़ै-ज़ैकार,
मेरी फाज़त करनै आल़अ आसा तूह,
तूह आसा सह परमेशर ज़ुंण मुल्है खास्सअ झ़ूरा।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.