Kulvi Outer Seraji Bible
सैणीं गल्ला 2
अक्लीओ फल
लान्हैंओ, ज़ुंण हुंह बोला तेता डाहा आद
अर मेरै बैण डाहा आपणैं दिलै च़की।
ऐहा गल्ला शिखल़ा कि अक्ल किज़ै आसा
अर एता दैआ समझ़णीं।
बिधाता सेटा करा अरज़ कि सह
सोर-समझ़ दैए।
तेता लोल़णा लै करा एही मैन्थ,
ज़िहअ कि तम्हैं आसा होए सुन्नैं-च़ंदी
या गुप्त खज़ानै लोल़ै लागै दै।
ज़ै तम्हैं इहअ करे तै लागणअ
तम्हां बिधाते बारै
अर तेऊओ अदर करने बारै थोघ।
किल्हैकि अक्ल दैआ सह बिधाता ई,
अर समझ़-बुध बी दैआ सह ई।
ज़ुंण मणछ मानदार अर धर्मीं आसा,
सह करा तिन्नें मज़त अर फाज़त।
सह बिधाता फिरा तिन्नां बाखा ज़ुंण शुची पांच़ी करा,
अर आपणैं भगते करा सह हेर-सभाल़।
अक्ली करै लागणअ तम्हां का थोघ कि
धर्म, भलाई अर मानदारी किज़ै आसा।
किल्हैकि अक्ल करा थारै मन्नां बशै,
अर तेखअ हणैं ज्ञैन पाई खास्सै खुश।
सुंबल़ी सोर-समझ़ा करनी
थारी फाज़त।
ताकि तम्हैं कबध खटणै का दूर रहे,
अर शल़ैघा घल़णै आल़ै अर उंबल़ी गल्ला करनै आल़ै
मणछा का बच़ी रहे।
ज़ुंण मणछ धर्मीं ज़िन्दगी छ़ाडी
पापे न्हैरै दी ज़िऊआ,
ज़ुंण कबध करना लै झ़ूरा
अर ज़ुंण कबल्लअ कदुष्ट उंबल़ी गल्ला लै झ़ूरा,
ज़सरै च़ाल-च़लण ठीक निं आथी
अर ज़सरअ भरोस्सअ निं करी सकदै।
अक्ल अर कंज़रैई का दूर
सोर अर अक्ली करै बच़णैं तम्हैं पराई बेटल़ी का
ज़ुंण लोभणैं आल़ी गल्ला करा अर
ज़ुंण आपणैं मर्धा लै धोखअ दैआ,
सह चोल़ा बैहे तैहा करारा ज़ुंण
तैहा परमेशर सोह खाई बैहे धैल़ी किई ती।
एही बेटल़ीए घअरा बाखा डेऊणअ हआ मौते बाता डेऊणैं ज़िहअ,
अर तिधी पुजणअ हआ मूंऐं दै मणछे न्हैरै संसार जम्परी डेऊणअ।
एही बेटल़ी सेटा डेऊई निं आझ़ तैणीं कोहै बापस फिरअ,
अर नां सह मणछ ज़िन्दगीए बाता बापस फिरअ।
तम्हैं ज़िऊऐ धर्मीं ज़िन्दगी,
अर तैहा बाता बी निं छ़ाडी ज़ेथ धर्मीं मणछ हांढा।
किल्हैकि धर्मीं अर नर्दोश मणछ ई रहणैं
आपणैं देशै बस्सी।
पर कदुष्ट अर धोखै दैणैं आल़ै मणछ करनै,
तेऊ देशा का बिधाता दूर।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.