Kulvi Outer Seraji Bible
आयूब 21
आयूबो सोपरा लै ज़बाब
आयूबै बोलअ इहअ,
“मेरी गल्ला शूणां धैन दैई,
हुंह च़ाहा तम्हां बाखा एही ई झेठ।
धख लआ तम्हैं मेरी गल्ला पोर्ही शूणीं,
ज़ांऊं हुंह गल्ला करी मुक्के,
तेखअ रहै च़ाऐ तम्हैं मेरै सुहांगा लागी।
हुंह निं मणछा संघै हठल़दअ आथी लागअ द,
मेरी हठ आसा परमेशरा संघै, तैही आसा मुंह भितरा का बुआल़ लागै दै।
मुंह बाखा दैआ भाल़णीं। एतरअ तम्हां लै थोल़अ आसा कि
तम्हैं झशकिए अर दांदा हेठै गुंठी पाई च़ुप्पी रहे?
आप्पू लै एऊ दाह-दुखे बारै सोठी फिरा मुंह हैल़अ,
अर मुंह छ़ुटा सारी घेरी काम्मणीं।
परमेशर किल्है दैआ कदुष्ट मणछा राज्ज़ी-मौज़ी ज़िऊंणै?
तिंयां हआ खास्सै प्रोढै तज़ी बी रहा हेरे तिन्नें धन-माया होर बी खास्सी हंदी लागी!
तिन्नें हआ शोहरू-माठै अर दादू-पोचू अर
तिंयां रहा तिन्नां बडै हंदै भाल़णा लै ज़िऊंदै!
तिन्नें घअरै निं किछ़ै आफ़त पल़दी अर
नां तिन्नां किज़ै हैल़अ फिकर हंदअ।
ज़ेभै बी तिन्नें बल्द गाऊई सेटा डेओआ, तिंयां जाआ झ़ट च़ारै गाभणीं हई,
नां तिन्नां लै कधू इहअ हंदअ कि तिन्नें गाऊई चूई होए।
तिन्नें लान्हैं-सुन्हैं रहा बागै नाच़दै-खेल्हदै अर
होछ़ै छ़ेल्हू ज़िहै त्रुपल़ै दैंदै लागी।
तिंयां रहा डफली, बींन अर बशूरी बाज़ी
गिहा बोल्दी नाच़दै अर खुशी।
तिंयां रहा आपणीं ज़िन्दगी राज्ज़ी-मौज़ी,
तिन्नां निं मरनै का आजी बी किछ़ै दाह-खीज़ हंदी।
हाम्हां दैआ कांगनरांगै रहणैं
कदुष्ट मणछ बोला परमेशरा लै तोही इहअ कि
तूह रहअ हाम्हां का दूर ई!
हाम्हां निं एता का मतलब आथी कि तूह किज़ै च़ाहा
अर हाम्हां केऊ साबै च़ाहा कि हाम्हैं आपणीं ज़िन्दगी ज़िऊए।
तिंयां सोठा इहअ कि तेऊ महान परमेशरे नां च़ाकरी करने ज़रुरत आथी अर
नां तेऊ सेटा अरज़ करी किज़ै भेटी च़ाल्लअ।
तिंयां बोला इहअ कि हाम्हैं हणैं आपणैं बलबुतै सफल,
पर ज़ेऊ साबै तिंयां सोठा
तैहा गल्ला निं हुंह मंदअ ई आथी।
तम्हैं कधू इहअ भाल़अ बी कि कदुष्ट गअ खारकी अमरा मरी?
तिन्नां मांझ़ै कहा एकी बी पल़ी कधू आफ़त?
तिन्नां लै परमेशरे कधू रोश्शै सज़ा दैनी होए? इहअ निं कधि हुअ।
कि तम्हैं कधू इहअ भाल़अ कि तिंयां फर्ल़ाऊऐ इहै दूर
ज़ेही बागरी भुखलै अर कुर्लू बागरी
धूल़अ-माट्टअ च़की दूर फर्ल़ाऊआ? इहअ बी निं कधि भाल़अ।
तम्हैं बोला इहअ कि शोहरू बी पल़ा आपणैं ईजा-बाबे सज़ा भुगतणी।
इहअ किल्है लोल़ी हुअ? हुंह, बोला इहअ कि
ज़ुंणी पाप किअ परमेशरै लोल़ी सज़ा बी तिन्नां ई लै दैनी,
तै लागणअ तिन्नां का थोघ कि तिन्नैं किअ पाप अर
तेथ पिछ़ू भेटी तिन्नां सह सज़ा।
तिन्नां लोल़ी तिन्नें पापे सज़ा आप्पै पल़ी भुगतणी,
तिन्नां का बी लोल़ी ज़ाण्हुंअ कि तेऊ परमेशरो कोप किहअ आसा
ज़हा का सारअ बल आसा।
ज़ै मणछ मरी गअ, तेखअ निं तेऊ इहअ किछ़ै फिकर हंदअ कि
पिछ़ू तेऊए बेटल़ी-माठै राज्ज़ी-मौज़ी आसा कि नांईं।
शूआ का शल़ोक निं खोज़णैं
इहअ कुंण आसा ज़ुंण तेऊ परमेशरा लै शिक्षा दैए
ज़ुंण देशा-देशे बडै-बडै राज़ैओ बी नसाफ करा।
कई रहा मरने धैल़ी तैणीं ताज़ै-नरोगै,
तिन्नां भेटा मौत बी खुशी-खुशी,
तिन्नें देही दी हआ खिरी तैणीं भरपूर तागत।
कई मणछा हआ सारी ज़िन्दगी दुख ई दुख,
मरदी बारी बी हआ तिन्नां लै दुखे गांठल़ी संघा।
पर खिरी डेओआ सोभै माट्टै ई जैंदरी,
मरी करै पल़ा तिन्नां दुहीए देही दी किल़ै।
मेरै साथीओ, मुखा आसा थोघ कि तम्हैं किज़ै सोठा,
मुंह हारना लै थारी बिक्री बी हेरा हुंह ज़ाणीं।
तम्हैं बोला इहअ,
‘तेऊ मशूर मणछो घअर ऐबै किधी आसा?
ज़ुंण बेघै कदुष्ट अर बूरअ आसा त?’
पर लआ आप्पू फेर होरी का पुछ़ी,
तिन्नां हेरनी तम्हां का खोज़ी कि असली गल्ल किज़ै आसा।
तिन्नां भाल़ी जाणअ तम्हां का शुझुई कि
ज़ेभै परमेशर रोश्शै सज़ा दैआ, तेता का निखल़ा कदुष्ट मणछ शुक्कअ बच़ी,
सह हआ माहा प्रल़ये धैल़ी लै बच़ाऊई डाहअ द।
कदुष्ट मणछे मुंहैं निं कोहै बोल्दअ कि तूह आसा बूरअ,
ज़ुंण तिन्नैं ज़ुल्म किअ, तेतो बी निं तिन्नां का कोहै बदल़अ लंदअ।
मरी करै हआ तिन्नें ल्हासो बी बडअ अदर अर
मल्थाना लै निंदा बारी बी हआ तिन्नें शान,
हज़ारो मणछ डेओआ तिन्नें ल्हासा आजू पिछ़ू मल्थाना तैणीं,
धरती बी करा आपणैं घअरै तिन्नों सुआगत!
तम्हैं आसा बृथा गल्ला करी मुंह झेठू लागै दै!
तम्हैं निं एक बी ज़बाब शुचअ दैनअ!”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.