Kulvi Outer Seraji Bible
आयूब 20
तेरी गल्ला का हुई मुंह नफरत
नमाती मुल्खो सोपर लागअ आयूबा लै इहअ बोल्दअ,
तेरी गल्ला ठैऊऐ मुल्है शूल़,
ऐबै निस्सअ मेरै ताल्है बोल़णैं बाझ़ी रहूई।
तंऐं शोट्टअ हुंह आपणीं गल्ला करै बेइज़त करी,
पर मुखा आ तेरी गल्लो ज़बाब आसा।
ताखा एतरअ, हणअ थोघ कि पैहलकै जुगै ज़धू
मणछ धरती दी बस्सै, तधू तिन्नां लै किज़ै बधान आसा त?
कि कदुष्ट अर पापी मणछे
खुशी हआ थोल़ी घल़ीए।
हई सका कि तिंयां खास्सै बलबान अर स्वर्गै तैणीं मशूर होए,
तिंयां इहै महान होए कि तिंयां आपणीं बाहा करै उझै बादल़ बी छ़ुंए,
पर तिंयां फर्लाऊंणैं धूल़ै माट्टै ज़िहै दूर।
तिन्नें ज़ाणूं-बछ़ैणूं लागणै तिन्नां लोल़ै कि
तिंयां केस्सी पेठै!
तिंयां लुक्कणै राची भाल़ै दै सुपनै ज़िहै,
अर तेखअ निं तिंयां भिई शुझणैं।
कदुष्ट मणछ ज़िधी बस्सै दै हआ तिंयां हणैं तिधा का खतम,
तिधी निं तिंयां तेखअ कोही का भिई शुझणैं।
आपणीं ज़िन्दगी ज़ुंण तिन्नैं लुटअ-घशिट्टअ द आसा,
सह लागणअ तिन्नां बाद तिन्नें आजू लुआदा
तिन्नां लै बापस दैणअ फरेऊई ज़हा रैनै-गरीबा का सह लुटअ द आसा।
कदुष्ट जाणैं खारकी अमरा मरी।
पापी झ़ूरा पाप करना लै
कदुष्ट मणछा लागा पाप करने मिठ,
तिंयां डाहा तेता किज़ू च़िज़ा ज़िहअ ज़िभा हेठै ताकि तिन्नां सुआद लागी रहे,
तेखअ रहा सुलै-सुलै तेते रसा घुटदै लागी।
पर तिन्नैं खाई दी रोटी फिरनी तिन्नें पेटै
शपैल़े बिशा ज़िहअ झ़रील्लअ।
ज़ुंण धन-माया तिन्नैं लुटी-घशिट्टी घुटी,
सह लागणीं तिन्नां पोर्ही हुकरनी
परमेशरा काढणीं सह तिन्नें पेटा का बी गुंठी पाई उझै बापस।
कदुष्ट मणछा लै हआ ईंयां शपैल़े बिशा झुटणैं ज़ेही,
एता करै हआ तिन्नें एही मौत ज़िहअ कुंण झ़रीली दानुईंए चटाक बाहणैं करै मरा।
तिंयां निं तेऊ रज़दै-पज़दै देशै बस्सणा लै साझ़ू हई सकदै ज़ेथ
जैतूनो तेल अर दुधा-मखीरे गाडा बगा।
ज़ेता लै तिन्नैं खास्सी मैन्थ किई, सह लागणीं तिन्नां छ़ाडणीं,
तिन्नां निं तेता खाणैं ज़िऊंणेंओ सुख भेटणअ।
किल्हैकि तिन्नैं सह आसा तिन्नैं रैनै-गरीबा ठगी करै लुटअ द,
तिन्नैं गिम्मै तिंयां घअर ज़ुंण होरी आप्पू लै बणाऐं तै।
तिन्नां हआ मांण कि सोभै गल्ला लोल़ी तिन्नां ई भेटी
अर तिंयां निं कधि रज़दै।
ज़ेभै तैणीं तिंयां पठी लुटी निं मुक्कै,
तेभै तैणीं निं तिंयां पिछ़ू हटदै,
तैही निं तिंयां बी खिरी किछ़ू गल्ला लै सफल हंदै।
खास्सै सेठ हई बी पल़ा खिरी तिन्नां लै आफ़त,
तिन्नां लागा रैनै-गरीबे कार-च़ुंआर
संघा हआ तिंयां पठी बरैबाद।
परमेशर दैआ तिन्नां ज़िहअ तिंयां च़ाहा तिहअ खाणैं अर
खिरी काढा सह सारअ रोश्श तिन्नां ई प्रैंदै संघा हआ तिंयां खतम।
ज़ेतरी तिंयां लोहे तलबारा का बच़णा लै ठुर्हा,
तेतरी हेरनै तिंयां कांस्से कबाणा का निखल़ै दै कतीरा करै मारी।
तिंयां कतीर निखल़णैं तिन्नें पिठी लागी पेटा आजू बागै,
कतीरे तिछी च़ुंज़ी करै हणीं तिन्नें काकल़ी-बुक्की छिझी,
तिन्नां हणीं भितरी मरने डअर पल़ी दी।
ज़ुंण बी खज़ानै तिन्नैं झाल़ी हणैं डाहै दै,
तिंयां हणैं बरैबाद,
परमेशरा छ़ाडणीं तिन्नां लै एही आग कि
तिंयां हणैं आपणैं डेरै अर
सारी धन-माया संघी खतम।
भ्रमंडै हणअ तिन्नों पाप प्रगट अर
धरती हणीं तिन्नें कदुष्ट कामें शाजत।
परमेशरो रोश्श हणअ तिन्नां लै एही गाडा ज़िहअ
ज़ेता तिन्नें घअर अर सारी ज़ैदात पठी पाणीं घर्होहल़ी।
कदुष्ट मणछा भेटणअ खिरी अह ई फल,
परमेशरै आसा खिरी तिन्नें हेस्सै इहअ ई डाहअ द।1
Source notes (1)
- Cross-reference आयू. 27:13
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.