Kulvi Outer Seraji Bible
भज़न 28
बिधाता का अरज़
राज़ै दाबेदो भज़न
हे बिधाता, तूह ई आसा सह बडी टोल्ह ज़ेथ पिछ़ू हुंह शरण लआ।
हुंह पाआ ताह सेटा पकार।
मेरी लेर-पकार शुण! ज़ै तूह नांईं शुणें,
मुखा छ़ुटणीं छ़ाड़ संघा जाणअ हुंह मरी।
ज़ीबाण, मेरी प्राथणां अर मेरी लेर-पकार शुण कि हुंह मांगा ताखा मज़त,
हुंह फुआरा तेरै भबना बाखा आपणीं बाहा।
मुंह निं कदुष्ट मणछे संगती दी गणी,
तिंयां ज़ुंण कबध खटा अर
आपणैं साथी-संघी संघै गल्ला, करा तिंयां मिठी पर
दिलै डाहा तिंयां ज़ीद।
तिन्नां लै कर तिहअ बभार ज़ुंण तिन्नां लै हुअ लोल़ी,
ज़ुंण तिन्नैं कदुष्ट काम किऐ,
तेता लै दै तिन्नां लै सज़ा अर
तिन्नां लोल़ी तिन्नें पापो तिहअ ई फल भेटअ।
किल्हैकि तिंयां कदुष्ट मणछ निं ताह बिधाते महान कामां बाखा टेरअ बी भाल़दै कि
तंऐं किज़ै आसा किअ द!
ताह दैणीं ऐबै तिन्नां लै सज़ा अर
ताह करनै तिंयां सदा लै बरैबाद।
हे बिधाता, मुंह करनअ तेरअ शूकर
किल्हैकि तंऐं हेरी मेरी लेर-पकार शूणीं।
तूह बिधाता मुंह बच़ाऊंणै आल़अ अर
मुंह करनअ ताह ई प्रैंदै भरोस्सअ।
तंऐं किई मेरी मज़त, मुंह मनाऊंणी खुशी अर
गिहा बोली करनअ मुंह तेरअ शूकर।
हे बिधाता, तूह दैआ आपणैं लोगा लै बल,
ज़ुंण राज़अ तंऐं आप्पै छ़ांटअ तूह रहा तेऊ बच़ाऊंदअ अर फाज़त करदअ।
हे बिधाता, ज़ुंण लोग तेरै आपणैं आसा,
तिन्नां बच़ाऊ संघा दै तिन्नां लै बर्गत।
तिन्नें फाज़त कर तूह ई अर
तूह लोल़ी सारी सदा लै तिन्नों च़राऊंणै आल़अ फुआल रहअ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.