Kulvi Outer Seraji Bible
भज़न 104
रच़ना करनै आल़ै बिधाते स्तोती
ए मेरै मन्नां बिधाते ज़ै-ज़ैकार कर,
हे बिधाता, मेरै परमेशर, तूह भाल़ किहअ महान आसा!
तंऐं आसा महान राज़ अर प्रतप्पे झिकल़ै बान्हैं दै।
प्रैश्शअ आसा तंऐं आप्पू फेर च़ादरू ज़िहअ पल़ेटअ द,
तंऐं आसा सरग खिम्भा ज़िहअ छ़ैअ द।
तंऐं आसा आपणैं घअरे थाम्ह नथहऐ पाणीं प्रैंदै टकैल़ै दै।
बादल़ आसा ताल्है तेरै रथा ज़िहै,
बागरी आसा तेते फैंख ज़ेथ तूह शुंआर हआ।
तेरै दूत आसा पऊंण, तेरै दास आसा बिज़ल़ी।
तंऐं आसा पृथूई पाक्की आथरी दी टकैल़ी डाही दी,
तै निं तैहा ज़ैगा का ओर्ही-पोर्ही सिक्कदी।
तंऐं छ़ैअ तेथ प्रैंदै समुंदर झिकल़ै ज़िहअ,
उछ़टै पर्बता प्रैंदै बी पजैल़अ तंऐं सह पाणीं।
तेरी एकी झांशा शूणीं लागा पाणीं ठुहर्दअ!
तेरै बैणा शूणीं लागा सह ज़ोरै बगदअ।
उछ़टी धारा का होथा सह पाणीं खागै-खागै बाती तैहा ज़ैगा लै
ज़ुंण तंऐं तेता लै बणाईं दी आसा।
तेखअ आसा तंऐं तेता लै सिअं डाही दी अर तैहा सिऊंआं निं सह लंघदअ,
नां सह सारी धरती प्रैंदै भर्हदअ।
तंऐं बहाऊऐ खागै-खागै पाणींए छ़ो,
तेते गाड बगा धारा जैंदरी बाती उंधै।
तेऊ पाणीं झुटा सऊंऐं मुल्खै पुजी सोभै ज़ीब,
बणें नचिशै गाधै बी शेऊआ तेता झुटी आपणीं चिश।
तिन्नां गाडे बाढै लागै दै डाल़ा-बूटा दी बणाआं
च़ेल्लू-पखीरू आप्पू रहणा लै कोल्ह संघा रहा गिहा बोल्दै लागी।
उछ़टी-उछ़टी धारा भेऊआ तूह सरगा का पाणीं दैई करै,
तेरी बर्गता करै हअ सारी पृथूई हरी भरी।
पशू लै पज़ेरा तूह घाह अर
मणछा लै पज़ेरा तूह नाज़ अर डाल़ै-बूटै फल़,
ताकि हाम्हैं साल-फसल बओए अर
दाखो रस काढे ज़ेते हाम्हां मौज़ लागा,
घेरी लै जैतूनो तेल ज़ेता करै खुशी भेटा अर
देही लै नाज़ ज़ेता करै ज़ोर-ज़ाहण एछा।
लाबानोन धारे बणैं केल़ुई लै रहा सरग हंदअ लागी,
तिंयां आसा बिधाते आपणैं बूट ज़ुंण तेऊ आप्पै आसा रोहै दै।
तिन्नां केल़ुई दी बणाआं च़ेल्ली आपणैं कोल्ह,
सारस च़ेल्लू करा कैलीए डाल़ै बसेरअ।
बण बाकरै रहा उछ़टी ज़ोता,
नऊल़ै मुश्शै लुक्का भिल़ी दी शाफल़े संधा दी।
तंऐं बणाईं ज़ोथ ताकि हाम्हां सोभी ऋतो थोघ लागे,
सुरज़ा का हआ थोघ कि केभै लागा डुबणअ,
तंऐं बणाईं राच अर तेथ हआ न्हैरअ,
ताकि बणें ज़ीब राची हांढी फिरी सके।
खारकै सिह लागा शकार करना लै क्रुंगदै,
तूह परमेशर दैआ तिन्नां लै बी खाणां लै।
दोत्ती धैल़अ निखल़णैं का आजी जाआ तिंयां
आपणीं जुहल़ी लै फिरी डेऊई संघा करा तिधी राम।
तेखअ डेओआ मणछ आपणैं कामां-काज़ा लै,
तिंयां रहा सान्हां तैणीं मैन्थ करदै लागी।
हे बिधाता, तंऐं बणाईं खास्सी च़िज़ा, तेता निं कुंण गणी सकदअ!
ईंयां सोभै गल्ला भाल़ तंऐं केही अक्ली करै बणाईं!
सारी पृथूई आसा तिन्नां च़िज़ा करै भरी ज़ुंण तंऐं आसा बणाईं दी।
समुंदर आसा बेघै बडअ अर बिरलअ,
तेथ आसा पाणीं जैंदरी हांढणै-फिरनैं आल़ै एतरै ज़ीब, तिन्नां निं कुंण गणी सकदअ,
होछ़ै-होछ़ै ज़ीबा उझै बडै-बडै ज़ीबा करै आसा सह भरी।
समुंदरे पाणीं प्रैंदै रहा ज़हाज़ एछदै डेऊंदै लागी,
लिबतान नाओं समुंदरो बडअ ज़ीब बी आसा तंऐं ई बणाअं द।
ईंयां सोभै रहा तेरै ई आसरै कि
ज़ेभै तिन्नां लोल़ी तेभै तिन्नां लै खाणां लै दैए।
तूह दैआ सोभी लै आप्पै खाणां लै,
ज़ुंण तूह तिन्नां लै दैआ, तेता खाआ तिंयां रज्ज़ी।
ज़ेभै तूह तिन्नां बाखा पिठ फरेऊआ, तेभै पल़ा तिन्नां हैल़अ फिकर,
ज़ांऊं तूह तिन्नों शाह पोर्ही काढा, तेखअ मरा तिंयां
संघा डेओआ तिंयां माट्टै जैंदरी फिरी ज़ेता का तंऐं तिंयां बणाऐं दै आसा।
पर ज़ांऊं तूह तिन्नां लै आपणअ शाह1 दैआ, तेखअ बणाआं तूह तिहै भिई,
संघा दैआ तूह पृथूई लै नऊंईं ज़िन्दगी।
हे बिधाता, तेरअ प्रतप्प लोल़ी सारी सदा रहअ!
तूह लोल़ी आपणैं कामां भाल़ी सदा खुशी हुअ।
ज़ांऊं तूह भाल़अ लागा, पृथूई छ़ुटा काम्मणीं,
ज़ांऊं तूह बडै-बडै पर्बता छ़ुंहां, तेता का लागा धूँ निखल़दअ।
हे बिधाता, मुंह बोल़णीं सारी अमरा तेरी ज़ै-ज़ैकारे गिहा,
ज़ेभै तैणीं हुंह ज़िऊंदअ रहे, तेभै तैणीं रहणअ मुंह तेरै भज़न बोल्दै लागी।
तूह लोल़ी त मेरी सोठ अर गिहा करै खुश हुअ,
किल्हैकि मुल्है खुशी एछा ताखा ई।
पापी मणछ लोल़ी तै धरती का पठी खतम हुऐ,
कदुष्ट मणछ निं लोल़ी तै रहै ई आथी।
ए मेरै मन्नां बिधाते ज़ै-ज़ैकार कर,
बिधाते ज़ै-ज़ैकार करा।
Source notes (1)
- Footnote शाह आत्मां
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.