Kulvi Outer Seraji Bible
ज़ैहसू 12
तिंयां राज़ै ज़हा का मोसा गूरै जुध ज़ितै
ज़धू मोसा आप्पू ज़िऊंदअ थिअ, तधू त इज़राईली जरदण नदी पुर्बा बाखा अराबा, जरदण नदीए अर्नोन खागा ओर्ही उतरा बाखा हर्मोन धारा तैणीं ज़िती करै आप्पू लै गिम्मी हेरअ द। तेऊ मुल्खे ज़ितै तै तिंयां दूई राज़ै का। एक त अमोरी राज़अ सिहोन ज़ुंण हेशबोन नगरी राज़ करा त। तेऊओ राज़ त आधै गलाद मुल्खै अर्नोन खागे सिऊंआं ओर्ही अरोर अर तेऊ खागे मांझ़ा-मांझ़ी नगरी ज़बोग गाडा तैणीं ज़िधी अमोनी लोगे सिअं थिई। जरदण खागै पुर्बा बाखा गलील समुंदरे दखणा पोर्ही बेथ-जासमोत बाती ज़ुंण खार समुंदरे पुर्बा बाखा आसा, पिसगा धारे गोधै अराबा तैणीं बी थिअ सिहोन राज़ैओ राज़।
ज़हा दुजै राज़ै का इज़राईली ज़ितै, सह थिअ बाशानो राज़अ ओग ज़ुंण अशतरोत अर अद्रोई नगरी का एक-एक साल बारी-बारी रही राज़ करा त। ओग त खिरी बच़ै दै रपाई लोगा मांझ़ै ई एक।1 तेऊओ राज़ त हर्मोन धारा ओर्ही, सल्का, सारअ बाशान अर गशूर अर मकात नगरीए सिऊंआं तैणीं, आधै गलाद मुल्खै त हेशबोन नगरीए राज़ै सिहोने सिऊंआं तैणीं।
ईंयां दूई राज़ै तै इज़राईली बिधाते दास मोसा गूरे ज़िऊंदी ज़िता ज़िती हेरै दै। अह सारी ज़ैगा ती हेरी दी मोसा इज़राईले रूबेन, गाद अर मनिश्शे आधै गोत्रे बांडै दैई हेरी दी अर तेते मालक तै तिंयां।2
तिंयां राज़ै ज़ुंण ज़ैहसू ज़ितै
इज़राईली सैना अर ज़ैहसू ज़ितै जरदण नदीए पछ़मा बाखा सोभी मुल्खे राज़ै। बाल-गाद पोर्ही लाबानोन खागै हलाक धारे दखणा तैणीं ज़ुंण एदोम नेल़ आसा। ज़ैहसू दैनी अह सारी ज़ैगा इज़राईली लै तिन्नें गोत्र अर टोलीए साबै बांडी कि तिंयां सदा लै तेते मालक होए। सह ज़ैगा ती धारा बाखो मुल्ख, पछ़मा धारा गोधो सऊंअ मुल्ख, जरदण खागे सारी ज़ैगा अर पुर्बा बाखे रेल़ी ज़ैगा, अराबा अर दखणा बाखा सारअ रेगीस्तानी मुल्ख। एथ रहा तै हित्ती, अमोरी, कनानी, परिजी, हिब्बी अर जबेशी ज़ातीए लोग।
ज़हा-ज़हा नगरीए राज़ै का इज़राईली जुध ज़ितै तिंयां थिऐ एई नगरी नेल़ जेरिहो राज़अ अर बेतेल नगरी नेल़ एई नगरीओ राज़अ, एरुशलेम, हेब्रोन नगरीए राज़ै, अर्मूत अर लकीश नगरीए राज़ै, एगलोन, गज़ेर नगरीए राज़ै, दबीर, गदेरा नगरीए राज़ै, होर्मा, अराद नगरीए राज़ै, लिब्ना, अदुलाम नगरीए राज़ै, मकेदा, बेतेल नगरीए राज़ै, तपूह, हेपेर नगरीए राज़ै, अपेक, लशारोन नगरीए राज़ै, मदोन, हसोर नगरीए राज़ै, शिम्रोन-मरोन, अक्षाप नगरीए राज़ै, तनाक अर मगिदो नगरीए राज़ै। कादेश, कर्मेल अर जोकनीम नगरीए राज़ै, दोर नाओंए धारा बाखलै नगरीओ राज़अ, गिलगाल मुल्खै गोईम नगरीओ राज़अ, तिर्सा नगरीओ राज़अ। इहअ करै हुऐ ईंयां सोभी नगरीए गणी करै पठी कत्ती राज़ै ज़ुंण इज़राईली सैने ज़ितै।
Source notes (2)
- Cross-reference गण. 21:35; बधा. 3:11
- Cross-reference गण. 33:54
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.