Kulvi Outer Seraji Bible
2 तिमोथी 1
अदर
हुंह पल़सी लिखा ऐहा च़िठी। हुंह आसा शधाणूं ज़ुंण मसीहा ईशू आसा छ़ांटअ द किल्हैकि परमेशर च़ाहा त इहअ ई। ताकि हुंह लोगा का तेऊ समादा खोज़े कि परमेशरै आसा तिन्नां लै सदा रहणैं आल़ी ज़िन्दगी दैणीं किई दी ज़ुंण मसीहा ईशू दी विश्वास करनै करै भेटा।
हुंह लिखा ऐहा च़िठी ताह तिमोथी लै। हुंह करा ताल्है आपणैं शोहरू ज़ेही झ़ूरी।
म्हारै बाब परमेशर अर प्रभू ईशू मसीहा का आसा मेरी एही अरज़ कि ताल्है लोल़ी तेऊओ जश, झींण अर शांती सदा हुई।
शूकर अर शाबाशी
तिमोथी, हुंह करा तेरै बारै परमेशरो शूकर। हुंह करा तेऊए च़ाकरी किल्हैकि हुंह च़ाहा दिला का तिन्नां गल्ला करनअ ज़ुंण सह च़ाहा, ठीक तेऊ ई साबै ज़िहअ मेरै दादै-बाबै किअ, हुंह हआ लागअ द कबल्लअ ताल्है प्राथणां करदअ। हुंह च़ाहा ताह सेटा लै एछणअ अर ताह सेटा एछी हणीं खास्सी खुशी किल्हैकि मुंह आसा सह गल्ल आद कि तंऐं मेरी तैणीं केही लेरा लाई ती ज़धू हाम्हैं ज़ुदै हुऐ तै।
मुंह आसा तेरी माआ युनिके तेऊ शुचै विश्वासे बी आद। तेरी नान्नीं लोईसो बी आसा तिहअ ई विश्वास अर मुंह आसा पाक्कअ भरोस्सअ कि तेरअ विश्वास बी आसा इहअ ई।
तैही फरेऊआ हुंह ताखा आद कि तेऊ बरदाना करै कर भिई आजू काम ज़ुंण परमेशरै ताल्है तधू तेरै मुंडै मेरै हाथ लाई प्राथणां करी आसा दैनअ द। परमेशरै निं हाम्हैं डरैल्हू आथी बणाऐं दै। पर तेऊए आत्मां करा म्हारै दिला पाक्कै, सह करा म्हारी होरी लै झ़ूरी करने मज़त अर सह दैआ हाम्हां लै सबर।
तैही निं होरी का प्रभू ईशूए बारै खोज़णें शरम करी। मेरै बारै ऐहा गल्ले शरम बी निं च़ेती कि हुंह आसा मसीहे च़ाकरी करनै पिछ़ू इधी कैद किअ द। पर तूह कर परमेशरै ताल्है दैनी तैहा शगती करै काम अर खुशीए समादा लै दुख ज़िरना लै हअ मुंह संघै साझ़ू। परमेशरै किअ म्हारअ उद्धार अर तेऊ आसा हाम्हैं पबित्र ज़िन्दगी ज़िऊंणां लै शादै दै। ज़ुंण हाम्हैं भलै काम किऐ, तेऊ निं हाम्हैं तेता भाल़ी बच़ाऊऐ, पर तेऊ थिअ हाम्हां लै महान दान दैणें बारै संसार शुरू हणैं का आजी डाहअ द सोठी! परमेशरै पजैल़अ ईशू मसीहे जशा करै सह दान हाम्हां लै।
ऐबै आअ म्हारअ उद्धार करनै आल़अ मसीहा ईशू अर तेऊ रहैऊअ हाम्हां का जश। तेऊ किई मौते शगती खतम अर तेऊ रहैऊअ हाम्हां का इहअ कि खुशीए समादा करै भेटा सदा रहणैं आल़ी ज़िन्दगी। एऊ खुशीए समादा लै आसा हुंह परमेशरै प्रच़ार करनै आल़अ, शधाणूं अर शिक्षा दैणैं आल़अ छ़ांटअ द।
ईशू मसीहे बारै अह समाद लोगा का खोज़णैं पिछ़ू आसा हुंबी इधी कैद किअ द। मुंह निं एते शरम लागदी, किल्हैकि मुखा आसा थोघ कि मसीहा ज़हा दी हुंह आशा डाहा, सह सका मेरै विश्वासे तेऊए फिरी एछणें धैल़ी तैणीं हेर-सभाल़ करी। ज़ुंण शुची शिक्षा तंऐं मुखा आसा शिखल़ी दी तिन्नां डाह आप्पू दी सभाल़ी ज़िहअ तूह करा बी। एता कर विश्वास अर झ़ूरी डाही करै किल्हैकि तूह आसा मसीहा ईशू संघै एक हुअ द। झ़ुठै गूरू का कर ईशू मसीहे बारै एऊ खुशीए समादे फाज़त ज़ुंण परमेशरै पबित्र आत्मां करै दैनअ ज़ुंण हाम्हां मांझ़ै रहा।
ताखा आसा ऐहा गल्लो थोघ कि एशिया मुल्खै रहणैं आल़ै कई विश्वासी फरेऊई मुंह बाखा पिठ, तिन्नां ई मांझ़ै आसा फुगीलुस अर हिरमुगिनेस बी।
हुंह करा प्राथणां कि ओनेसफोरसे सारै टबरा लै करे प्रभू झींण, किल्हैकि सह पुजअ कई बारी मुंह सेटा मेरी मज़त अर हेर-सभाल़ करदअ। तेऊ निं मुंह सेटा इधी एछणा लै कधि शरम च़ेती ज़िधी शांघल़ी करै बान्हीं कैद आसा डाहअ द। पर ज़ांऊं सह रोम नगरी आअ, सह रहअ तेभै तैणीं मुंह लोल़अ लागी ज़ेभै तैणीं हुंह तेऊ भेटअ निं गअ।
प्रभू लोल़ी ती तैहा धैल़ी तेऊ लै खास्सी झींण किई ज़ेभै मसीहा पृथूई लै फिरी एछणअ। ताखा आसा आप्पै थोघ कि तेऊ तधू मेरी केही मज़त किई ज़धू हुंह इफिसुस नगरी थिअ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.