Kulvi Outer Seraji Bible
भज़न 44
मज़त करना लै अरज़
गाज़ै-बाज़ै आल़ेए सैणैं लै कोराह खिंबा आल़ैओ खास भज़न
हे परमेशर, हाम्हैं आसा आपणैं कानै शूणअ द,
म्हारै दाद-बाब खोज़ा एते बारै इहअ कि
तिन्नें ज़मानैं अर पैहलकै जुगै
तंऐं किहै-किहै महान काम आसा किऐ दै
तंऐं काढै तै बोला आपणैं हाथे ज़ोरै
तेऊ देशा का कदुष्ट ज़ाती पोर्ही अर
तिन्नें ज़ैगा बसाऊऐ तंऐं आपणैं लोग,
तंऐं भाल़ देशा-देशे लोगा लै केही सज़ा दैनी ती
अर आपणैं खास लोगा दैनअ तंऐं फेरा-फेर बस्सणै।
तेरै लोगै निं सह ज़ैगा आपणैं तलबारे ज़ोरै गिम्मी,
नां तिन्नें सह आपणैं ज़ोरै जुध करी ज़िती,
तेता लै थिअ तेरअ ज़ोर अर तेरी बाहो बल,
तूह त आप्पू तिन्नां संघै अर
एता का लागा थोघ कि तूह झ़ूरा तिन्नां लै खास्सअ।
हे परमेशर, तूह ई आसा म्हारअ माहा राज़अ,
तूह दैआ आपणीं परज़ा याकबे आद-लुआदा लै ज़ीत,
तेरै महान ज़ोरे आसरै बदल़ा हाम्हैं आपणैं दुशमणा धरनीं
अर तेरै प्रतप्पा करै जाआ हाम्हैं तिन्नां का ज़िती।
हुंह निं आपणैं कबाण अर
आपणीं तलबारे ज़ोरै बच़णे आसरै रहंदअ,
पर तंऐं हेरै हाम्हैं म्हारै दुशमणा का बच़ाऊई,
तंऐं किऐ म्हारै बैरी धिठै अर शर्मिंदै।
हे परमेशर, हाम्हां करनी कबल्ली तेरी बड़ैई अर
हाम्हां रहणअ सदा तेरै शूकर करदै लागी।
पर ऐबै डाहै तंऐं हाम्हैं शोटी अर तंऐं दैनअ हाम्हां हारनै!
ऐबै निं तूह म्हारै दला आजू हांढदअ।
हाम्हां पल़ा ऐबै म्हारै दुशमणा सेटा का पोर्ही ठुहर्नअ,
तिंयां लुटा हाम्हां ज़िहअ तिन्नों दिल बोला तिहअ!
तूह दैआ हाम्हां हेल़्ही मांझ़ा का चैणैं ज़िहै काठणैं,
तंऐं छिंगै हाम्हैं धरती दी देशै-देशै।
तंऐं पाऐ आपणैं लोग सस्तै दी बेच़ी,
ज़िहअ कि तिन्नें निं किछ़ै किम्मत आथी!
हाम्हां ओर्ही-पोर्ही बस्सै दै लोग लागा एता भाल़ी
हास्सदै अर सुहांगा करदै कि तंऐं हाम्हां संघै किज़ै किअ!
देशा-देशे1 लोग करा म्हारअ सुहांग अर
तिंयां करा म्हारी बेइज़ती करना लै हाथा करै शारअ।
हाम्हां पल़ा धैल़ शर्मिंदै हणअ,
बेइज़ती गोटै हाम्हैं फेरा-फेर,
होर लागा हाम्हां लै हास्सदै अर तान्हैं दैंदै,
ज़ांऊं तिंयां भाल़ा कि म्हारै दुशमणै लअ हाम्हां का बदल़अ।
हाम्हां संघै एतरअ हई बी निं
हाम्हां ताह बिस्सरुऐ अर
नां हाम्हैं सह करार चोल़ी ज़ुंण तंऐं हाम्हां संघै किई ती।
हाम्हैं डाहअ तूह सदा आपणैं मन्नैं,
नां हाम्हैं तेरी खोज़ी दी बाता का ओर्ही-पोर्ही डेऊऐ।
तज़ी बी डाहै तंऐं हाम्हैं बणैं शैल़ठै जैंदरी पाई,
तंऐं डाहै हाम्हैं नटिप्प न्हैरै दी शोटी।
ज़ै हाम्हैं ताह परमेशरा छ़ाडी होरी
देअआ-देबीए पूज़ा बी किई हंदी,
हे परमेशर, ताखा जाणअ त तेतो बी थोघ लागी,
किल्हैकि ताखा हआ म्हारै दिले गुप्त गल्लो बी थोघ।
ताह पिछ़ू पाआ लोग हाम्हां कबल्लै मारी,
हाम्हां संघै हआ तिन्नां भेडा ज़िहअ बर्ताअ ज़ुंण काटणा लै हेल़्ही का ज़ुदी हआ डाही दी।2
हे मेरै मालक, उझ़ू! तूह किल्है आसा सुत्ती रहअ द?
ऐबै उझ़ू, हाम्हां निं सदा लै शोटी डाही।
तूह किल्है डाहा हाम्हां बाखा लै पिठ फरेऊई?
एता निं बिस्सरी पाई कि हाम्हैं किहै दुख अर आफ़त आसा पल़ी दी!
हाम्हैं पल़ै धरनीं अर
हाम्हैं आसा माट्टै जैंदरी लाम्मै पल़ै दै।
हे बिधाता, म्हारी मज़त कर,
आझ़ रहैऊ ऐहा गल्ला कि तूह हाम्हां लै किहअ खास्सअ झ़ूरा।
Source notes (2)
- Footnote देशा-देशे पराई ज़ातीए
- Cross-reference रोम. 8:36
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.