Kulvi Outer Seraji Bible
सैणीं गल्ला 26
ऐडै निं हआ
ज़िहअ ज़ेठै-शाहल़ै हिंअं अर लऊंणींए बगती सरग हणअ,
तेही ई हआ ऐडै मणछे बड़ैई करनी।
ज़ै तम्हैं किछ़ै निं किअ, तै डेओआ फिटक बी
हिंऊंल़ी च़ेल्लीए छ़ुंढा ज़िहअ प्रैंदी पोर्ही।
घोल़ै सदेरना लै लागा नकेल अर गाधै लै मुर्क लाणीं
पर ऐडै मणछे पिठी लागा डांगै बाहणीं।
ऐडै मणछे ऐडै सुआलो ज़बाब दैई निं
तम्हैं बी ऐडै ज़िहै हई।
पर तिन्नां लै दैणअ ऐडे साबै ज़बाब,
ताकि ज़ुंणी सह सुआल पुछ़अ, तेऊ का ज़ाण्हिंए कि तेऊ किई सह ऐडी गल्ल।
ज़ुंण समादा पजैल़ै कहा ऐडै मणछा छ़ाडा,
सह गल्ल आसा आपणीं ज़ांघा आप्पै खराल़ै बाहणीं अर बिश खाणैं ज़ेही गल्ल।
ऐडै मणछे खाखा का सैणीं गल्ल हआ
लाट्टै मणछे लाट्टी ज़ांघा ज़ेही।
ऐडै मणछो अदर करनअ हआ
टोल्हा लै पात्थरै बाहणैं ज़िहअ बृथा।1
ऐडै मणछै बोली दी सैणीं गल्ल हआ
शराबी मणछे हाथै खुभै दै कांडै ज़ेही।
एछदै डेऊंदै अर ऐडै मणछ कामां दी लाणैं हआ इहै,
ज़िहअ कुंण थोघै बाझ़ी पाआ सोभी कतीरा करै मारी।
ऐडै मणछे सह ई ऐडी गल्ल दुजी बारी करनी हआ तेही
ज़िहअ कुक्कर आपणीं हुकरी करै तेता च़ाटदअ भिई डेओआ।
ज़ुंण आपणीं सर्राफी आप्पू करा कि सह आसा छ़ल़ैघ,
तिहै मणछा का राम्बल़अ हआ ऐडअ मणछ।
ज़हा मणछा ज़ैंईं हअ लागी दी,
सह बोला इहअ, “बागै आसा सिह, बाता सका सिह भेटी!”
ज़ैऊंकर मणछ रहा दुआरे कूरू ज़िहअ
पाशल़ी बधल़दअ लागी।
कई मणछा हआ एतरी ज़ैंईं कि
मुंहां सेटा थाल़ू का बी निं तिंयां म्हार खाखा पाई सकदै।
ज़ैऊंकर मणछ सोठा आप्पू लै इहअ कि
सह सका सोभी का राम्बल़ी सलाह दैई।
बाता हांढदी होरीए झ़गल़ै मांझ़ै डेऊणअ आसा
तेऊ मणछा ज़िहअ ज़ुंण कुक्करो कान घिशा।
ज़ुंण आपणैं साथी-संघी लै धोखअ करी बादा का इहअ बोला, “हुंह त आर्ही लागअ द।”
सह आसा इहै बेगरै मणछा ज़िहअ ज़ुंण दाच-खराल़ै दैआ बाही।
ज़ै गेठै झ़ुका मुक्की, तै हिठा आग बी
अर ज़िधी घैंचल़ करनै आल़ै निं होए, तिधी हआ झ़गल़ै खतम।
ज़ेही नारा दी आग अर झ़ुका करै आग रहा ज़ल़दी,
तिहअ ई निं झ़गल़खोर मणछ झ़गल़अ हिठणै दैंदअ।
घैंचल़ शुणने लागा मखीरा खाणैं ज़ेही मिठ,
तिंयां गल्ला पेटै हाज़म बी जाआ हई।
कदुष्ट मणछे खाखा का झणैल़ू बोल हआ,
तेऊ माट्टे भांडै ज़िहै ज़ुंण बागा का च़ंदी करै हआ महल़अ द।
ज़ुंण दुशमण बागा का भोल़अ फिरा,
तेऊ हआ मन्नैं ज़ीद ई डाही दी।
तेऊए मिठी गल्लो कतैर निं करी,
सह हआ भितरा का छ़ल़-कपटा करै भरी।
सह च़ाऐ ज़ेतरअ बी टवारअ करे पर
तेऊए कदुष्ट काम जाणैं आम झाल़ै दी सोभी का शुझुई।
ज़ुंण होरी लै खण्हां, तेऊ लै भेटा खण्हअ द,
ज़ुंण होरी लै पात्थर शोटा,
तेऊ लै ढूल़ा आप्पू प्रैंदै ढेक।
ज़ुंण कहा झ़ुठी गल्ला करै मोहा, सह डाहा तेऊ लै ज़ीद
अर च़ोपल़ लाई गल्ला करनै आल़अ करा बरैबादी ई।
Source notes (1)
- Cross-reference 2 पत. 2:20-22
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.