भज़न 56

हंतणैं आल़ै का छ़ुटकारै लै अरज़

गाज़ै-बाज़ै आल़ेए सैणैं लै योनतेलेखद्दोकीम ज़ैगा दाबेदो खास भज़न ज़धू पलिश्ती तिंयां गात नगरी ढाकै तै।

1हे परमेशर, मुल्है कर झींण,

हुंह गोटअ मेरै दुशमणै फेरा-फेर,

तिन्‍नैं आणअ हुंह धैल़ हंती-हंती मारी।

2मेरै बैरी करा मुंह संघै धैल़ झ़गल़अ,

ज़ुंण शरेरै मुंह संघै च़िखदै एछा, तिंयां आसा खास्सै।

3पर हे परमेशर, ज़ेभै बी मुंह डअर लागा,

हुंह डाह तेभै तेरअ ई भरोस्सअ।

4हे परमेशर, मेरअ भरोस्सअ आसा ताह ई दी कि मुंह डअर नां लागे,

ज़ुंण तंऐं ज़बान आसा दैनी दी हुंह करा तेते बड़ैई,

तेखअ निं कोहै मणछ मेरअ किछ़ बगाल़ी सकदै।

5मेरै दुशमण हआ कबल्‍लै मेरी गल्‍ला दी खोट लोल़ै लागै दै,

तिंयां हआ कबल्‍लै ताखुऐ दै कि किहअ करै मेरी हान्‍नी करे।

6तिंयां हआ आप्पू मांझ़ै कठा

संघा हआ लुक्‍की करै मुंह भाल़ै लागै दै कि हुंह किज़ै करा,

तिंयां हआ मुंह मारना लै ताखुई रहै दै।

7हे परमेशर, तूह दै तिन्‍नें कदुष्ट कामां लै आप्पै सज़ा,

तेरै रोश्शा करै लोल़ी तिंयां हारै।

8भाल़, ताखा आसा थोघ कि मुल्है केही आफ़त आसा पल़ी दी,

तंऐं आसा मेरी लेर-पकारो साब-कताब डाहअ द,

हाँ, तंऐं आसा सोभै गल्‍ला आपणीं कताबा दी डाही दी लिखी।

9ज़ेभै हुंह ताखा अरज़ करूं,

तेभै लोल़ी मेरै दुशमण पिछ़ू फिरै।

मुखा आसा इहअ थोघ कि परमेशर आसा मुंह बाखा।

10तूह परमेशर बिधाता ज़ेही ज़बान दैआ, हुंह करा तेते ज़ै-ज़ैकार।

11हुंह करा तेरअ ई भरोस्सअ अर तेखअ निं हुंह डरदअ,

तेखअ मणछ मेरअ किज़ै सका बगाल़ी?

12हे परमेशर बिधाता, ज़ुंण मंऐं ताल्है मानत आसा मनी दी, सह करनी मुंह पूरी,

मुंह करनअ तेरअ शूकर अर सह हणीं ताल्है मेरी भैंट।

13किल्हैकि तंऐं बच़ाऊअ हुंह मरनै का अर

तंऐं निं मुंह हारनै दैनअ।

ताकि हुंह ताह खुश करूं अर

तेऊ प्रैश्शै दी हांढूं ज़ेता करै ज़िन्दगी भेटा।