Kulvi Outer Seraji Bible
सैणीं गल्ला 1
अक्ली एछणेंओ मूल़
ईंयां सैणीं गल्ला आसा इज़राईल मुल्खे राज़ै दाबेदे शोहरू राज़ै सुलैमाने:
ज़ुंण इना गल्ला पहल़े, तिन्नां एछणी अक्ल, सबर
अर तिन्नां समझ़णीं ईंयां सैणीं गल्ला राम्बल़ै करै।
एता करै लागणअ तिन्नां का थोघ कि
किहअ करै लागा सुंबल़ी सोर डाही ज़िन्दगी ज़िऊंणीं,
अर एता करै लागणअ तिन्नां का थोघ कि धर्म, नसाफ
अर मानदारी किज़ै आसा।
एता का सका आम मणछ बी शिखल़ी कि
छ़ल़ैघ किहअ करै हणअ,
खारकअ मणछ सका एता का ज्ञैन अर सुंबल़ी सोर शिखल़ी।
इना सैणीं गल्ला करै एछणी अक्ली आल़ै मणछा होर बी खास्सी अक्ल
अर छ़ल़ैघ मणछ समझ़णअ
सैणीं गल्लो, कहाबतो अर
समझ़कार मणछै खोज़ी दी गल्लो गुप्त भेद।
खारकै लै सलाह
बिधाते डरा हेठै रही एछा अक्ल,
कबुधी मणछ निं अक्लीओ अदर करदै
अर नां तिंयां शिखल़दै।
लान्हैंओ, आपणैं ईजा-बाबे शिक्षा दी दैआ धैन कि
तिंयां तम्हां लै किज़ै बोला,
तिन्नें शिक्षा हणीं तम्हां लै मुंडे मुगट
अर गल़े कंठी ज़ेही।
लान्हैंओ, पापी मणछे ज़ाणैं निं लागी
नां तिन्नें गल्ला मनी। तिंयां सका तम्हां लै इहअ बोली,
“एछा हाम्हां रहणअ कहा मारदै ताखुई!
एछा, हाम्हां गोटणअ कुंण नर्दोश मणछ सुहांगा लै!
च़ाल्ला, ज़ुंण राम्बल़ै खांदै-ज़िऊंदै आसा
तिंयां डाहणैं हाम्हां एकी बारी सोभै मरदै पाई।
हाम्हां लुटणीं जुध करी भांती-भांतीए किम्मती च़िज़ा
अर तेता करै करनै हाम्हां आपणैं घअर भरी।
ज़ै तम्हैं म्हारै छ़ुंढा दी एछे,
तै भेटणीं तम्हां बी तैहा च़ोरी दी साझ़।”
लान्हैंओ, इना इहै मणछे संगत निं करी
इना इहै का रहै बच़दै।
ईंयां इहै मणछ डेओआ कबध खटणा लै ठुर्ही
अर हत्या करना लै निखल़ा ईंयां सोभी का आजू।
ज़ुंण च़ेल्लू ढाकणअ,
तेऊ नदरी ज़ज़ाल़ फुआरनअ हआ बृथा
पर ईंयां इहै मणछ बूणा आप्पू लै आप्पै ज़ज़ाल़
इहअ ज़ज़ाल़ ज़ेथ तिंयां आप्पू मरा।
दुजै लुटणैं आल़ेए लागा एकी धैल़ी आपणीं ज़ान
किल्हैकि ज़ुंण होरी लै खण्हां,
तेऊ लै हआ खण्हीं डाही दी।
अक्ल बोला इहअ
शूणां, अक्ल आसा हाट्टा-बज़ारा का
बेटल़ी ज़ेही हाक्का लांदी लागी दी,
नगरीए प्रऊल़ी सेटा
ज़िधी लोगो झाल़अ हआ,
तिधी पाई तैहा ज़ोरै-ज़ोरै एही हाक्का,
“हे ऐडै मणछो! तम्हैं कधू तैणीं रहणैं इहै ऐडै?
तम्हां कधू तैणीं रहणअ
ज्ञैन शास्त्रे सुहांगा करदै लागी?
तम्हां कधू शिखल़णअ?
अज़ी बी शूणां मेरी गल्ल,
हुंह आसा लागी दी तम्हां नैरदी,
हुंह खोज़ूं तम्हां का असली ज्ञैन,
मंऐं निं लाऐ तम्हैं कबाता पाई।
हुंह थिई लागी दी तम्हां लै हाक्का लांदी,
बाहा फुआरी ओर्ही शाददी, पर तम्हैं नां शूणअ नां धैन दैनअ।
तम्हैं पाऐ मेरै बैण ई बृथा,
मेरी नैरी-समझ़ाऊई बी निं तम्हैं धैन दैनअ।
ऐबै ज़ै तम्हां लै आफ़त एछे,
तेभै करनअ मुंह बी थारअ सुहांग।
तम्हां लै एछणी ढिश-बागरी ज़ेही डअर,
आफ़त एछणी तम्हां लै कुरलू बागरी ज़ेही
अर तम्हां एछणी गल़ै तैणीं घाटी,
तेभै करनअ मुंह थारअ सुहांग।
तेभै लाणीं तम्हां मुल्है हाक्का कि
हुंह थारी मज़त करे,
पर हुंह निं तेभै तम्हां लै किछ़ै करी सकदी
तम्हैं हणैं तेभै सारै दी मुंह लोल़ै लागै दै
पर हुंह निं तम्हां भेटणीं।
किल्हैकि तम्हैं डाही अक्ली संघै ज़ीद,
अर बिधातो अदर करनअ समझ़अ तम्हैं बृथा।
तम्हैं निं मेरी सलाह मनी
अर ज़ेभै मंऐं तम्हैं नैरै, तेभै निं तम्हैं धैन दैनअ।
तेभै लागणअ तम्हां आपणैं कर्मो फल भुगतणअ
अर ज़ुंण तम्हैं किअ, तेता करै हणीं तम्हां आप्पू ई फाही।
नज्ञैनै मणछ मरनै कबाता पेशी,
किल्हैकि तिन्नैं समझ़ी अक्ल बृथा।
ऐडै मणछ बी हणैं बरैबाद
किल्हैकि तिंयां रहै निहंचै बेशी।
पर ज़ुंण मेरी गल्ला शुणें तिंयां रहणैं राज्ज़ी-राम्बल़ै निहंचै।
तिन्नां निं आफ़ता का डरने ज़रुरत आथी।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.