Kulvi Outer Seraji Bible
ज़ैहसू 10
इज़राईलीए अमोरी लोगा का ज़ीत
एरुशलेम नगरीए राज़ै अदोनीसेदका1 का लागअ थोघ कि ज़ैहसू हेरी एई नगरी गिम्मी अर नगरी किई पठी बरैबाद! एई नगरीओ राज़अ पाअ जेरिहो नगरीए राज़ै ई ज़िहअ मारी। ईंयां गल्ला बी शूणीं तेऊ कि गबोन नगरीए हिब्बी लोगै किअ इज़राईली संघै मेल़-ज़ोल़ संघा बस्सै तिन्नां ई जैंदरी। इना गल्ला शूणीं डरै एरुशलेम नगरीए लोग खास्सै, किल्हैकि गबोन नगरी थिई तिन्नां सोभी नगरी का बडी ज़ेथ राज़ै थिऐ! एई नगरी का थिई गबोन नगरी खास्सी बडी अर तिधे मर्ध बी थिऐ खास्सै शूरबीर। एरुशलेम नगरीए राज़ै अदोनीसेदकै दैनअ हेब्रोन नगरीए राज़ै होहाम, अर्मूत नगरीए राज़ै परमा, लकीश नगरीए राज़ै ज़ाफी अर एगलोन नगरीए राज़ै दबीरा लै इहअ समाद, “तम्हैं एछा इधा लै संघा करा मेरी मज़त। हाम्हां छ़ेल़णअ एक्कअ करी गबोन नगरी संघै जुध किल्हैकि तिन्नैं किअ ज़ैहसू अर इज़राईली संघै मेल़-ज़ोल़।” एरुशलेम, हेब्रोन, अर्मूत, लकीश, एगलोन नगरीए ईंयां पांज़ अमोरी राज़ै डेऊऐ एक्कअ करी आपणीं सारी सैना पाई गबोन नगरी संघै जुधा लै अर तिन्नैं गोटी गबोन नगरी फेरा-फेर।
इज़राईली तै गिलगाल आपणैं डेरै पाऐ दै, गबोन नगरीए लोगै पजैल़अ तिधी ज़ैहसू सेटा इहअ समाद, “म्हारै मालक, ऐबै निं तम्हैं हाम्हां कल्ही डाही शोटी हेरे! तम्हैं लोल़ी छ़ेक्कै हाम्हां सेटा इधा लै आऐ, हाम्हां बच़ाऊआ! धारा बाखली नगरीए सारै अमोरी राज़ै किअ एक्कअ अर तिन्नैं गोटै हाम्हैं फेरा-फेर!”
एऊ समादा शूणीं उझ़ुऐ ज़ैहसू अर सारी सैना अर आपणैं सोभी का खास जोधै संघी गिलगाल ज़ैगा का गबोन नगरी बाखा जुधा लै। बिधाता बोलअ ज़ैहसू लै इहअ, “तूह निं तिन्नां का डरी आथी, मंऐं हेरी ताल्है ज़ीत दैई। तिन्नां मांझ़ै निं कोह तेरअ मकाबलअ करी सकदअ।” सारी राची रहै ज़ैहसू अर इज़राईली सारी सैना गबोन नगरी बाखा हांढदै लागी अर तिंयां पल़ै नच़ानक अमोरी लै चुटी। बिधाते हुणाकार हुई एही कि अमोरी सैना फिरअ इज़राईली सैना भाल़ी डरै दर्छ़णअ। इज़राईली च़की तिन्नां लै गबोन नगरी काट-फणाटी अर तिन्नां च़िक्कदी मारदी-मारदी डेऊऐ बेथ-हारोन कुआल़ी पोर्ही उंधै अज़ेका अर मकेदा नगरी तैणीं तिन्नां पिछ़ू।2 ज़ांऊं अमोरी इज़राईली सम्हनै का उंधै बेथ-हारोन उटी थुआल़ी ठुर्है, तिधी हुई बिधाते हुणाकार एही कि सरगा का पल़ै तिन्नां प्रैंदै बडै-बडै पात्थरा ज़िहै शरू। अज़ेका तैणीं रहै तिन्नां प्रैंदै शरू पल़दै लागी। ज़ेतरै इज़राईली तिंयां तलबारा करै मारै, तेता का खास्सै मूंऐं तिंयां शरू करै।3
तैहा धैल़ी दैनी बिधाता इज़राईली लै अमोरी लोगा का ज़ीत अर तधू बोलअ ज़ैहसू सोभी इज़राईली नदरी बिधाता लै इहअ,
“सुरज़ा, गबोन नगरी प्रैंदै रह एकी ज़ैगा टेक्की,
ज़ोथ, तूह रह अजालोन खागा प्रैंदै तिधी खल़्हुई।”
ज़िहअ ज़ैहसू बोलअ, सुरज़ रहअ एकी ज़ैगा टेक्की अर ज़ोथ बी निं तेभै तैणीं तिधा का आजू सिक्की ज़ेभै तैणीं इज़राईली आपणैं दुशमण अमोरी का ज़ितै निं आथी। अह गल्ल आसा याशार नाओंए कताबा दी लिखी दी कि सुरज़ रहअ सरगै एकी ज़ैगा टेक्की अर सह निं सारी धैल़ी तिधा का आजू सिक्कअ।4 नां तधा का आजी कधू एही धैल़ी हुई अर नां तधा बाद आझ़ तैणीं तेही धैल़ी हुई ज़ेथ बिधाता मणछे अरज़ शूणीं इहअ नोखअ काम किअ अर बिधाता त तेऊ जुधा लै इज़राईली बाखा आप्पै।
तेखअ पुजै ज़ैहसू अर सारी इज़राईली सैना गिलगाल आपणैं डेरै बापस।
ज़ैहसू पाऐ पांज़ अमोरी राज़ै मारी
तिंयां पांज़ अमोरी राज़ै ठुर्है तिधा का इज़राईली डरै संघा रहै मकेदा नगरी नेल़ किधी बडी जुहल़ी दी लुक्की। तिंयां हेरै तिधी कुंणी भाल़ी अर तिन्नैं पजैल़ी अह गल्ल ज़ैहसू सेटा कि तिंयां पांज़ राज़ै आसा तिधी लुक्की रहै दै। ज़ैहसू किहअ हुकम, “जुहल़ीए मोहरै डाहा बडी-बडी टोल्हा बदल़ी, संघा डाहा तिधी थोल़ै सपाही पहरी लाई। पर तम्हैं बाकी होर निं सोभै तिधी रही, तम्हैं करा तिन्नां होरी दुशमणो पिछ़अ ज़ुण ठुर्है। तिन्नां सोभी पाऐ तिन्नें नगरी भितरी पुजणैं का आजी मारी! थारै परमेशर बिधाता हेरी तम्हां लै तिन्नां प्रैंदै ज़ीत दैई।” ज़ैहसू अर होरी इज़राईली सैना लैऊई तिन्नां लै काट-फणाटी। तिन्नां मांझ़ै धख ज़िहै ज़ुंण नगरीए गहल़ा भितरी मुक्कै तै डेऊई सिधै तिंयां ई बच़ै ज़िऊंदै। तेखअ पुजै तिंयां इज़राईली आपणैं डेरै मकेदा ज़ैहसू सेटा।
सारै देशै निं ओर्ही-पोर्ही इज़राईलीए खलाफ कुंणी खाखा का बैण काढअ।
तेखअ किअ ज़ैहसू तिधी पहरी लै हुकम, “ऐबै घुआल़ा जुहल़ीओ मोहरअ संघा आणा तिन्नां पांज़ा राज़ै तेता का काढी मुंह सेटा लै।” इज़राईली सैने सपाही किअ तिहअ ई संघा आणै एरुशलेम, हेब्रोन, अर्मूत, लकीश अर एगलोन नगरीए तिंयां पांज़ राज़ै जुहल़ी का बागै काढी ज़ैहसू सेटा लै, ज़ांऊं इज़राईली सैना तिंयां पांज़ राज़ै ज़ैहसू सेटा लै आणै, तेखअ शादी ज़ैहसू इज़राईली सैना, ज़ुंण ज़ैहसू संघै तिधी सैनापति थिऐ तेखअ किअ तिन्नां लै इहअ हुकम, “ऐबै डाहा इने कैल़ै प्रैंदै आपणैं-आपणैं खूर। तिन्नैं किअ तिहअ ई।” 5
तेखअ बोलअ ज़ैहसू आपणैं तिन्नां सैनापति लै, “डरी निं आथी नां हैअ चोल़ी, हिम्मत करनी अर दिलै डाहणअ पाक्कअ भरोस्सअ, किल्हैकि ज़ेतरै बी थारै दुशमण होए तिन्नां संघै करनअ बिधाता इहअ ई।” तेखअ बझ़ैल़ै ज़ैहसू तिंयां पांज़ राज़ै मारनै संघा डाहै तिंयां ज़ुदै-ज़ुदै पांज़ा बूटा दी उझै डाल़ै सान्हां तैणीं छ़ड़ाऊई। छ़ैल्ली डेऊंदी किअ ज़ैहसू हुकम संघा डाही तिन्नें ल्हासा तैहा ई जुहल़ी दी शोटी ज़िधी तिंयां पैहलै लुक्कै दै थिऐ। जुहल़ीए मोहरै डाही बडी-बडी टोल्हा बदल़ी अर तिंयां आसा आझ़ तैणीं बी तिधी6 तेही ई।
ज़ैहसू गिम्मी अमोरी लोगे होर नगरी बी।
तैहा ई धैल़ी गिम्मी ज़ैहसू मकेदा नगरी। इज़राईली पाऐ तैहा नगरीए सोभ मणछ मारी अर तेथ निं किछ़ ज़िऊंदै बच़ै। ज़ैहसू किअ मकेदा नगरीए राज़ै संघै बी तिहअ ई ज़िहअ तेऊ जेरिहो नगरीए राज़ै संघै किअ त।
तेखअ डेऊऐ ज़ैहसू अर तेऊए इज़राईली सैना मकेदा नगरी का लिब्ना नगरी लै संघा छ़ेल़अ तिन्नां संघै जुध। बिधाता दैनी तिधी बी इज़राईली लै ज़ीत अर तिन्नैं गिम्मी सह नगरी बी। ज़ैहसू अर इज़राईली सैना पाऐ लिब्ना नगरीए बी सोभ मणछ मारी अर तेथ बी निं तिन्नैं किछ़ ज़िऊंदअ छ़ाडअ। लिब्ना नगरीए राज़ै संघै बी किअ ज़ैहसू तिहअ ई ज़िहअ तेऊ जेरिहो नगरीए राज़ै संघै किअ त।
लिब्ना नगरी ज़िती करै डेऊऐ ज़ैहसू अर तेऊए इज़राईली सैना लकीश नगरी लै संघा दैनअ तिन्नैं फेरा-फेर गोट संघा पल़ै तिन्नां लै चुटी। बिधाता दैनी इज़राईली लै लकीश नगरी दी ज़ीत संघा गिम्मी सारी नगरी आप्पू लै। लकीश नगरी बी पाऐ तिन्नैं लिब्ना नगरी ज़िहै सोभ मारी अर तेथ बी निं किछ़ ज़िऊंदअ छ़ाडअ। पर गज़ेर नगरीओ राज़अ होराम आअ लकीश नगरी बच़ाऊंदअ इज़राईली संघै जुधा लै। पर ज़ैहसू अर इज़राईली मारै तिंयां इहै कि तिन्नां मांझ़ै बी निं कोह ज़िऊंदअ रहअ।
लकीश नगरी गिम्मी डेऊअ ज़ैहसू सारी इज़राईली सैना संघी एगलोन नगरी लै संघा पाऐ तिन्नैं तैहा नगरी फेर डेरै। तिन्नैं गिम्मी सह नगरी तैहा ई धैल़ी अर तेथ बी पाऐ सोभ तिहै ई सोभ मारी ज़िहअ तिन्नैं लकीश नगरी किअ त।
एगलोन नगरी ज़िती करै डेऊए ज़ैहसू अर तेऊए इज़राईली सैना उझै धारा बाखे मुल्खा बाखा हेब्रोन नगरी लै संघा छ़ेल़अ तिन्नां संघै जुध। तिन्नैं गिम्मी सह सारी नगरी अर राज़अ अर नगरीए सोभ मणछ पाऐ मारी अर तेता ओरी-पोरी गराऊंऐं बी निं तिन्नैं कोह ज़िऊंदै छ़ाडै। ज़ैहसू बझ़ैल़ी नगरीए सोभ गल्ला बरैबाद करनै ज़िहअ तेऊ एगलोन नगरी किअ त। तेथ निं कोहै ज़िऊंदअ छ़ुटअ।
तेखअ फिरै ज़ैहसू अर तेऊए इज़राईली सैना दबीर नगरी बाखा संघा छ़ेल़अ तिन्नां संघै जुध। सह नगरी बी गिम्मी तिन्नैं राज़ै अर ओरी-पोरी गराऊंआं संघी। तिधी बी पाऐ तिन्नैं सोभै मारी। दबीर नगरी अर तेते राज़ै संघै बी किअ तिन्नैं तिहअ ई ज़िहअ हेब्रोन अर लिब्ना नगरी अर तिन्नें राज़ै संघै किअ त।
इहअ करै ज़ितअ ज़ैहसू सह सारअ देश। धारा बाखो मुल्ख, पछ़मा बाखा सऊंई ज़ैगा, दखणा बाखा रेगीस्तान, खारै समुंदरा तैणींए रेल़ी ज़ैगा। तेथ पाऐ तिन्नैं राज़ै संघी सोभ मारी अर तेथ निं कोहै ज़ीब बी ज़िऊंदै छ़ाडै। इहअ करनैओ हुकम त तिन्नां लै इज़राईले परमेशर बिधाता किअ द। ज़ैहसू पाऐ दखणा बाखा कादेश-बर्ना पोर्ही गाज़ा समुंदरे बाढै तैणीं, गोशेन सारै मुल्खै उतरा बाखा गबोन तैणीं सोभ मारी। ज़ैहसू भेटी पैहली ई फेरी तिन्नां सोभी राज़ै अर तिन्नें मुल्खै ज़ीत किल्हैकि इज़राईलो परमेशर बिधाता थिअ जुधा लै इज़राईली बाखा जुधा करनै आल़अ आप्पै। तेखअ पुजअ ज़ैहसू इज़राईली सैना संघी गिलगाल मुल्खै फिरी ज़िधी तिन्नैं डेरै तै पाऐ दै।
Source notes (6)
- Footnote अदोनीसेदका मतलब आसा धर्मीं राज़अ
- Cross-reference बधा. 28:21
- Cross-reference भज. 18:13-14; ईशा. 30:30
- Cross-reference 2 शमू. 1:18
- Cross-reference भज. 2:8-12; 110:1
- Footnote आझ़ तैणीं बी तिधी ऐहा कताबा लिखणैं आल़ेए ज़िऊंदी ज़िता तैणीं
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.