लेबी बधान 17

बल़ी करने ज़ैगा

1बिधाता बोलअ मोसा का इहअ, 2“हारण, तेऊए शोहरू अर सोभी इज़राईली का खोज़ इहअ कि मंऐं बिधाता किअ तम्हां लै इहअ हुकम कि 3-4तम्हैं इज़राईली काटै मुल्है बल़ीदान करना लै बाछ़ू, गाभू या छ़ेल्हू मुंह बिधाता सम्हनै मेल़-ज़ोल़े खिम्भे प्रऊल़ी आजू। ज़ै तेता का सुआई आपणैं डेरै या तेता बागै किधी होर्ती काटे, तिंयां मणछ हणैं तेते लोहू बगणें दोशी, तिंयां निं तेता आजू तेखअ मेरी आपणीं परज़ा मांझ़ै रहणैं।

5“अह गल्‍ल बोली मंऐं एता लै कि ज़ेभै तम्हैं इज़राईली मुंह बिधाता खुश करना लै मेल़-ज़ोल़े बल़ी करे तिंयां निं मेल़-ज़ोल़े खिम्भे आजू का सुआई बागै कज़िधल़ी लोल़ी काटै, 6तिंयां लोल़ी मुंह बिधाता सम्हनै मेल़-ज़ोल़े खिम्भे दुआरा आजू बल़ीदान किऐ। तेखअ छ़ल़िकै प्रोहत तेतो लोहू बेदी प्रैंदै, अर तेते च़र्बीओ करै मुंह बिधाता लै शोभली बास्सा दैणैं आल़अ हूम। 71तम्हैं इज़राईली निं कज़िधल़ी2 बल़ीदान करी बिधाता संघै विश्वास घात करी अर एऊ बधाना करै इज़राईली पोस्ती दर पोस्ती इहअ ई।3

8“ऐहा गल्‍ला डाहै सदा आद कि नां कुंण इज़राईली अर नां तिन्‍नां मांझ़ै रहणैं आल़अ पाखलअ परदेसी मणछ, तम्हैं निं किधी होर्ती हूम बल़ी अर मेल़-ज़ोल़े बल़ीदान करदै लागी। 9ज़ै तम्हैं मुंह बिधाते मेल़-ज़ोल़े खिम्भे प्रऊल़ी आजू का सुआई किधी होर्ती बल़ीदान करे, तिंयां हणैं तेखअ आजू मेरी आपणीं परज़ा मांझ़ा का दूर।

लोधल़अ निं कधि खाई

10“तेऊ मणछा बाखा फरेऊंणी मुंह पिठ ज़ुंण लोहू खाए। च़ाऐ सह कुंण इज़राईली होए या तिन्‍नां मांझ़ै रहणैं आल़अ कुंण पाखलअ परदेसी होए।4 11किल्हैकि लोहू दी आसा ज़िन्दगी, मंऐं आसा थारी ज़िन्दगीए बदल़ै बेदी दी लोहू बल़ीदान करना लै बोलअ द, किल्हैकि ज़िन्दगीओ प्राश्त हआ लोहू करै।5 12तैही बोला हुंह इज़राईली अर तिन्‍नां मांझ़ै बस्सै दै परदेसी लै, ‘तम्हैं निं कोही बी ज़ीबो लोहू खाई।’ 13इधी तैणीं कि, ज़ै तम्हैं इज़राईली कहा च़ेल्‍लू-पखीरू या कहा ज़ीबो शकार करे या काटे, तेतो लोहू दै पठी बागै बगणैं, संघा डाहै तेता माट्टै करै दाबी।

14“किल्हैकि सोभी ज़ीबे देही दी ज़ुंण ज़िन्दगी आसा, सह आसा लोहू। तैही बोला हुंह तम्हां इज़राईली लै, ‘कोही ज़ीबो लोहू निं खाई, किल्हैकि सोभी ज़ीबे ज़िन्दगी आसा लोहू, तम्हां मांझ़ै ज़ुंण तेता खाए सह हणअ आजू मेरै आपणैं लोगा मांझ़ा का दूर।’6

15“ज़ै कहा इज़राईली या तिन्‍नां मांझ़ै बस्सै दै परदेसी मूंअ द ज़ीब भेटे अर सह तेतो मास्स खाए, सह लऐ न्हैऊई अर आपणैं झिकल़ै-टाल्है धोई, पर तज़ी बी रहणअ सह उडै तैणीं छ़ोतलअ, धैल़अ उडी करै हणअ सह शुचअ। 16ज़ै सह नांईं न्हैईए अर झिकल़ै नांईं धोए, तैहा भूले सज़ा लागणीं तेऊ भुगतणी।”