Kulvi Outer Seraji Bible
भज़न 29
बिधातो बोल
राज़ै दाबेदो भज़न
हे स्वर्गे दूतो, परमेशर बिधाते ज़ै-ज़ैकार करा,
तेऊए महान प्रतप्पे अर महान ज़ोरे करा ज़ै-ज़ैकार।
बिधाते महान नाओंए करा ज़ै-ज़ैकार,
तेऊ महान पबित्र परमेशरा सेटा टेक्का माथअ।
बिधातो बोल शुण्हिंआं समुंदरा का
महान परमेशर छ़ाडा गुल़ूबिज़ल़ू ज़ेही छ़ेल़,
बिधाता रहा घणैं बादल़ा प्रैंदै।
बिधाते बैणा दी आसा महान बल अर
तेऊए बैणा दी आसा प्रतप्प।
बिधातो बैण दैआ केल़ुई बी ढोल़ी,
तेऊए बैणा करै चुटा लाबानोन बणें बडी-बडी केल़ुई बी।
बिधाते बला करै दैआ लाबानोन बडी धार बी बाछ़ू ज़िहै त्रुपल़ै,
सिर्योन धार दैआ बणें खारकै म्हैशै ज़ेही छ़ाहल़।
बिधाते बैणा का निखल़ा बिज़ल़ी अर बडै-बडै आगीए लुपल़ै।
तेऊए बैणा करै हआ उज़र रेगीस्तानै ज़ाज़री,
कादेश रेगीस्तान लागा बिधाते बैणा करै काम्बदअ।
ज़ांऊं बिधातो बैण शुण्हिंआं, हरनी जाआ छ़ेक्कै चूई,
बणैं बडै-बडै डाल़-बूटा का लागा पाच धरनीं अल़दै,
भबनै बोला सोभै मणछ, “बिधातो प्रतप्प, बिधातो प्रतप्प!”
प्रल़या करनै आल़ै पाणीं प्रैंदै लाआ बिधाता आपणीं राज़गाद्दी,
सह आसा इहअ राज़अ ज़हा सदा राज़ करनअ।
बिधाता दैआ आपणैं लोगा लै
बल, शांती अर बर्गत।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.