Kulvi Outer Seraji Bible
आयूब 27
हुंह हुअ बेघै दुखी
आयूब लागअ तेखअ एही सैणीं गल्ला बोल्दअ,
“महान परमेशर ज़हा का सारअ बल आसा,
हुंह बोला तेऊए सोह खाई कि
सह ई निस्सअ मेरअ नसाफ करी अर
तेऊ ई किअ मेरअ ज़िऊ कल़ुअ।
ज़ेभै तैणीं मुंह दी परमेशरो शाह रहे,
मुंह रहणअ तेभै तैणीं आपणीं ज़िभा
अर खाखा का शुची गल्ला खोज़दै लागी।
हुंह निं ऐहा गल्ला बोली सकदअ कि तम्हैं आसा शुचै,
ऐहा गल्ला का निं हुंह मरनै तैणीं
पिछ़ू हटदअ आथी।
मुखा आसा थोघ कि हुंह आसा शुचअ
अर हुंह निं छ़ाड़ छ़ाडदअ किल्हैकि मेरै मन्नैं निं किछ़ै खोट आथी।
हुंह करा एही अरज़ कि ज़ुंण मुंह संघै ज़ीद डाहा,
तिन्नां लोल़ी ती कदुष्ट अर
पापी मणछा ज़ेही सज़ा भेटी।
कदुष्ट मणछा तेभै किज़ै आशा रहणीं
ज़ेभै परमेशर तिन्नां लै मौत दैए?
ज़ेभै तिन्नां आफ़त पल़णीं,
तेभै कै परमेशरा तिन्नें लेर-पकार शूणीं हेरनी? सह निं शुणदअ।
किल्हैकि ईंयां निं तिंयां मणछ आथी
ज़ुंण तेऊ परमेशरे च़ाकरी दी सुखी रहा ज़हा का सारअ बल आसा।
हुंह खोज़ूं तम्हां का कि परमेशरो बल किहअ महान आसा अर
परमेशरै किज़ै आसा सोठी डाहअ द।
पर तम्हैं हेरी ईंयां सोभै गल्ला आपणीं आछी भाल़ी,
तेखअ किल्है बोला तम्हैं मुल्है एही नथोघी गल्ला।
परमेशर कदुष्टा संघै किहअ बभार करा
परमेशर ज़हा का सारअ बल आसा, हुंह खोज़ूं तम्हां का भाल़ै तेऊ
कदुष्ट मणछा लै केही सज़ा दैणीं।
हई सका कि तिन्नें खास्सै शोहरू-शोहरी होए,
पर तिंयां पाणै जुधा दी सोभै मारी,
तिन्नें शोहरू-माठै निं रज्ज़ी खाणां लै रोटी बी हणीं।
ज़ुंण पिछ़ू ज़िऊंदै बच़े,
तिंयां मरनै नबिज़री बमारी करै,
तिन्नें बिधबा बेटल़ी निं तिन्नां लै शोग बी करनअ।
कदुष्ट मणछै सुन्नअ-च़ंदी माट्टे रूल़ा ज़िहअ
किल्है निं होए झाल़ी डाहअ द,
च़ाऐ तिन्नां का खास्सै झिकल़ै किल्है निं होए,
पर तिन्नां निं तिंयां बान्हणैं भेटणैं, तेतो भलअ हणअ कहा धर्मीं मणछा,
अर तिन्नों सुन्नअ-च़ंदी भेटणअ कहा मानदार मणछा।
कदुष्ट बणाआं आपणअ घअर जांगूए जगोल्हा ज़िहअ अर
खेचै पहरीए छ़ानां ज़िहअ।
तिंयां पापी ज़ै सेठ हई च़ैन्नै सुत्ते,
पर ज़ांऊं तिंयां सुत्ती उझ़णै, तिंयां हणैं दाल़जी गऐ दै हई।
तिन्नां पल़णीं बरसाती आई दी गाडा ज़ेही नच़ानक डअर,
तिंयां फर्लाऊंणैं हारनै-मारनै आल़ी ढिश-बागरी ज़िहै दूर।
पुर्बा बाखे बागरी च़कणै तिंयां उझै
संघा शोटणै किधी दूर।
तिंयां फिरनैं तेता का बच़दै पर
तिन्नां लै पल़णीं आफ़ता प्रैंदै आफ़त, परमेशरा निं तिन्नां लै झींण फिरनी।
ढिश-बागरी पाणीं मणछा ज़ेही ताल़ी बाज़ी शल़ेल़्हा
किल्हैकि तिंयां फर्ल़ाऊऐ तिन्नें ज़ैगा का दूर।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.