Kulvi Outer Seraji Bible
भज़न 57
दुशमणा का फाज़त लै अरज़
गाज़ै-बाज़ै आल़ेए सैणैं लै अल-तशहेत रागा दी राज़ै दाबेदो खास भज़न, ज़धू सह राज़ै शाऊला सेटा का ठुर्ही डुआरै थिअ लुक्की रहअ द।
हे बिधाता, मुल्है कर झींण,
किल्हैकि मंऐं आसा ताह सेटा शरण लई दी।
ज़ेभै तैणीं ईंयां आफ़ता मुक्की निं जाए,
तेभै तैणीं लणी मुंह तेरै फैंखा हेठै शरण।
मुंह करनी ताह परम प्रधान परमेशरा सेटा अरज़
ज़ुंण मेरी सारी गरज़ा पूरी करा।
ताह बिधाता करनी मेरी स्वर्गा का मज़त संघा हेरनअ हुंह बच़ाऊई,
ज़ुंण मुंह हंता, तिन्नां लै पाणीं ताह आफ़त।
तेरी झ़ूरी आसा मुल्है अटल़ अर तूह आसा शुचअ-पाक्कअ।
हुंह आसा मेरै दुशमणै फेरा-फेर गोटअ द,
ज़ुंण आदमखोर भुखै सिहा ज़िहै आसा।
तिन्नां मणछे दांद आसा कतीर अर बर्छ़ी ज़िहै अर
तिन्नें ज़िभा आसा तिछी तलबारा ज़ेही।
हे बिधाता, तेरअ अदर लोल़ी सारै भ्रमंडै हुअ अर
तेरअ प्रतप्प लोल़ी सारी पृथूई दी शुझुअ।
मेरै दुशमणै आसा मुल्है ज़ज़ाल़ छ़ैअ द,
हुंह च़ाल्लअ हैल़ै मरी।
तिन्नें आसा मुल्है डुघी खात्ती डाही दी खण्हीं,
पर तेथ लोल़ी तै तिंयां आप्पू ई पल़ै।
हे परमेशर, मुंह आसा तेरअ पाक्कअ भरोस्सअ,
मुंह करनी गिहा बोली तेरी ज़ै-ज़ैकार!
ए मेरै मन्नां, ज़ाग! उझ़ू,
तारा आल़ै बाज़ै अर बींन ज़ागा!
मुंह जाणअ राच भैंदी उझ़ुई।
हे मेरै मालक, मुंह करनअ देशा-देशे लोगा जैंदरी तेरअ शूकर,
सोभी लोगा नदरी करनी मुंह गिहा बोली तेरी ज़ै-ज़ैकार।
हाम्हां लै तेरी अटल़ झ़ूरी आसा उझै सरगै तैणीं,
तेरअ सत्त आसा सारै भ्रमंडै।
हे बिधाता, तेरअ अदर लोल़ी उझै सारै भ्रमंडै हुअ अर
तेरअ प्रतप्प लोल़ी सारी पृथूई दी शुझुअ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.