Kulvi Outer Seraji Bible
लेबी बधान 12
सूई करै शुचै हणैंओ बधान
तेखअ बोलअ बिधाता मोसा लै भिई, “इज़राईली का डाह इहअ खोज़ी, ज़ै कुंण बेटल़ी सूए अर तेसो शोहरू होए, सह आसा साता धैल़ै तैणीं छ़ोतली, ज़ेही तैहा हर भिन्नैं ज़ुठै झिकल़ै धोई छ़ोत लागा।
“आठुई धैल़ी करै तेसे तेऊ शोहरूए गुप्त आंगे खाल काटी खतैर,1 पर पठी शुचै हणां लै लागणै तैहा तेत्ती धैल़ै ज़ेभै तैणीं तेसो लोहू बगणअ पठी निं मुक्के। तेभै तैणीं निं सह किज़ू पबित्र च़िज़ा छ़ुंहीं सकदी अर नां सह पबित्र ज़ैगा डेऊई सकदी।
“ज़ै तैहा बेटल़ीए शोहरी होए, सह आसा च़ौदा धैल़ी तैणीं छ़ोतली, ज़ेही तैहा हर भिन्नैं ज़ुठै झिकल़ै धोई छ़ोत लागा। सह निं दूई भिन्नैं छ़हा धैल़ी तैणीं पठी शुची हणीं।
“ज़ांऊं तैहा बेटल़ीए शुचै हणें धैल़ै पूरै होए, तेखअ एछै सह मेल़-ज़ोल़े खिम्भे प्रऊल़ी आजू, संघा आणै प्रोहता सेटा एकी सालो मिम्मूं हूम बल़ी करना लै ज़ेता करै हुंह बिधाता खुश हआ, अर एक कबूतर, कि आणै एक पालल़ी पाप बल़ी करना लै।2
“ज़ांऊं प्रोहता मुंह बिधाता लै ईंयां बल़ीदान करी हेरनै, तेखअ हणीं सह बेटल़ी तेसे बगै दै लोहू का पठी शुची, च़ाऐ तेसो शोहरू होए हुअ द या शोहरी होए, तेता लै आसा अह ई बधान।
“ज़ै तेसे भलै मिम्मूं निं पुगे, तेते बदल़ै सका सह दूई कबूतर, कि सका सह दूई पालल़ी आणी, एक मुंह बिधाता खुश करना लै हूम बल़ी अर दुजअ पापो प्राश्त करना लै पाप बल़ी। तेखअ हणीं सह बधाने साबै शुची।”3
Source notes (3)
- Cross-reference मूल. 17:12; लूक. 1:59; 2:21; जोह. 7:22; शधा. 15:1
- Cross-reference लूक. 2:22
- Cross-reference लूक. 2:24
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.