Kulvi Outer Seraji Bible
भज़न 126
छ़ुटकारै लै अरज़
हांढा लै गिह
ज़धू हाम्हैं बिधाता, एरुशलेम आपणीं नगरी बापस पजैल़ै,
सह ज़ाण्हुंअ हाम्हां का सुपनै ज़िहअ।1
हाम्हैं लाग हास्सदै खेल्हदै अर हाम्हां हुई नाच़णै जोगी खुशी!
तेखअ लागै होरी देशे लोग आप्पू मांझ़ै हाम्हां लै इहअ बोल्दै,
“बिधाता किऐ इना लै खास्सै बडै-बडै काम।”
हाँ, बिधाता किऐ हाम्हां लै बडै-बडै महान काम अर
हाम्हां आसा ऐहा गल्ले खुशी।
हे बिधाता, हाम्हैं करा ताखा अरज़ कि हाम्हां लै दै तूह भिई बर्गत2,
हाम्हैं लोल़ी दखण रेगीस्ताने बगदी गाडा ज़िहै हुऐ।
हे बिधाता, हाम्हैं ज़ुंणी लेरा लाई-लाई बऊअ,
तिन्नां लोल़ी खुशी दी ज़ै-ज़ैकार करदी लऊंणअ भेटअ।
बेज़ै बऊंदै डेऊंदी बारी लाई हाम्हैं लेरा,
पर ऐबै एछणअ हाम्हां गिहा-बाता लांदी फिरी,
ज़ांऊं हाम्हां नाज़े काशीए भर्टू आणनैं।3
Source notes (3)
- Footnote ज़ांऊं बिधाता हाम्हैं गलामी का आज़ाद करी सियोना लै बापस आणै, तेऊ किअ सियोन भिई खल़अ। सियोन आसा एरुशलेम नगरीओ दुजअ नाअं।
- Footnote भिई बर्गत हाम्हां आण गलामी का आज़ाद करी बापस फरेऊई
- Footnote ईंयां तै पोशा-माघे धैल़ै
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.