Kulvi Outer Seraji Bible
पांच़ 12
एप्रैम गोत्रा आल़ै किअ जपताह संघै झ़गल़अ
एप्रैम गोत्रा आल़ै हुऐ जपताह संघै जुधा लै कठा, तिंयां डेऊऐ जरदण नदी पार टपी सपोन नगरी संघा बोलअ जपताह लै इहअ, “तूह डेऊअ अमोनी संघै जुधा करदअ सिऊंआं पार! तंऐं हाम्हैं किल्है निं पुछ़ै अर हाम्हैं संघा किल्है निं निंयैं? एता पिछ़ू लाअ हाम्हैं तूह तेरै घअरा संघी दहई करै खतम करी!”1
जपताह दैनअ तिन्नां लै ज़बाब, “आद करा, एकी बारी हुअ त मेरअ अर मेरै लोगो अमोनी संघै बडअ झ़गल़अ, तधू मांगी ती मंऐं तम्हां का मज़त पर तम्हैं निं तधू मुंह बच़ाऊंणा लै किछ़ बी किअ! ज़ांऊं मुखा ज़ाण्हुंअ कि तम्हां निं मेरअ साथ दैणअ आथी, तेखअ डेऊअ हुंह आपणीं ज़िन्दगी खातरै दी पाई सिऊंआं पार अमोनी संघै मकाबलै करदअ अर बिधाता दैनी मुल्है तिन्नां का ज़ीत। आझ़ किज़ू आऐ तम्हैं थोघै बाझ़ी मुंह संघै झ़घल़दै?”
एप्रैम गोत्रा आल़ै बोला तै तिन्नां लै इहअ, “तम्हैं मनिश्शे अर एप्रैम गोत्रा मांझ़ै गलाद बस्सै दै इज़राईली आसा एप्रैम गोत्रा का दूर हुऐ दै।” जपताह बी किऐ तेखअ गलाद मुल्खे मर्ध कठा संघा किअ एप्रैमी संघै जुध। तिन्नां का हारी एप्रैमी सैना पठी।
जरदण नदीए ज़ेऊ बाढा का एप्रैमी दरैअ पार आपणैं देशा लै टपणअ थिअ, तेथ हेरअ गलादी तिन्नां का आजी कबज़अ करी अर तिधी डाहै आपणैं आदमी पहरी लाई। ज़ुंण बी एप्रैमी मांझ़ै तिधी पुजी पार टपणै ज़ाज़त मांगा थिअ, तेऊ का पुछ़ा तै गलादी सपाही, “तूह एप्रैमी आसा?” ज़ै तेऊ नांईं किअ तै बोला तै तिंयां तेऊ लै, “शिब्बोलेथ बोल” किल्है एप्रैमी निं एऊ बोला राम्बल़ै करै बोली सकदै तै अर तिन्नां का छ़ुटा ती, “सिबोलेत।” तेखअ निंयां तै तिन्नां गलादी सपाही घिशी, संघा पाआ तै तिधी मारी। इहअ करै पाऐ तै तिधी तिन्नैं बयाल़ी हज़ार एप्रैमी मारी।
जपताह रहअ इज़राईली प्रैंदै छ़हा साला तैणीं पांच़। ज़ांऊं सह मूंअ, तेखअ डाहअ सह गलाद तेऊए आपणीं नगरी मिज़पा दाबी।
इबसान, अलोन अर अबदोन पांच़
जपताह मरनै बाद बणअ बेतलेम नगरीओ इबसान इज़राईलीओ पांच़। तेऊए तै तिह शोहरू अर तिह शोहरी। तेऊ किअ आपणीं शोहरीओ बैह आपणीं टोली का बागै अर तिह नुशा बी आणी तेऊ आपणीं टोली छ़ाडी होरी टोली का। इबसान रहअ साता साला तैणीं इज़राईलीओ पांच़। ज़ांऊं इबसान मूंअ सह डाहअ तेऊए बेतलेम नगरी दाबी।
इबसाना बाद बणअ ज़बलून गोत्रा का एलोन इज़राईलीओ पांच़ अर सह रहअ दसा साला तैणीं। मरनै बाद डाहअ सह अजालोन नगरी दाबी ज़ुंण ज़बलून मुल्खै आसा।
एलोना का बाद बणअ पिरातोन नगरी का हलेलो शोहरू अबदोन इज़राईलीओ पांच़। तेऊए तै च़ाल़्ही शोहरू अर तिह पोचै। तिंयां डेओआ तै सत्तर गाधै प्रैंदै शुंआर हई। अबदोन रहअ आठा साला तैणीं इज़राईलीओ पांच़। ज़ांऊं हलेलो शोहरू अबदोन मूंअ सह डाहअ एप्रैम मुल्खै उतरा पिरातोन नगरी दाबी ज़ुंण अमोलकीए धारा बाखे मुल्खै थिई।
Source notes (1)
- Cross-reference 2 इति. 35:25
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.