Kulvi Outer Seraji Bible
ईशायाह 55:8
Verse 8 is marked below, with the whole chapter around it. Read from the start
परमेशर करा झींण
बिधाता बोला आपणीं परज़ा इहअ,
“ज़ेतरै बी नचिशै आसा तिंयां एछा सोभ,
इधी पाणीं सेटा!
ज़हा का किछ़ ढब्बै निं आथी तिंयां बी एछा
संघा निंयां खाणां लै नाज़!
झुटणा लै निंयां दाखो रस अर दुध,
एतो निं तम्हां किछ़ ढब्बै अर मोल लागणअ दैणअ!1
ज़ेता करै तम्हैं रज़दै निं आथी, तेता लै किल्है करा तम्हैं आपणैं ढब्बै बरैबाद?
ज़ेता करै पेट निं रज़दअ, तेता लै किल्है करा मैन्थ?
मेरी गल्ल शूणां संघा करा ज़िहअ हुंह बोला तिहअ,
तम्हां भेटणअ बधिया का बधिया खाण-पींण।
ओ मेरी परज़ा! ओर्ही एछा मुंह सेटा लै, धैन दैआ,
मुंह सेटा एछा, तै रहणैं तम्हैं ज़िऊंदै!
मुंह करनी तम्हां संघै सदा लै करार अर
तम्हां लै दैणीं मुंह बर्गत ज़ुंण मंऐं राज़ै दाबेदा लै ज़बान दैनी ती।2
मंऐं बणाअं सह3 राज़अ अर देशा-देशा लै हुकम करनै आल़अ प्रधान,
तेऊ बाती रहैऊअ मंऐं तिन्नां का महान बल।4
ताह करनअ तिन्नां देशा लै बी हुकम
ज़हा संघै तेरी भेत-बछ़ैण बी निं आथी ती,
ऐबै एछणैं तिंयां ताह सेटा लै ठुर्हदा कि ताह संघै ज़ुल़े!
हुंह आसा तेरअ परमेशर बिधाता इज़राईलो पबित्र परमेशर,
मुंह करनअ आजू इहअ ई अर
मुंह बढेरनीं तेरी शोभा शान।”
बिधाता बाखा फिरा संघा करा तेऊ सेटा अरज़
सह सका अज़ी बी तम्हां भेटी।5
कदुष्ट काम करनै का हटा पिछ़ू,
बूरी सोठ छ़ाडा पोर्ही,
म्हारै परमेशर बिधाता बाखा फिरा,
सह आसा झणैल़ू अर तेऊ हेरनै थारै पाप माफ करी।
किल्हैकि बिधाता बोला इहअ, “मेरी सोठ निं तम्हां ज़ेही आथी,
मेरी बात बी आसा तम्हां का ज़ुदी।6
किल्हैकि ज़िहअ सरग धरती का खास्सअ उछ़टअ आसा,
तेही आसा मेरी सोठ अर बात बी तम्हां का उछ़टी।
मेरै बैण आसा बरसात अर हिंऊंआं ज़िहै
ज़ुंण सरगा का धरती भेऊंणा लै पल़ा।
तेता करै पज़ा धरना का साल-फसल,
तेता करै निखल़ा बऊंणा लै बेज़अ अर खाणां लै नाज़।
ज़ुंण बैण मुंह बोल़णअ, सह हणअ इहअ कि
सह निं तेता हुऐ बाझ़ी टल़दअ ज़ुंण मंऐं करनअ सोठअ,
तेता करै हणअ सह पूरअ ज़िहअ करना लै मंऐं सह बैण बोलअ।
तम्हैं निखल़णैं बाबेल देशा का खुशी-खुशी,
तम्हैं दैणैं मेल़-ज़ोल़ करी नगरी बागै छ़ाडी।
पर्बत अर बडी-बडी धारा बोल़णीं शांघअ नघोल़ी गिहा,
डाल़ा-बूटा करनी ज़ोरै-ज़ोरै ज़ै-ज़ैकार।
ज़ेथ एभै झ़ंहर-झ़ाकल़ आसा, तेथ पज़णै कैलीए बूट अर कुंगशीए ज़ैगा पज़णी मैहंदी।
अह हणअ सदा लै नछ़ैण अर आदगारी
कि मंऐं बिधाता किज़ै आसा किअ द।”
Source notes (6)
- Cross-reference प्रका. 21:6
- Cross-reference भज. 89:28; शधा. 13:34
- Footnote सह दाबेद
- Cross-reference इब्रा. 2:10; 5:9; प्रका. 1:5
- Cross-reference शधा. 17:27
- Cross-reference रोम. 11:33
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.