Kulvi Outer Seraji Bible
भज़न 36
मणछो पाप अर परमेशरे भलाई
गाज़ै-बाज़ै आल़ेए सैणैं लै बिधाते च़ाकरी करनै आल़ै राज़ै दाबेदो भज़न
कदुष्ट मणछा निं बिधाते डअर हंदी,
तिन्नें दिलै हआ सिधी पाप करने सोठ।
तिंयां सोठा आपणैं बारै बेघै खास्सअ,
तिंयां सोठा आपणैं मन्नैं इहअ कि
बिधाता निं तिन्नें पाप शुझदै अर नां तिन्नां तेते सज़ा भेटणीं।
तिन्नें हआ गल्ला ई कदुष्ट अर झ़ुठी,
तिंयां निं कधू अक्ल अर भली गल्ला करदै ई आथी।
च़ैनैं सुत्ती बी हआ तिंयां बूरी बिक्री सोठदै लागै दै,
तिंयां निं भलअ सोठदै ई आथी,
तिंयां निं बूरै करनै का पिछ़ू हटदै ई आथी!
परमेशरे भलाई
हे बिधाता, तेरी झ़ूरी आसा पृथूई उझै स्वर्गै तैणीं,
तेरअ सत्त आसा सरगा का बी उझै तैणीं।
परमेशर, तेरअ धर्म आसा बडै पर्बता ज़िहअ,
तेरअ नसाफ आसा डुघै समुंदरा ज़िहअ।
मणछ अर सोभी ज़ीबे फाज़त करा तूह बिधाता ई।
तेरअ हाम्हां मणछा लै झ़ूरनअ आसा किम्मती खज़ानै ज़िहअ!
हाम्हैं लआ तेरै फैंखा हेठै शरण।
तूह दैआ हाम्हां लै आपणैं घअरा1 का रज्ज़ी खाणां लै,
तूह दैआ हाम्हां आपणीं भलाईए गाडा का रज्ज़ी झुटणा लै।
ज़िन्दगी दैणैं आल़ी सोबल़ आसा ताखा ई,
अर तेरै धुप्पै करै हआ हाम्हां सोभी लै प्रैश्शअ।
हे बिधाता, ज़ुंण ताल्है झ़ूरा, तिन्नां लै दै आपणीं झ़ूरी तरैल़ी करै,
ज़ुंण धर्मीं आसा तिन्नां लै कर भलअ।
घमंडी मणछ निं लोल़ी हाम्हां लै लात्तै बाही सकै,
नां तिन्नैं कदुष्ट मणछै हाम्हैं धाक्कै दैई दरल़ाऊऐ।
हे बिधाता, भाल़! कदुष्ट मणछ पल़ै ढेक्का,
तिंयां बधल़ुऐ उंधै अर ऐबै निं तिंयां भिई खल़ै उझ़णै जोगी रहै।
Source notes (1)
- Footnote घअरा भबना का
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.