Kulvi Outer Seraji Bible
2 तिमोथी 2
मसीहा ईशूओ मालक भगत सपाही
तैही बोला हुंह, मेरै शोहरू तिमोथी, ऐहा गल्ला समझ़ी हअ विश्वासा दी पाक्कअ कि परमेशरै आसा ताल्है जश दैनअ द ज़ुंण म्हारै मसीहा ईशू संघै एक हणैं करै भेटा। तंऐं आसा सोभी मणछा सम्हनै मसीहे बारै बैणे शिक्षा शूणीं दी। हुंह च़ाहा इहअ कि तेऊ ई बैणे बारै सखाऊ तूह तिन्नां होरी शुचै-पाक्कै विश्वासी का, ज़ुंण होरी का बी सका तेऊ बैणा सखाऊई।
मसीहा ईशूए शोभलै सपाही ज़िहअ ज़िर मुंह संघै सोभै दुख। ज़ेभै कुंण सपाही जुधा लै डेओआ, सह निं आप्पू संसारे कामां दी शाचदअ किल्हैकि सह ज़ाणा कि मुंह लागा सह खुश करनअ ज़ुंणी हुंह सपाही आसा बणाअं द। तेखअ बी ज़ुंण कुश्ती लल़णैं आल़अ सूले साबै नांईं लल़े, तै निं तेऊ लै नांम भेटदी। ज़ुंण कृषाण मैन्थ करा, फल़ो भाग लोल़ी तेऊ पैहलै भेटअ। इना गल्ले बारै सोठ ज़ुंण मंऐं ईंयां एभै बोली अर परमेशरा करनी ताल्है इना गल्ला समझ़णा लै मज़त।
कबल्लअ सोठ ईशू मसीहे बारै, तेऊओ दाद-बाब आसा राज़अ दाबेद। परमेशरै किअ मसीहा मरी करै भिई ज़िऊंदअ अर अह आसा सह खुशीओ समाद ज़ुंण मंऐं लोगा का खोज़अ। एऊ खुशीए समादा खोज़णैं पिछ़ू आसा हुंह अपराधी ज़िहअ कैद खानै दाह-दुख ज़िरदअ लागअ द। पर परमेशरे खुशीए समादा हर ज़ैगा पुजणैं का निं कोहै रोक्की सकदअ। तैही ज़िरा हुंह सारै दाह-दुख ताकि तिन्नां मणछा फाईदअ होए ज़ुंण परमेशरै छ़ांटै दै आसा। ताकि तिंयां बी मसीहा ईशू दी विश्वास करे अर तिन्नों बी उद्धार होए अर सदा लै रहणैं आल़अ प्रतप्प बी भेटे। अह आसा शुची गल्ल,
ज़ै हाम्हैं मसीहा संघै मरे
हाम्हैं हणैं तेऊ संघै ज़िऊंदै बी।
ज़ै हाम्हैं सबर करी ज़िरदै रहे लागी,
तै करनअ हाम्हां मसीहा संघै राज़ बी।
ज़ै हाम्हैं इहअ बोले कि हाम्हैं निं तेऊए च़ेल्लै आथी,
तेऊ बी बोल़णअ इहअ कि हाम्हैं निं तेऊए आथी।
ज़ै हाम्हैं मसीहा दी विश्वास करना लै शुचै-पाक्कै नांईं बी रहे,
तैबी रहा सह सदा हाम्हां लै शुचअ-पाक्कअ।
किल्हैकि तेऊ करनअ हर बगत आपणैं सभाबे साबै काम।1
सज़ाण कारीगीर
इना गल्ला खोज़ विश्वासी का भिई-भिई ज़ुंण मंऐं ताखा आसा खोज़ी दी अर परमेशरा शाजत मनी दै चतैनगी कि सिधै बोल अर आखरे मतलबा पिछ़ू निं झ़घल़दै लागा, एता करै किछ़ै फाईदअ हंदअ, पर एता करै खोईआ तिन्नां मणछो विश्वास ज़ुंण एता शूणां।
खास्सी मैन्थ कर ताकि तूह आप्पू परमेशरा सेटा पेश करी सके अर परमेशर ताह करै खुश होए। तूह कर बधिया मिस्त्री ज़िहअ काम ज़हा शर्मिंदअ नां हणअ पल़े अर ज़ुंण शुचै बैणा ठीक ज़ाणा खोज़ी।
पर तिन्नां मणछा का रहअ दूर ज़ुंण एही गल्ला करा ज़ेता करै परमेशरे बेइज़ती हआ, किल्हैकि एही गल्ला निंयां लोगा सिधी परमेशरा का दूर। एही शिक्षा करा मणछो विश्वास खतम ज़िहअ चिजअ द दुखणअ तेऊ मणछे सारी घेरी दी लागा बढदअ, हनिनयुस अर फिलेतुस आसा तिन्नां ई मांझ़ै। इनै आसा सत्ता दी विश्वास करनअ छ़ाडी हेरअ द। तिंयां बोला इहअ परमेशरै हेरै मूंऐं दै विश्वासी सदा रहणैं आल़ी ज़िन्दगी लै ज़िऊंदै करी अर तिंयां कई विश्वासी मसीहे शिक्षा दी विश्वास करनै का रोक्कदै लागै दै।
परमेशरे लोग आसा एही आथरी ज़िहै ज़ुंण कधि निं सिक्कदी, इना आथरी दी आसा इहै बैण लिखै दै, “प्रभू बछ़ैणा आपणैं लोगा” अर “ज़ुंण बी प्रभूए च़ाकरी करा, सह निं पाप करी आथी।”2
बडै घअरै निं सिधै सुन्नैं-च़ंदीए भांडै हंदै, पर तेथ हआ काठे अर माट्टे भांडै बी, कोई-कोई अदर करना लै अर कोई-कोई निं अदर करना लै हंदै। ज़ै कुंण विश्वासी आप्पू सोभी बूरी गल्ला का आपणीं शुधी करे, तै हणअ सह किम्मती अदर करनै जोगी खास भांडै ज़िहअ अर तेऊए ज़िन्दगी हणीं पबित्र अर मालका करनअ तेऊ करै काम अर तेऊए मालका बी हणअ तेऊ करै नफअ।
तिन्नां पापी कामां का रह दूर ज़ेता ज़ुआन मणछ हर बगत करनै च़ाहा। भली गल्ला कर। ज़ुंण शुचै मन्नैं प्रभूओ नाअं लआ, तिन्नां संघै कर धर्म, परमेशरा दी डाह भरोस्सअ, झ़ूरी अर शांती दी रहणें कोशिश कर। आपणीं संगत डाहणीं तिन्नां संघै ज़ुंण शुचै आसा तत्त-दिला का प्रभू सेटा अरज़ करा।
तिन्नां मणछा का रह दूर ज़ुंण एही नथोघी गल्ला पिछ़ू ताह संघै हठ च़ाहा करनी ज़ुंण गल्ला कोई ज़रूरी निं आथी। तिन्नां संघै निं गल्ला करी किल्हैकि ताखा आसा थोघ कि एता करै हआ झ़गल़ै।
प्रभूओ दास निं झ़गल़ै करनै आल़अ लोल़ी हुअ। सह लोल़ी सोभी लै झणैल़ू हुअ, परमेशरो बैण राम्बल़ै करै सखाऊंणै आल़अ हुअ अर तेऊ लोल़ी तिन्नां मणछा लै बी सबर किअ ज़ुंण तेऊओ बरोध बी करा। तेऊ लागा परमेशरो बैण तिन्नां का बी झणैल़ू हई समझ़ाऊंणअ ज़ुंण तेऊओ बरोध बी करा, कै थोघ कि परमेशर तिन्नां लै बी तिन्नें पापो प्राश्त करनैओ मोक्कअ दैए कि तिंयां बी मसीहे बारै सत्ता दी भरोस्सअ करे अर तिन्नां बी भली सोर एछे अर तिंयां राख्से बशा का छ़ुटी सके, ज़ुंणी तिंयां तिहअ करना लै आसा कबाता पाऐ दै ज़िहअ सह तिन्नां का कराऊंणअ च़ाहा।
Source notes (2)
- Cross-reference 1 थिस. 5:24
- Cross-reference नहू. 1:7
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.