Kulvi Outer Seraji Bible
आयूब 29
आयूब लागअ पिछ़ली गल्ला आद करी बोल्दअ
आयूब लागअ तेखअ एही सैणीं गल्ला बोल्दअ,
“तिंयां धैल़ै भाल़ किहै डेऊऐ,
परमेशर करा त आप्पै मेरी हेर-सभाल़,
परमेशर हआ त कबल्लअ मुंह संघै
न्हैरै हांढणा लै दैआ त सह मुल्है प्रैश्शअ।
मेरी ज़िन्दगी तै इहै बी धैल़ै कि हुंह त सोभी गल्ला लै सेठ,
मेरी साथ थिई परमेशरा संघै अर
तेता करै रहा त हुंह राज्ज़ी-राम्बल़अ।
सह परमेशर रहा त मुंह संघा ज़हा का सारअ बल आसा,
खेचै-खहल़ै त मुंह आपणैं शोहरू-माठैओ कामां लै सकाल़अ।
तिन्नां धैल़ै न्हैईआ त हुंह दुधा करै,
शाबू आल़ी ज़िम्मीं दी लागै दै जैतूने बूटा का हआ त
मेरै खास्सअ जैतूनो तेल।
नगरीए प्रऊल़ी सेटा सभा दी
बेशा त हुंह खास सैणैं संघै आजू,
सभा दी मेरै एछदी सिक्का तै खारकै मणछ मेरअ अदर करना लै
ओर्ही-पोर्ही अर सैणैं मणछ करा तै खल़अ उझ़ुई मेरअ अदर।1
मेरै सभा दी पुजदी हआ तै सोभ ज़ण्हैं च़ुपच़ाप
खास-खास सैणैं बी रहा तै तेभै च़ुप्पी।
सोभै मणछ हआ तै मुल्है राज्ज़ी
मुंह भाल़णैं अर शुणनै आल़ै हआ तै
मेरै कामां लै राज्ज़ी अर खुश।
रैनै-गरीब अर छ़ुटै-मुक्कै दै लान्हें
लेर-पकार शूणीं डेओआ त हुंह तिन्नें
मज़त करना लै सोभी का आजू।
खास्सी दाह-दुखा दी पल़ै दै मणछ
बी बोला तै मुल्है भलअ,
बिधबा बेटल़ीए मज़त करना लै मेरै कामां करै हआ ती तिन्नें दिलै बी खुशी।
मानदारी अर धर्मीं ज़िन्दगी ती
मंऐं च़ोल़ै अर साफै ज़ेही बान्हीं दी।
मंऐं किई लोगे एही च़ाकरी कि कांणै लै थिअ हुंह आछी ज़िहअ
अर लाट्टै लै थिअ हुंह ज़ांघा ज़िहअ।
रैनै-गरीबा लै थिअ हुंह तिन्नें ईजा-बाबा ज़िहअ,
पाखलै मणछे तोही करा त हुंह
दालता दी डेऊई तिन्नें मज़त।
कदुष्ट मणछे दैआ त हुंह दांद चोल़ी अर
तिन्नें बशै पल़ै दै मणछा आणा त हुंह छ़ड़ैऊई।
तधू काल्ला सोठा त हुंह इहअ कि मेरी लोल़ी ती खास्सी अमर हुई
ज़ेभै मुल्है मौत बी एछे,
तेभै लोल़ी त हुंह आपणैं घअरै आपणैं टबरा जैंदरी हुअ।
तिन्नां धैल़ै त हुंह इहै बूटा ज़िहअ,
ज़ेते ज़लैल़ै डुघै अर
शाण्हीं दी कबल्लअ ओश हआ पल़अ द।
मुंह सराहा तै सोभै अर सोभै करा तै मेरअ अदर,
तेता करै भेटा त मुंह होर बी खास्सअ बल।
ज़ांऊं हुंह बोल्दअ लागा थिअ, तेभै निं कुंण चूँ बी करदअ त,
तिंयां शूणां तै मेरी सलाह धैन-मन्न लाई।
ज़ांऊं हुंह गल्ला खोज़ी मुक्का त तेखअ निं सभा दी मेरी गल्ला दी किज़ै ज़ोल़णे ज़रुरत हंदी ती,
मेरी गल्ला हआ ती तिन्नां लै गरमींए धैल़ै पाणींए छ़ाल्लै ज़ेही।
सोभै हआ तै मेरी गल्ला लै इहै राज्ज़ी ज़िहअ
बरसात हणां लै कृषाण राज्ज़ी हआ।
ज़ेभै लोग किज़ू लै पठी हैअ हेरा तै चोल़ी,
तिन्नां बाखा दैआ त हुंह मसुस्सुऐ हास्सी नदर अर तेता करै एछा त तिन्नां हैअ।
तिन्नां लै त हुंह ई सैणैं ज़िहअ अर
तिन्नां लै बात खोज़णैं आल़अ बी हआ त हुंह ई।
ज़िहअ राज़अ आपणीं सैना जैंदरी हआ, तिहअ त हुंह तिन्नां लै।
हुंह दैआ त तिन्नां लै तिन्नें दाह-दुखा
जैंदरी हैअ विश्वास।”
Source notes (1)
- Cross-reference बधा. 21:19; रूत. 4:1; 2 राज़. 7:1,11
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.