Kulvi Outer Seraji Bible
भज़न 105
बिधाता आसा शुचअ-पाक्कअ
(1 इतिहास 16:8-22)
बिधातो करा शूकर अर
सोभी का खोज़ा कि सह किहअ महान आसा,
देशा-देशे लोगा का खोज़ा कि तेऊ किज़ै-किज़ै आसा किअ द।
बिधाते ज़ै-ज़ैकार करना लै बोला गिहा!
तेऊ ज़ुंण महान नुआहरै काम किऐ, तेता खोज़ा सोभी का।
खुश हआ कि हाम्हैं आसा तेऊ बिधाते,
तेऊए सोभै भगत रहा नंद।
मज़त मांगा बिधाता का,
कबल्लै रहणअ तेऊए ज़ै-ज़ैकार करदै लागी।
आबरामे लुआद, तम्हैं ज़ुंण तेऊए च़ाकरी करा,
याकबे लुआद, ज़ुंण तेऊ छ़ांटै दै आसा,
तम्हैं करा तिन्नां च़मत्कारा आद ज़ुंण तेऊ रहैऊऐ,
तेता बी करा आद ज़ुंण तेऊ नसाफ किअ।
सह बिधाता ई आसा म्हारअ परमेशर,
तेऊओ नसाफ आसा सारै संसारा लै।
सह डाहा आपणीं करार सदा लै अटल़,
ज़ुंण तेऊ ज़बान दैनी, सह रहा हज़ारो पोस्ती तैणीं।
ज़ुंण करार तेऊ आबराम, इसहाका संघै किई अर
ज़ुंण ज़बान तेऊ याकबा लै दैनी सह आसा अटल़।
बिधाता दैनअ याकबे आद-लुआदा लै बधान,
तेऊ किई इज़राईली संघै अटल़ करार।
तेऊ बोलअ त इहअ, “मुंह दैणीं तम्हां लै कनान देशे ज़ैगा,
तैहा ज़ैगे मालक हणैं तम्हैं सदा लै।”
तधू तै तिंयां परमेशरे लोग धख ज़िहै मणछ,
अर कनान देशै तै तिंयां पाखलै।
तिंयां रहा तै देशै-देशै हांढदै लागी,
एकी मुल्खा का दुजै मुल्खै।
पर बिधाता निं तिन्नां कोही मणछा हंतणैं दैनअ,
तिन्नें फाज़त करना लै नैरा त बिधाता राज़ै इहअ बोली,
“मेरी छ़ांटी दी परज़ा निं छ़ुंहीं छ़ेल़ी आथी,
नां मेरै गूर-पज़ैरै लै हान्नी करी।”
तेखअ छ़ाडअ बिधाता तेऊ देशा लै नकाल़ अर
तेऊ देशा का किअ नाज़-पाणीं दूर।
पर तेऊ छ़ाडअ युसुफ नाओं मणछ तिन्नां का आजू ज़ुंण
गलाम हणां लै बेच़ी पाअ त।
सह डाहअ शांघल़ी दी बान्हीं,
हाथै, खूरै अर गल़ा का थिअ सह लोहे कल़ोलै करै बान्हअ द।
सह रहअ तेभै तैणीं गलाम कैदी, ज़ेभै तैणीं तेऊए आप्पै बोली दी गल्ला पूरी निं हुई,
बिधाता परखअ सह राम्बल़ै करै कि सह आसा भलअ।
मिसर देशे राज़ै छ़ाडै तेऊ सेटा आपणैं दूत,
संघा किअ सह आज़ाद।
राज़ै बणाअं युसुफ सारै देशा प्रैंदै मालक,
तेऊ लै दैनअ सारै मिसर देशो राज़।
सारै बज़ीर अर कार करिंदै प्रैंदै हक बी दैनअ तेऊ लै,
सोभी बज़ीरा प्रैंदै सैणअ बी बणाअं सह कि सह तिन्नां लै सलाह दैए।
पिछ़ू पजैल़अ बिधाता याकब बी मिसर देशै,
संघा बस्सअ इज़राईल तेऊ देशै परदेसी ज़िहअ।
बिधाता दैनी तिन्नां लै खास्सी बर्गत अर तिन्नें हुई खास्सी आद-लुआद,
तिंयां हुऐ खास्सै अर तिन्नें दुशमणा का खास्सै बलबान।
बिधाता किहअ इहअ कि मिसरी लोग लागै तेऊए परज़ा संघै ज़ीद डाहंदै,
तिंयां लागै बिधाते च़ाकरी करनै आल़ै संघै छ़ल़-कपट करदै।
तेखअ छ़ाडै बिधाता मोसा अर हारण
ज़ुंण बिधाता छ़ांटै दै थिऐ।
तिन्नैं किऐ मिसरी लोगा जैंदरी डेऊई बडै नुआहरै-नुआहरै काम,
अर तिन्नैं रहैऊऐ तिधी बिधाते कई च़मत्कार।
बिधाता छ़ाडअ तेऊ देशा लै घोर न्हैरअ,
पर मिसरी लोग निस्सै तज़ी बी बिधाते गल्ला मनी।
परमेशरै किई तेऊ देशे पाणींए गाडा नाल़ी बी लोहू आल़ी अर
म्हाछ़ली मूंईं पठी।
सारअ देश भरअ मिंडकै करै,
राज़े मैहलै बी भर्हुऐ मिंडकै।
ज़ांऊं परमेशरै हुकम किअ सारअ देश भर्हुअ डगैछै करै,
अर सारै देशै पल़ी कतूआ।
बिधाता बरशाऊऐ पाणींए बदल़ै तिन्नां लै सारै देशै बडै-बडै शरू,
ज़ैगै-ज़ैगै पल़ी तिन्नां लै बीज।
बिधाता किऐ तिन्नें फेडू अर दाखे बाग बरैबाद,
सारै देशै पाऐ डाल़-बूट चोल़ी।
ज़ांऊं तेऊ हुकम किअ, सारअ देश भर्हुअ रैट्टै करै,
तिन्नां किल़ै निं कुंण गणी सकदअ त।
तिन्नैं रैट्टै कोक्करी सारै डाल़-बूट,
नाज़ अर सारी साल-फसल।
खिरी पाऐ परमेशरै मिसर देशे सारै मारी,
मिसरीओ निं एक घअर बी छ़ुटअ ज़ेथ ज़ेठअ निं मूंअ।
तेखअ किऐ बिधाता इज़राईली मिसर देशे गलामी का आज़ाद,
तिन्नैं निंयं आप्पू संघै खास्सअ सुन्नअ-च़ंदी बी,
तिंयां थिऐ सोभै ज़ण्हैं ताज़ै-नरोगै।
इज़राईली मिसर देशा का डेऊंदै भाल़ी हुऐ मिसरी लोग खुश,
किल्हैकि तिन्नें दिलै ती इज़राईलीए डअर पल़ी दी।
धैल़ी डाहा त बिधाता इज़राईली आजू-आजू प्रैंदै बादल़ अर
राची हांढणा लै डाह त तिन्नां लै बडअ आगीओ कूंड ताकि तिन्नां लै प्रैश्शअ होए।
ज़ांऊं इज़राईली पकार पाई, परमेशरै दैनी तिन्नां लै समुंदरी होछ़ै-होछ़ै च़ेल्लूए शिखा अर
तेऊ रज़ैऊऐ तिंयां स्वर्गा का खाण दैई करै।
बिधाता काढअ तिन्नां लै शुक्की टोल्हा का पाणीं,
तेते लागी शुक्कै रेगीस्तानै गाड बगदी।
परमेशरै डाही आपणीं पबित्र करार आद
ज़ुंण तेऊ आपणैं दास आबरामा संघै थिई किई दी।
तेऊ नढैऊई आपणीं छ़ांटी दी परज़ा आजू आप्पै,
इज़राईली निखल़ै गिहा अर ज़ै-ज़ैकार करदी गलामी का दूर।
ज़ेऊ देशै पराई ज़ातीए लोग तै बस्सै दै, सह ज़ैगा दैनी तेऊ इज़राईली लै,
तेऊ दैनअ तिन्नां तैहा ज़ैगा पठी गिम्मणै।
तेऊ किअ इहअ तै कि तिंयां तेऊए बधाने साबै आपणीं ज़िन्दगी ज़िऊए अर
तेऊए सोभै हुकम आपणैं दिलै आद डाहे।
बिधाते लोल़ी सदा ज़ै-ज़ैकार हुई।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.