Kulvi Outer Seraji Bible
ज़ैहसू 11
कनान देशे उतरा बाखे मुल्खै ज़ीत
हसोर नगरीए राज़ै ज़ोबनै बी शूणीं ईंयां गल्ला कि इज़राईली किहै ज़ितै, तेऊ दैनअ आप्पू ओरी-पोरी होरी मुल्खे राज़ै लै समाद कि इज़राईली संघै जुधा लै हआ कठा। तेऊ दैनअ समाद मदोने राज़ै जोबाब, शिम्रोन अर अक्षाप नगरीए राज़ै लै, ज़ुंण-ज़ुंण राज़ै उतर दिशा बाखा धारा बाखे मुल्खै थिऐ, जरदण नदीए खागै गलील सअरे दखणा बाखे अराबा, पछ़मा बाखे फाल़ी राज़ै दोर नगरी नेल़ समुंदरे बाढै थिऐ। ज़ोबनै दैनअ जरदण नदी दोहरी बाखा बस्सै दै कनानी, अमोरी, हित्ती, परिजी अर धारा बाखे मुल्खै बस्सै दै जबेशी अर तिन्नां हिब्बी ज़ातीए लोगा लै बी समाद ज़ुंण हर्मोन धारा गोधे मुल्खै मिज़पा थिऐ बस्सै दै। तिंयां सोभै आऐ आपणीं-आपणीं सैना पाई। तिंयां सोभै तै समुंदरे रेता ज़िहै खास्सै। तिन्नां का थिऐ खास्सै घोल़ै अर रथ बी। इनै सोभी राज़ै किअ एक्कअ संघा पाऐ इज़राईली संघै जुधा करना लै मरोम नाओंए सअरा नेल़ साझ़ू डेरै।
बिधाता बोलअ ज़ैहसू लै इहअ, “तूह निं इना का डरी आथी। एभकी बारी पाणै मुंह ईंयां इज़राईलीए तैणीं सोभ मारी। तिन्नैं पाई तिन्नें सोभी घोल़े ज़ांघे नसा काटी अर तिन्नें रथा पाऐ आगी जैंदरी दहई।”
ज़ैहसू अर तेऊए सैना पल़ै तिन्नां लै मरोम नाओंए सअरा नेल़ चुटी संघा छ़ेल़अ तिन्नां संघै नच़ानक जुध। तेऊ जुधा लै दैनी बिधाता इज़राईली लै बडी ज़ीत, इज़राईली मारै तिंयां फेरा फेर संघा रहै तिंयां उतरा बाखा मिसरपोतमैम, सदोन नगरी अर पुर्बा बाखा मिज़पा सऊंऐं मुल्खै तैणीं पिछ़ू पल़ी। ज़ांऊं तैणीं तिंयां सोभ दुशमण मारी निं मुक्कै तेभै तैणीं निं जुध खतम हुअ। ज़ैहसू किअ तिहअ ई ज़िहअ बिधाता हुकम त किअ द। तिन्नैं पाई तिन्नें सोभी घोल़े ज़ांघे नसा काटी अर तिन्नें सारै रथ पाऐ आगी जैंदरी दहई।
तेखअ बाहअ ज़ैहसू तिधा का हसोर नगरी बाखा फेरअ। सह नगरी ती तेऊ ज़मानैं सोभी नगरी का बलबान। ज़ैहसू गिम्मी सह नगरी पठी अर तेतो राज़अ पाअ मारी। हसोर नगरी बी निं तिन्नैं कोह ज़िऊंदअ छ़ाडअ, तेथ पाऐ तिन्नैं सोभ मारी अर नगरी दी चैल़ी आग।
इहअ करै गिम्मी ज़ैहसू तिंयां सोभ नगरी अर तिन्नां नगरीए लोग पाऐ तिन्नें राज़ै संघी मारी, ज़िहअ तिन्नां लै बिधाते दास मोसा बोली त डाहअ द। पर ज़ुंण नगरी उझै धारा प्रैंदै थिई बस्सी दी, तेथ निं ज़ैहसू अर इज़राईली सैना हसोर नगरी का सुआई होर कोहै नगरी आग चैल़ी पठी खतम किई। तिन्नां नगरीए पशू अर सोभै किम्मती च़िज़ा लुटी इज़राईली आप्पू लै पठी। पर मणछ पाऐ तिन्नैं सोभ मारी कि तिन्नां मांझ़ै निं एक मणछ बी ज़िऊंदअ छ़ाडअ। ज़िहअ बिधाता आपणैं दास मोसा लै हुकम किअ त, तेऊ साबै त मोसा ज़ैहसू का खोज़ी डाहअ द अर ज़ैहसू बी किअ पठी तिहअ ई ज़िहअ बिधाता मोसा लै हुकम त किअ द।
कनान देशै ज़ेतरी नगरी इज़राईली ज़ितै
ज़ैहसू गिम्मअ सारअ देश, उझै धारा बाखलअ मुल्ख, उतर अर दखण दुहै, गोशेन देशो सारअ मुल्ख अर दखणा बाखो सारअ रेगीस्तानी, अराबा, इज़राईले धारा बाखलै सारै मुल्खै अर जरदण खागे सारी ज़ैगा। तिन्नैं गिम्मअ सह देश सेईर कुआल़ी हलाक धारा ओर्ही हर्मोन धारा गोधै लाबानोन सऊंऐं मुल्खै बाल-गाद नगरी तैणीं। तेथ ज़ेतरी नगरी थिई, तिंयां ज़िती तिन्नैं सोभ अर तिन्नां नगरीए राज़ै बी पाऐ तिन्नैं सोभ मारी। तिन्नां राज़ै संघै जुध करदी-करदी लागै ज़ैहसू खास्सै धैल़ै। गबोन नगरी दी बस्सै दै हिब्बी का सुआई निं कोही नगरीए लोगै इज़राईली संघै मेल़-ज़ोल़ किअ अर तिंयां नगरी पल़ी इज़राईली जुध करी-करी ज़ितणीं। इहअ च़ाहा त बिधाता ई कि तिंयां इज़राईली संघै जुध करे ताकि तिन्नां मारना लै किछ़ झींण निं होए अर तिंयां पठी बरैबाद होए। मोसा लै बी थिअ बिधाता इहअ ई हुकम किअ द। 1
ज़ैहसू किऐ तेऊ ज़मानें मशूर दैंत्तर मणछ अनाकी खतम ज़ुंण उझै धारा बाखलै मुल्खै हेब्रोन, दबीर, अनाब अर यहूदा अर इज़राईल देशे धारा बाखलै मुल्खै रहा तै। ज़ैहसू किऐ तिंयां अर तिन्नें नगरी पठी खतम।2 सारै इज़राईल निं अनाकी लोगा मांझ़ै एक बी ज़िऊंदअ छ़ुटअ, हाँ गाज़ा, गात अर अशदोद नगरी तै धख-धख अनाकी बच़ै दै।
ज़ैहसू गिम्मअ कनान सारअ देश ज़िहअ बिधाता मोसा लै हुकम किअ त। संघा दैनअ ज़ैहसू सह देश इज़राईलीए हर गोत्रा लै बांडी कि तिंयां तेते मालक बणें।
तेखअ हुअ इज़राईली मणछा जुधा का राम।
Source notes (2)
- Cross-reference लुआ. 4:21; बधा. 7:16
- Cross-reference गण. 13:22; बधा. 1:28; ज़ैह. 15:13-14
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.