Kulvi Outer Seraji Bible
फलिप्पी 1:6
Verse 6 is marked below, with the whole chapter around it. Read from the start
अह च़िठी आसा पल़सी अर तिमोथी बाखा ज़ुंण मसीहा ईशूए दास आसा।
हुंह लिखा एता फलिप्पी नगरी रहणैं आल़ै सोभी पबित्र लोग अर टोलीए सोभी सैणैं अर दासा लै।
म्हारै बाब परमेशर अर प्रभू ईशू मसीहा का आसा मेरी एही अरज़ कि तम्हां सोभी लोल़ी झींण अर शांती सदा हुई।
पल़सीए प्राथणां अर शूकर
ज़ेभै-ज़ेभै मुंह थारी आद एछा, तेभै-तेभै करा हुंह तम्हां लै परमेशरो शूकर। ज़ेभै बी तम्हां लै हुंह प्राथणां करा, हुंह करा हर बगत नंद अर खुशी संघै एही अरज़ कि तम्हैं आसा पैहलै ओर्ही आझ़ तैणीं ईशू मसीहे बारै खुशीए समादा हर ज़ैगा खोज़णा लै मुंह संघै मेरै साझ़ू। मुंह आसा ऐहा गल्लो भरोस्सअ कि ज़ुंणी परमेशरै तम्हां दी बधिया काम करनअ शुरू किअ, तेऊ ई करनअ सह ईशू मसीहे फिरी एछणें धैल़ी तैणीं पूरअ।
मेरअ तम्हां लै इहअ सोठणअ आसा भलअ, किल्हैकि तम्हैं आसा मेरै मन्नैं बस्सै दै अर मेरी कैद खानै अर खुशीए समादा लै ज़बाब अर सबूत दैणा लै मुंह संघै जशा दी साझ़ू। ऐहा गल्ला ज़ाणा परमेशर ई कि मुंह तम्हां सेटा एछणें किहअ च़ाअ लागा अर मुंह तम्हां सोभिए केतरी झ़ूरी लागा, ठीक तेही ई ज़ेही मसीहा ईशू हाम्हां संघै झ़ूरी किई।
हुंह करा एही प्राथणां कि तम्हैं एकी-दुजै लै झ़ूरी, ज्ञैन अर सोभी रंगे सोर-समझ़ा दी होर बी बझ़दै लागे। हुंह करा ऐहा गल्ला लै बी प्राथणां कि परमेशर तम्हां का ऐहा गल्ला रहैऊए कि तम्हैं भली का भली गल्ला परखी झ़ूरी करे अर ज़ेभै मसीहा स्वर्गा का फिरी एछणअ तेभै तैणीं रहे तम्हैं मानदार अर नर्दोश बणी। ऐहा गल्ला लै बी करा हुंह प्राथणां कि तम्हैं सदा तिन्नां भली गल्ला करदै रहे ज़ेता लै तम्हैं परमेशरा सेटा मसीहा ईशू करै धर्मीं आसा बणाऐं दै। तै शुझणअ होरी लोगा का बी कि तम्हैं परमेशरो किहअ अदर करा।1
कैद खानै का पल़सीए च़ाकरी
ओ भाईओ, हुंह च़ाहा इहअ कि तम्हां का लोल़ी थोघ लागअ कि मुल्है ज़ुंण बित्तअ, तेता करै हुई खुशीए समादे ई बढोतरी।2
इधी तैणीं कि माहा राज़ेए राज़ भबने सोभी सपाही अर बाकी सोभी लोगा का गअ थोघ लागी कि हुंह आसा मसीहो दास अर तेता पिछ़ू आसा हुंह कैद किअ द। मेरै इधी कैद हणैं करै हुऐ इधे विश्वासी भाई-बैहणी मसीहा दी विश्वास करना लै होर बी पाक्कै अर तिंयां रहा परमेशरे आसरै। प्रभू दैनी तिन्नां लै हिम्मत अर तिहअ करै निं तिंयां लोगा जैंदरी परमेशरे खुशीए समादा खोज़णैं का डरदै।
कई लोग करा ज़ल़ण अर झ़गल़ै पाणें तैणीं मसीहे खुशीए समादो प्रच़ार! पर कई करा भलै मन्नैं।3 भलै मन्नें करा इहअ समझ़ी कि तिंयां आसा खुशीए समादा लै ज़बाब दैणा लै डाहै दै, तिंयां करा बडी झ़ूरी संघै प्रच़ार। तिंयां मणछ करा मसीहे बारै सिधी एते तैणीं प्रच़ार कि लोग तिन्नां खास समझ़े! लोगे मज़त करनी निं असली दी तिन्नों मकसद आथी। तिंयां च़ाहा सिधअ इहअ कि तेता करै तिंयां मुल्है इधी कैद खानै दी होर बी आफ़त खल़ी करे।
तै किज़ै हुअ? सिधअ इहअ कि हर रंगे, च़ाहे सह किज़ू भान्नै दी होए, च़ाहे सत्ता दी, मसीहे कथ्या आसा खोज़दै लागै दै, अर हुंह हआ एता करै खुश अर मुंह खुश रहणअ बी।
किल्हैकि मुखा आसा थोघ कि थारी प्राथणां अर प्रभू ईशू मसीहे आत्मां करनी मेरी मज़त अर तेता करै भेटणअ मुंह छ़ुटकारअ।4
ज़िऊंदै रहणअ आसा मसीहा
मुंह आसा ऐहा गल्लो च़ाअ अर आशा कि ज़ुंण मुंह मसीहा लै करनअ लागा तेथ निं लोल़ी हुंह कधि शर्मिंदअ हुअ। पर ऐबै आसा मुंह एतरी हिम्मत कि ज़ेही मेरी देही करै परमेशरो अदर हंदअ रहअ तिहअ लोल़ी आजू बी हंदअ रहअ, च़ाऐ हुंह ज़िऊंदअ रहूं या मरूं। किल्हैकि मुंह रहणअ ज़िऊंदै मसीहे तैणीं अर मरनअ आसा मुल्है होर फाईदअ।
पर ज़ै देही दी ज़िऊंदै रहणअ ई मेरै कामां लै फाईदअ आसा, तै निं मुखा थोघै कि हुंह किज़ै छ़ांटूं। किल्हैकि हुंह आसा दूई बाता मांझ़ै खल़अ दबिधा दी पल़अ द, ज़िऊ, च़ाहा इहअ कि एऊ संसारा छ़ाडी डेऊं मसीहा सेटा लै, किल्हैकि सह आसा मुल्है शोभलअ। पर देही दी रहणअ आसा मुल्है थारी मज़त करने तैणीं होर बी ज़रूरी।
मुंह आसा ऐहा गल्लो भरोस्सअ अर मुखा ऐहा गल्लो थोघ बी आसा कि हुंह रहणअ ज़िऊंदअ, अर रहणअ बी तम्हां ई संघै, ज़ेता करै तम्हैं विश्वासा दी मज़बूत होए अर तेता ई दी खुश रहे। ज़ुंण घमंड तम्हैं मेरै बारै मसीहा ईशू दी करा, तेते लोल़ी मेरै तम्हां सेटा लै भिई एछणैं करै बढोतरी हुई।
मसीहे साबै च़ाल-च़लण
सिधअ एतरअ करा कि थारअ च़ाल-च़लण लोल़ी मसीहे खुशीए समादा जोगी हुअ, च़ाहे हुंह तम्हां सेटा एछी भाल़ूं, च़ाहे नां बी एछूं, पर थारै बारै लोल़ी मुंह इहअ शुणना लै भेटअ कि तम्हैं आसा एकी आत्मां दी टेक्की रहै दै, अर एक मन्न हई खुशीए समादे विश्वासा लै आसा मैन्था करदै लागै दै।
किछ़ी गल्ला लै निं बरोधी का डरदै लागी? अह आसा तिन्नां लै बनाशो नछ़ैण। पर तम्हां लै आसा उद्धार, अर अह आसा परमेशरा बाखा का। किल्हैकि मसीहा पिछ़ू आसा तम्हां लै इहअ जश हुअ द कि नां सिधअ तेऊ दी विश्वास करा, पर तेऊए तैणीं ज़िरा दुख बी। तम्हां आसा तेही मैन्थ बी करना लै, ज़िहअ तम्हैं हुंह करदअ भाल़अ अर ऐबै बी शूणां तम्हैं कि हुंह करा तिहअ ई।
Source notes (4)
- Cross-reference ईशा. 15:8
- Cross-reference 2 तिम. 2:9
- Cross-reference फलि. 2:3
- Cross-reference रोम. 8:28
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.