Kulvi Outer Seraji Bible
आयूब 19
आयूबै दैनअ बिल्दादा लै ज़बाब
आयूबै बोलअ इहअ,
तम्हां कधू तैणीं रहणअ आपणीं गल्ला करै
मुंह दुखी करदै अर हंतदै लागी?
हर गल्ला लै मेरी बेइज़ती करी तम्हैं अज़ी बी रज्ज़ै निं?
तम्हां आप्पू शरम निं एछदी कि
तम्हैं मुंह दाहुऐ दै मणछा संघै किहअ बभार करा!
ज़ै मंऐं पाप बी किअ होए,
तेते बी निं तम्हां किछ़ै फाही पल़ी आथी।
तम्हैं सोठा इहअ कि तम्हैं आसा मुखा भलै,
मुल्है खोज़ा तम्हैं एही सलाह कि
मंऐं किअ पाप तैही पल़ी मुल्है ईंयां आफ़ता!
थारी आछी का शुझदअ निं आथी कि एता करनै आल़अ आसा परमेशर आप्पै?
मुंह ढाकणा लै आसा तेऊ आप्पै शकारीओ ज़ज़ाल़ डाहअ द छ़ैई।
मंऐं मांगी लेर-पकार पाई मज़त,
पर मेरी निं कोही शूणीं!
हुंह रहअ बोल्दअ लागी कि मुंह संघै लागअ उपद्रभ हंदअ
पर मुंह निं नसाफ भेटअ आथी।
परमेशरै डाहै मुल्है सोभै दुआर बुदरी, हुंह निं बागै निखल़ी सकदअ,
तेऊ डाह मुल्है न्हैरअ करी अर मुखा निस्सी आजू बात शुझुई।
तेऊ किई मेरी शोभा-शान
अर ज़ैदात मुखा दूर।
तेऊ किअ हुंह फेरा-फेर बरैबाद,
तेऊ किई मेरी आशा ढूल़ै दै बूटा ज़ेही
गोधी का पेच़ी खतम ताकि हुंह शुक्के अर मरे।
परमेशर आसा मुल्है रोश्शै लाल-पिंऊंल़अ हुअ द,
तेऊ किअ मुंह संघै आपणैं ज़ानीं दुशमणा ज़िहअ बभार।
तेऊए सैना आसा मेरै डेरै फेर,
तिन्नैं आसा हुंह गोटी डाहअ द।
हुंह हेरअ सोभी बिस्सरी
परमेशरै किअ इहअ कि मेरै भाई-बंधै बी डाहअ हुंह कल्ही शोटी,
मेरै ज़ाणूं बछ़ैणूं बी फिरै मुल्है ऐबै पाखलै,
नातै-रिश्तैदार बी निस्सै ऐबै मुंह नेल़ एछी।
ज़ुंण मेरै घअरै प्राहुंणैं बी एछा तै, तिंयां बी बिस्सरुऐ मुंह पठी,
मेरै दास-दासी फिरा मुल्है पाखलै ज़िहअ कि हुंह आसा कुंण परदेसी।
मेरअ दास निं मेरी हाक्का बी शुणदअ,
मुंह एछा ज़ीबाण करी अंतै, तज़ी बी निं सह मुंह सेटा एछदअ!
मेरी बेटल़ी फिरा मेरै शाहे बास्सा का च़िल़्ह,
मेरै टबर अर सक्कै भाई मांझ़ै बी निं
मुंह नेल़ कोहै एछदअ, तिन्नां बी लागा मुखा च़िल़्ह।
लान्हैं-सुन्हैं बी रहा मुखा दूर,
ज़ै तिंयां मुंह नेल़ एछा बी, तेभै लागा तिंयां मुंह भाल़ी
मुल्है हास्सदै अर मेरै सुहांगा करदै।
मेरै सोभी का खास साथी बी हुई मुखा नफरत,
ज़हा लै हुंह खास्सअ झ़ूरा त, तिंयां बी हुऐ आझ़ मेरै बरोधी।
मेरी खाल बी शाची हाडकै दी ल़पट्ट, हुंह हुअ च़ार काठ शुक्कअ अर
हुंह आसा बडी मस्सा ज़िऊंदअ लागअ द।
तम्हैं आसा मेरै खास साथी, धख ता करा मुल्है झींण आरो!
परमेशरै डाहअ हुंह आपणैं हाथै मरदअ पाई।
ज़िहअ मुल्है परमेशरै किअ, तिहै किल्है आसा तम्हैं बी मुंह हंतदै लागै दै?
अज़ी बी थारै रज्ज़ुअ निं आथी?
हुंह च़ाहा त इहअ कि कुंण मेरी गल्ला बही दी लिखी डाहंदै अर
मेरी इना गल्ला आद डाहंदै!
कि मेरी इना गल्ला छ़िणीं करै किधी टोल्हा दी डाहंदै लिखी
ताकि तेथ तिंयां सदा लै रहंदी।
पर एतरअ आसा मुखा बी थोघ कि ज़िऊंदअ परमेशर ज़ुंण स्वर्गै आसा,
सह जाणअ खिरी मुंह बच़ाऊंदअ उंधै धरती लै एछी।
च़ाऐ मेरी सारी देही बी चिजे-शल़े,
तज़ी बी लणैं मुंह ऐहा देही दी बिधाते दर्शण करी।
मुंह भाल़णअ सह आप्पै आपणीं आछी,
हुंह आसा तैहा घल़ी न्हैल़अ-भाल़अ लागअ द।
“मेरै साथीओ, तम्हैं, सोठा इहअ कि
एऊ का हाम्हां किहअ करै ज़ितणअ? तैही काढा तम्हैं
मुंह दी खोट कि मुल्है अह आफ़त पल़णीं आसा मेरअ ई कशूर!
पर तम्हां लै बोला हुंह इहअ कि तैहा तलबारा का डरा,
ज़ुंण हेरा-हेरी पापी लै सज़ा दैआ,
तेखअ लागणअ तम्हां का थोघ कि नसाफ किहअ हआ।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.