लेबी बधान

लेबी बधान

लेबी गोत्रा लै खोज़अ द बधान

भेत

लेबी बधाने ऐहा कताबा दी आसा बिधाता मोसा का खोज़ै दै बधाने बारै ज़ुंण खासकर लेबी गोत्रे लोगा लै आसा। कताबो नाअं हआ “लेबी” का शुरू मतलब सह मणछ ज़ुंण लेबी गोत्रा का आसा। लेबी लोग थिऐ बिधाते पबित्र ज़ैगा च़ाकरी करनै आल़ै खास लोग अर बिधातो प्रोहत निखल़ा पोस्ती दर पोस्ती लेबी गोत्रा का। ऐहा कताबा दी आसा खासकर तिंयां बिधी खोज़ी दी ज़ेता पूरै करने ज़िम्मैंबारी लेबी गोत्रे आसा। ज़िहअ कि बल़ीदान, बिधाता लै भैंट अर तिह-थैर ज़ुंण बिधाता लै हर साल मनाऊंणै। पर अह कताब खोज़ा तिन्‍नां पशूए बारै बधान बी ज़ेता मणछ खाई सका अर ज़ेता खाई छ़ोत लागा, तेखअ कुंण झिकल़ै बान्हणैं अर गरीबा मणछे हेर-सभाल़ करने बारै बी।

ऐहा कताबा दी आसा बधान ई खोज़अ द, पर धख आसा एथ एही हुई-बिति दी गल्‍ले बारै बी खोज़अ द, कि ज़ेभै प्रोहतै बधान पूरअ किअ अर ज़ेभै तेऊ का च़ूक हुई, तेभै किज़ै हुअ। बिधाता दैनी तिन्‍नां मणछा लै तेभी सज़ा ज़ुंणी कबध किअ, पर ज़ुंणी बिधाते सोभै गल्‍ला मनी, तिन्‍नां लै दैनी बिधाता बर्गत बी।

“मुंह करनी तम्हां जैंदरी हांढ-फेर दैई अर हुंह रहणअ सदा थारअ परमेशर अर तम्हैं हणैं सदा मेरी आपणीं परज़ा। हुंह आसा थारअ परमेशर बिधाता, मंऐं आसा तम्हैं मिसर देशा का एते तैणीं आणै दै काढी कि तम्हैं गलाम नां रहे। मंऐं किऐ तम्हैं आज़ाद, ऐबै सका तम्हैं इज़ती संघै आज़रअ मूंड करी हांढी।”

(26:12,13)

कताबे बांड

बल़ीदानो बधान 1:1—7:38

प्रोहतो अभिषेक करनैओ बधान 8:1-36

हारण माहा प्रोहतो पैहलअ बल़ीदान 9:1-24

दूई प्रोहत पाऐ मारी 10:1-20

शुचै अर छ़ोता लै बधान 11:1—15:33

पापो प्राश्त करनैओ बधान 16:1-34

होर कई गल्‍ले बधान 17:1—20:27

प्रोहता लै बधान 21:1—22:33

तिह-थैरा मनाऊंणेओ बधान 23:1—25:55

बर्गत अर सज़ा 26:1-46

बिधाता लै मानत अर बांधै डाहणेंओ बधान 27:1-34