Kulvi Outer Seraji Bible
भज़न 37:5
Verse 5 is marked below, with the whole chapter around it. Read from the start
बिधाते आसरै रहा
राज़ै दाबेदो भज़न
बूरै कर्म करनै आल़ै मणछ निं पाल्लै पाणै हंदै,
नां कदुष्ट मणछा संघै ज़ीद डाहणीं।
तिंयां जाणैं घाह ज़िहै झ़ट च़ारै खतम हई,
तिंयां मछैणैं बाझ़ी पाणीं हरै घाहा ज़िहै।
बिधाता दी डाहणअ भरोस्सअ, आप्पू रहणअ भलअ करदै लागी।
तै रहणैं तम्हैं तेऊ देशै1 बस्सी अर राज्ज़ी-राम्बल़ै।
तम्हैं करै तिहअ ज़िहअ बिधाता च़ाहा,
तै करनी तेऊ थारी दिला-मन्नें पूरी।
सोभै गल्ला दैआ बिधाते हाथै छ़ाडी,
बिधाता दी डाहा भरोस्सअ, तेऊ हेरनी सोभै गल्ला पूरी करी।
तेऊ करनअ थारअ धर्म प्रैश्शै ज़िहअ
अर थारअ नसाफ करनअ तेऊ दपहरे धुप्पै ज़िहअ।
सबर डाहणअ संघा दैणअ बिधाता काम करनै,
कदुष्ट मणछा सफल हंदै भाल़ी निं फिकर करनअ अर
नां तिन्नें कदुष्ट बिक्री भाल़ी हैल़अ करी।
नां रोश्श करी अर नां बखर्दै लागी,
ज़ै रोश्श काबू निं हुअ, तेता करै हआ आफ़त खल़ी।
किल्हैकि सोभै कदुष्ट पापी हणैं बरैबाद,
धरतीए मालक2 हणैं तिंयां ज़ुंण बिधाता दी भरोस्सअ डाहा।
कदुष्ट हणैं छ़ेक्कै खतम,
तम्हां निं तेखअ तिंयां लोल़ी-तोप्पी करै बी च़ाल्लै भेटी।
पर भोल़ै मणछ हणैं धरतीए मालक,
संघा रहणैं तिंयां राज्ज़ी-खुशी बस्सी।
कदुष्ट सोठा भलै मणछा लै बूरी गल्ला,
सह डाहा तिन्नां लै ज़ीद संघा लागा दांदा कटिल्लदअ।
पर म्हारअ मालक बिधाता लागा तिन्नां कदुष्ट मणछा लै हास्सदअ,
किल्हैकि तेऊ का हआ थोघ कि तिन्नों बरैबाद हणैंओ बगत आसा छ़ेक्कै ज़ेभै खिरी नसाफ हणअ।
कदुष्ट मणछ एछा तलबार अर
कतीर-कबाण खिंच़ी रैनै-गरीबा मारदै अर
ज़ुंण भलअ करा तिन्नां मारी पाणा लै ठुर्ही।
पर तिन्नें तलबारा करै मरनै तिंयां आप्पू ई,
अर तिन्नें कतीर-कबाण पाणै चोल़ी।
धर्मीं ज़िन्दगी ज़िऊई गरीब रहणअ आसा
पाप करी सेठ हणैं का भलअ।
किल्हैकि बिधाता करनै कदुष्ट मणछे ज़ोर-ज़ाहण खतम,
पर धर्मीं मणछे करनी तेऊ फाज़त।
नर्दोश मणछे करा बिधाता आप्पै हेर-सभाल़,
तिन्नां भेटणीं ज़ैदात सदा लै।
खरीए पलका निं तिंयां शर्मिंदै हणैं अर
तिन्नां जाणअ घोर नकाल़ा जैंदरी बी खाणां लै भेटी।
कदुष्ट मणछ हआ बिधाते दुशमण,
तिंयां शुक्कणैं बणें फूला ज़िहै अर
तिंयां लुक्कणै धूँआं ज़िहै।
कदुष्ट निं ऋण काढी करै पोर्ही भर्दअ आथी,
पर धर्मीं मणछ दैआ दिल खोल्ही दान पै।
ज़हा लै बिधाता बर्गत दैआ, तिंयां हणैं धरतीए मालक,
पर ज़हा लै सह फिटक दैआ, तिंयां हणैं बरैबाद।
धर्मीं मणछा नढैऊआ बिधाता आप्पै,
सह हआ तिन्नें ज़िन्दगीए हर गल्ला करै खुश।
च़ाऐ तिन्नां ठोहल़ बी लागे, तिंयां निं धरनीं बधल़णैं,
किल्हैकि तिन्नों हाथ हआ बिधाता डाहअ द ढाकी।
हुंह हुअ ऐबै प्रोढअ अर मंऐं ज़िऊई खास्सी अमर,
पर मंऐं निं इहअ कधि भाल़अ कि धर्मीं मणछ डाहै बिधाता कल्ही शोटी,
नां इहअ भाल़अ कि तिन्नें लान्हैं लागै किधी टुकरी मांगी करै खांदै!
तिंयां धर्मीं दैआ होरी लै पै दिल खोल्ही ऋण अर
तिन्नें हआ आजू आद-लुआदा लै बी खास्सी बर्गत।
बूरअ छ़ाडी करा भलअ,
तै रहणीं थारी आद-लुआद तेऊ देशै सदा।
किल्हैकि बिधाता झ़ूरा नसाफ करना लै,
सह निं धर्मीं मणछा शोटी डाहंदअ,
सह करा सदा तिन्नें फाज़त।
पर कदुष्टे आद-लुआद करनी तेऊ दूर।
धर्मीं मणछ हणैं धरतीए मालक
अर तिंयां रहणैं सदा तेथ बस्सी।
धर्मीं मणछे गल्ला हआ अक्लीए,
तिंयां करा हर बगत नसाफे गल्ला।
तिंयां डाहा बिधातो बधान आपणैं दिलै आद,
अर तिंयां निं तेता का ओर्ही नां पोर्ही गंईं दैंदै।
कदुष्ट मणछ रहा धर्मीं मणछा लै ताखुई,
सह च़ाहा किहअ नां किहअ करै तेऊ मारी पाणअ।
पर बिधाता निं कदुष्ट मणछा सफल हणैं दैंदअ,
ज़ेभै धर्मीं मणछे पेशी होए, तेभै निं बिधाता तिन्नां लै दोश लांदअ।
तम्हैं डाहणीं बिधाता दी आशा,
संघा रहणअ तैहा बाता हांढदै लागी ज़ुंण तेऊ खोज़ी,
तेऊ बणाणैं तम्हैं धरतीए मालक अर
तम्हां का जाणअ आपणीं आछी शुझुई कि कदुष्ट हुऐ बरैबाद।
मंऐं भाल़ै कदुष्ट मणछ ज़ुंण होरी हंता,
तिंयां बझ़ै पज़दी ज़ैगा बडै हरै बूटा ज़िहै!
पर बादा का ज़ांऊं हुंह तेस्सी बाती डेऊअ,
पर सह नांईं त तिधी आथी!
हुंह लागअ तेऊ ओर्ही-पोर्ही बी भाल़अ पर सह निं मुखा शुझुअ।
तिन्नां बाखा दैआ भाल़णीं ज़ुंण भलै अर मानदार आसा,
ज़ुंण मेल़-ज़ोल़ करना लै झ़ूरा, तिन्नां भेटा खिरी राम्बल़अ फल।
पर कदुष्ट पापी मणछ हआ पठी बरैबाद,
तिन्नें निं आद-लुआद बी रहणीं।
धर्मीं मणछा बच़ाऊआ बिधाता आप्पै,
खरीए पलका हआ सह तिन्नां लै पाक्कै गहल़ा ज़िहअ।
बिधाता करा तिन्नें मज़त,
सह हेरा तिन्नां कदुष्टा का बच़ाऊई,
किल्हैकि तिन्नैं हआ तेऊ सेटा शरण लई दी।
Source notes (2)
- Footnote तेऊ देशै कनान देशै ज़ेता दैणें बिधाता करार किई ती
- Footnote धरतीए मालक ज़ुंण बिधाता करार किई ती, तैहा ज़ैगे मालक
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.