Kulvi Outer Seraji Bible
आयूब 28
सुन्नैं-च़ंदीए हआ खान
“सुन्नअ-च़ंदी आणा लोग खांनी का कोती,
तेता धोई च़ोखअ बी ज़ाणा तिंयां करी।
लोहअ बी लागा धरती का कोती करै काढणअ अर
कांस्सअ बी निखल़ा शाफल़ा जैंदरा का गाल़ी करै।
इना सोभी धातू काढणा लै
खण्हां लोग धरती दी उंधै डुघी खात्ती संघा आणा तिन्नां
पात्थरा लोल़ी ज़ेता का ईंयां धातू निखल़ा।
ईंयां च़िज़ा निं घअरा फेर भेटदी ज़िधी हाम्हैं बस्सै दै हआ,
एता लै डेओआ दूर-दूर तैणीं हांढी ज़िधी आम मणछ डेऊंदअ ई निं आथी,
संघा डेओआ राश्शी करै च़ुंढुई उंधै डुघी खात्ती दी।
धरती प्रैंदै, बऊआ मणछ फसल,
पर तैहा ई ज़िम्मीं हेठै हआ भितरी
आगी ज़िहअ घोर घमास्स लागअ द ज़ुंण पात्थरा बी दैआ गाल़ी।
धरतीए पात्थरा जैंदरी लोल़ा मणछ नीलमणीं
अर माट्टै जैंदरा का काढा सुन्नअ।
इना खांनी खण्हनै आल़ेए बातो निं कहा काअ-गरली बी थोघ हंदअ,
नां तिन्नां प्रैंदै उझै बाज़ हंदै डैऊंदै लागै दै।
तिंयां हआ एही-एही ज़ैगा पुजै दै, तेथ निं कुंण शकारी ज़ीब बी डेऊंदअ
नां तैहा बाता कधू सिह हांढदअ।
तिंयां फाल़ा काठै-का काठै पात्थरा,
बडी-बडी धारा झ़ैऊआ तिंयां गोधी का।
तिंयां बणाआं शाफल़ कोती, लाम्मी-लाम्मी जुहल़ी
संघा लोल़ा तेथ किम्मती पात्थर।
तिंयां लोल़ा पाणींए दरैओ मूल़
अर तिंयां लोल़ा एही-एही ज़ैगा ज़ुंण कोही निं भाल़ी।
अक्ल किधा का भेटा?
अक्ल किधा का सका भेटी?
हाम्हैं किधा का सका शिखल़ी अर समझ़ी।
अक्ल निं एऊ संसारै हाम्हां मणछा जैंदरी भेटदी
नां कहा का तेते असली किम्मत थोघ आथी।
अक्ली लोल़ै ज़ै समुंदरे थाल्लै बी पुजे,
सह निं तेथ बी च़ाल्ली भेटी।
तेता निं च़ोखअ सुन्नैं-च़ंदी दैई बी मोलै लई सकदै।
तेते किम्मत आसा च़ोखै सुन्नैं अर
किम्मती मणीं का बी खास्सी।
च़ोखअ सुन्नअ, अर खास्सअ किम्मती
शिशअ बी निं तेता सेटा किछ़ै आथी।
हीरै, मोती, किम्मती नघो
मोल बी निं अक्ली सेटा किछ़ आथी।
ज़ुंण पुखराज़ नघ कूश देशै भेटा अर
च़ोखअ सुन्नअ बी निं अक्लीए बराबरी करी सकदअ।
तै अक्लीओ मूल़ किधी आसा?
तेता हाम्हैं किधा का सका समझ़ी अर शिखल़ी?
तेता निं कोहै ज़िऊंदअ ज़ीब भाल़ी सकदअ,
सरगै डेऊणैं आल़ै च़ेल्लू-पखीरू बी निं तेता भाल़ी सकदै।
मौत अर बरैबादी बी बोला तेते बारै एचल़ी,
‘हाम्हैं आसा अक्लीए बारै गल्ला शूणीं दी।’
अक्लीओ थोघ आसा सिधअ परमेशरा का,
तेऊ का आसा थोघ कि अक्ल किधी भेटा,
किल्हैकि सह ई सका धरतीए पुंझ़ै तैणीं भाल़ी,
सह हेरा सारै भ्रमंडै भाल़ी कि तेथ किज़ै लागअ द हंदअ।1
सह तोला बागरी ज़ेही तराकल़ी दी कि केतरी ज़ोरै लोल़ी लागी अर
पाणीं दैआ सह नापी करै कि केतरअ सरग लोल़ी हुअ।
सह करा एतो बच़ार आप्पै कि सरग किधी लोल़ी हुअ अर
गुल़ूबिज़ल़ू कैहा ज़ैगा लोल़ी लागअ।
तेऊ आसा अक्ल आप्पै ज़ाच़ी-भाल़ी दी कि तेतो मोल किज़ै आसा,
अर सह तेता लै हाँ करनै आल़अ बी आसा सह ई।
स्वर्गे सारी सैनो मालक बोला हाम्हां मणछा लै इहअ,
‘मुंह परमेशरे डरा हेठै रहणअ ई आसा अक्ल,
बूराई का दूर रहणअ ई आसा समझ़।’”
Source notes (1)
- Cross-reference भज. 11:4
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.