भज़न 43

खरीए पलका अरज़

1हे परमेशर, मेरअ नसाफ कर,

तूह लल़ मेरअ दाऊअ इना पापी संघै आप्पी,

इना कदुष्ट अर कपटी मणछा का बच़ाऊ मुंह।

2मेरी फाज़त करनै आल़अ आसा तूह ई,

तंऐं किल्है डाहअ हुंह शोटी?

इनै दुशमणै आणअ हुंह हंती,

अह दाह किल्है लागा मुंह ज़िरनी?

3तूह छ़ाड मुल्है आपणअ सत्त अर प्रैश्शअ,

ताकि तेते ज़ोरै हुंह तेरै

पबित्र पर्बत सियोन अर

तेरै भबनै पुजी सकूं ज़िधी तूह रहा।

4हे बिधाता, तिधी डेऊणअ मुंह तेरी बेदी सेटा,

किल्हैकि मेरी खुशीओ मूल़ आसा तूह ई।

हे मेरै परमेशर, हे बिधाता,

मुंह करनअ बींन बाज़ी करै तेरअ शूकर।

5इहअ किल्है चुटअ मेरअ हैअ?

मुंह किल्है निस्सअ उझ़ुई नां बेशी राम हई?

मुंह डाहणअ परमेशरा दी भरोस्सअ,

मुंह लणअ त एकी बारी भिई परमेशरा सेटा डेऊई

आपणैं उद्धार करनै आल़ै परमेशरो शूकर करी।