Kulvi Outer Seraji Bible
सैणीं गल्ला 27
काल्ला धैल़ी किज़ै हणअ तेते बारै निं बोली सकदै
काल्ला धैल़ीए बारै निं सेखी फणाटणी,
तम्हां का निं थोघै कि काल्ला धैल़ी किज़ै हणअ!1
तम्हैं निं आपणीं सर्राफी आप्पू करी,
थारी सर्राफी लोल़ी होरी किई तैहा गल्ले हआ बड़ैई।
ज़ुंण आफ़त ऐडअ मणछ पाआ, तेतो बोझ़अ हआ
पात्थर अर रेते बोझ़ै का गर्कअ।
रोश्शा आल़अ मणछ हआ बेघै बूरअ पर
ज़ुंण ज़ीद-मिश डाहा, सह मणछ हआ होर बी खास्सअ कदुष्ट।
ज़ुंण तम्हां लै असली झ़ूरी डाहा,
सह नैरा-समझ़ाऊआ मुंहैं बोली।
साथी-संघी सका तम्हां लै काठअ बी बोली, सह आसा तम्हां लै भलअ,
पर दुशमण ज़ै तम्हां लै मल़्हैची दैए, तेतो डाहै धैन!
रज्ज़ी करै ज़ाण्हिंआं मखीर बी ल़क्कअ,
पर भुखै पेटै ज़ाण्हिंआं कल़ुई च़िज़ा बी मिठी।
ज़ुंण आपणैं घअरा का दूर हआ,
सह हआ तैहा च़ेल्ली ज़िहअ ज़ुंण आपणैं कोल्हा का दूर हआ।
ज़ेही धूपे शोभली बास्स बधिया लागा,
तिहअ ई हआ असली साथी करै दिल खुश।
आपणैं अर आपणैं बाबे साथी-संघी डाहणैं सदा आद।
नां खरीए पलका आपणैं नातै-रिश्तैदारा का मज़त मांगणी,
किल्हैकि ज़िधी नेल़ रहणैं आल़अ साथी-संघी लागा,
तिधी निं दूर रहणैं आल़ै रिश्तैदार कामैं एछदै।
लान्हैंओ, अक्ल करा, तै रहणैं तम्हैं खुश,
तै सका हुंह तिन्नां लै ज़बाब दैई ज़ुंण मेरी निंदा करा।
ज़हा सोर-समझ़ हुई सह मणछ हेरा ज़ाणीं कि आफ़त च़ाल्ली पल़ी अर सह जाआ चतैन हई,
पर ऐडअ मणछ डेओआ आजू तैहा ई आफ़ता जैंदरी।
ज़ुंण कहा पाखलै मणछे ऋणा भरने ज़मानती लआ,
तेऊ का लणअ किज़ै नां किज़ै बांधअ ज़रूर ढाकी।
दोत्ती-दोत्थी ज़ोरै हाक्का पाई बर्गत बी हआ
तेऊए साथी-संघी लै फिटका ज़ेही।
ज़ुंण बेटल़ी कबल्ली कांग डाहा लाई,
छ़ाप्परा का लागी दी च़ोई ज़ेही।
बागरी रोक्कणी अर खाणैं हाथा प्रैंदै तेल ढाकणअ आसा
झ़गल़खोर बेटल़ी रोक्कणै का सान।
ज़िहअ लोहअ ई लोहै तिछै करा,
तेही दैआ साथी-संघी एकी-दुजै लै अक्ल।
ज़ुंण फेडूए बूटे फाज़त करा, सह खाआ तेते फल़ बी,
अर ज़ुंण आपणैं गूरूए च़ाकरी करा, तेऊए हआ आपणीं बी मशूरी।
ज़िहअ मणछा पाणीं दी आपणअ ई मुंह शुझिआ,
तिहअ ई लागा थारै मन्नें सोठा करै थोघ कि तम्हैं किहै आसा।
मणछे आछी हआ जम्परी ज़ेही,
तिंयां निं केही बी रज़दी।
ज़िहअ सुन्नैं अर च़ंदी आरनैं आगी दी परखा,
तेही हआ मणछे बभारे बी परख।
ज़ै तम्हैं ऐडै मणछा च़िक्की करै मरदै बी डाहे पाई,
तैबी बी निं तिन्नें कबुध तम्हैं मारी सकदै।
आपणैं डागै-चैणें हेल़्हीओ डाहणअ
राम्बल़अ धैन-खैल,
धन-माया निं सदा रहंदी,
नां सदा राज़ रहंदअ बणी।
ज़ेतरी घैहणींओ घाह लऊई निं छ़ेक्कअ,
तेतरी जाआ सह भिई टिप्पदअ लागी।
तम्हैं सका गाभू, छ़ेल्हू बेच़ी
आप्पू लै झिकल़ै अर ज़िम्मीं मोल लई।
बाकी ज़ुंण भेडा-बाकरी रहणीं, तिन्नें दुध-घिऊ करै सका तम्हैं आपणैं टबर धाची,
अर थारै दास-दासीओ ज़िऊंण बी हणअ सह ई।
Source notes (1)
- Cross-reference याक. 4:13-14
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.