Kulvi Outer Seraji Bible
आयूब 18
बिल्दाद बोला आयूबा लै,
शूही मुल्खो बिल्दाद लागअ आयूबा लै इहअ बोल्दअ,
“आयूब, ताह केभै तैणीं रहणअ इहै बोल्दै ई लागी?
ज़ै, म्हारी गल्ला शुणनी ई निं, तै किज़ै लाअ हाम्हैं बोली?
तूह कै समझ़ा कि हाम्हैं
ऐडै अर डागै ज़िहै आसा?
तूह लागअ द तेरै रोश्शा करै आप्पू ई दझ़दअ!
तेरै रोश्शा करै कै धरती दी ज़ाज़री च़ाल्ली हई?
ताह मनैऊंणा लै कै परमेशरै पर्बत ओर्ही-पोर्ही लाऐ सकैऊई?
कदुष्ट मणछे लाटू हिठणै पठी,
तिंयां निं तेखअ भिई ज़ल़दै।
तिन्नें डेरै हणअ नटिप्प न्हैरअ।
तिंयां हांढा तै आज़रै,
पर ऐबै जुंघल़णै तिंयां धरनीं,
ज़ुंण तिंयां बिक्री सोठा तै, तिंयां बधल़णैं तेता ई करै।
तिन्नें गंईं पल़णीं ज़ज़ाल़ा प्रैंदै, अर तिंयां शाचणैं तेथ,
तिन्नें घुंढी शाचणी खल़ाक्की दी पिड्डी।
तिन्नें बाता आसा ज़ज़ाल़ अर फाही ढोही डाही दी।
तिन्नां लै आसा फेरा-फेर डरैऊंणी च़िज़ा न्हैल़ी लागी दी,
तिन्नां आसा गंईं-गंईं दी डअर-भगैर।
तिंयां थिऐ सेठ पर ऐबै च़ाल्लै तिंयां भुखै मरी,
आजू आसा तिन्नां लै आफ़त न्हैल़ी लागी दी।
तिन्नें घेरी सल्ला नबिज़री बमारी अर
तिन्नें हाथा खूरो मास्स लागा चिजदअ।
आपणैं ज़हा डेरै तिंयां राज्ज़ी-मौज़ी रहा तै,
तेता का काढणैं तिंयां बागै अर
तिंयां पुजणैं जम्परीए राज़ै सेटा।
पिछ़ू ज़ुंण घअर तेऊओ छ़ुटअ, सह गिम्मणअ कज़ोही,
तिन्नां छ़ल़िकणी बमारी दूर करना लै तेऊए घअरै गंधक।
आप्पू हणअ सह इहै डाल़ा-बूटा ज़िहअ
ज़सरै ज़लैल़ै गोधी का पेच़ी शुक्कै दै हआ अर ज़ेते शाण्हीं पठी हआ काटी दी।
खिरी निं तिन्नों नशाण बी रहंदअ,
तिन्नां निं तेखअ कोहै आद करदअ।
ज़ेऊ देशै तिंयां बस्सै दै आसा तिधा का काढणैं तिंयां
घिशी करै पोर्ही प्रैश्शै का न्हैरै बाखा लै।
तिन्नें निं आजू आद-लुआद बी रहणीं
अर नां तिन्नें नाअं बोली आजू कुंण रहणअ।
पुर्बा ओर्ही पछ़मा तैणीं छ़ुटणअ सोभी लोगा
तिन्नें बारै शूणीं डरै दर्छ़णअ।
पापी मणछा अर तिन्नें टांडै-टबर
ज़ुंण परमेशरे परबाह निं करदै
तिन्नां भेटा खिरी इहअ ई फल।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.