Kulvi Outer Seraji Bible
2 थिस्सलूणी 3
प्राथणां करने अरज़
भाईओ, खिरी बोला हुंह इहअ कि हाम्हां लै बी करा प्राथणां कि ज़ेतरअ छ़ेक्कै हई सके हाम्हैं प्रभू ईशूओ खुशीओ समाद हर ज़ैगा खोज़ी सके अर ज़िहअ तम्हैं विश्वास किअ तिहै होर लोग बी विश्वास करी सके। एता लै बी करा प्राथणां कि परमेशर हाम्हां बूरै अर कदुष्ट मणछा का बी बच़ाऊई डाहे कि तिंयां हाम्हां लै कष्ट नां दैए, किल्हैकि कई लोग ज़ुंणी ईशू मसीहे बारै समाद शूणअ तिंयां निं विश्वास करदै।
पर तम्हैं सका प्रभू दी पूरअ भरोस्सअ डाही, तेऊ करनै तम्हैं भितरा का पाक्कै अर बच़ाऊई ताकि सह राख्स तम्हां लै कष्ट नां दैए।
हाम्हां आसा प्रभू दी भरोस्सअ कि हाम्हैं तम्हां लै ज़िहअ करना लै बोलअ त तम्हैं करा तिहअ ई अर आजू बी रहणैं तम्हैं करदै लागी। हाम्हैं करा प्राथणां कि म्हारअ प्रभू ईशू मसीहा ऐहा गल्ला थारै दिलै पाए कि परमेशर तम्हां लै केतरी झ़ूरी करा अर ज़ेभै लोग तम्हां कष्ट दैए तेभै सह सबर करना लै थारी मज़त करे ज़ेही तेऊ आप्पू सबर किअ।
कामां करने ज़िम्मैंबारी
भाईओ, ज़ुंण हक हाम्हां लै प्रभू ईशू आसा दैनअ द तेता करै दैआ हाम्हैं तम्हां लै हुकम कि इहै विश्वासी का रहा ज़ुदै ज़ुंण किछ़ै काम निं करदै अर म्हारी खोज़ी दी तिन्नां शिक्षे साबै आपणीं ज़िन्दगी निं ज़िऊंदअ। किल्हैकि तम्हां का आसा राम्बल़ै करै थोघ कि तम्हां लागा तेऊ साबै ज़िन्दगी ज़िऊंणीं ज़ेही म्हारी ज़िन्दगी आसा। ज़धू हाम्हैं तम्हां मांझ़ै तै हाम्हैं निं बृथा रहै हाम्हैं किअ काम। हाम्हैं निं कोहिए रोटी मुफ्त खाई, पर मैन्थ अर कष्ट करी राची धैल़ी करा तै आप्पू काम, ताकि हाम्हैं तम्हां मांझ़ै कोही लै बी बोझ़ नां होए। हाम्हां आसा अह बी हक कि हाम्हैं आपणीं ज़रुरती पूरी करना लै थारी आशा रहे किल्हैकि हुंह आसा शधाणूं, पर हाम्हैं किई खास्सी मैन्थ ताकि तम्हैं मुखा शिखल़ी सके अर तम्हैं बी तिहअ ई करे ज़िहअ म्हारअ बभार आसा।
ज़धू हाम्हैं तम्हां सेटा तै तधू रहा तै हाम्हैं तम्हां लै इहअ बोल्दै लागी, “ज़ै कुंण काम नांईं करनअ च़ाहंदअ, सह निं खाई बी आथी।” हाम्हैं शूणअ इहअ बी कि कई लोग आसा तम्हां मांझ़ै इहै बी ज़ुंण आप्पू किछ़ै काम निं करदै, पर होरीए कामां दी पाआ खरोल़। इहै लै दैआ हाम्हैं प्रभू ईशू दी हुकम अर तिन्नां समझ़ाऊआ कि च़ुप्प-च़ुप्पै खाआ आपणैं ढब्बै खटी करै रोटी। भाईओ, भलै काम करनै निं छ़ाडी, किल्हैकि तम्हैं आसा थकै दै।
ज़ै कोई म्हारी ऐहा च़िठीए गल्ला नांईं मने, तेऊ दी डाहै धैन अर तेऊ का रहा ज़ुदै, ताकि सह शर्मिंदअ होए। पर तैबी निं तेऊ संघै दुशमणा ज़िहअ बभार करी, पर तेऊ समझ़ाऊआ तिहै ज़िहै तम्हैं आपणैं भाई-भाऊ समझ़ाऊअ।
खिरी राज्ज़ी-खुशी दैणीं
प्रभू ज़ुंण शांती दैणैंओ मूल़ आसा, हुंह करा तेऊ का एही अरज़ कि तेऊ लोल़ी तम्हां लै एही बर्गत दैनी कि सह तम्हां लै शांती दैए। हुंह करा प्राथणां कि प्रभू लोल़ी कबल्लअ तम्हां सोभी संघै रहअ।
हुंह पल़सी लिखा तम्हां लै आपणैं हाथै राज्ज़ी-खुशी अर हर च़िठी दी आसा मेरअ अह ई नछ़ैण अर हुंह लिखा इहअ ई ताकि सोभी का थोघ लागे कि च़िठी आसा मुंह बाखा। हुंह करा परमेशरा का अरज़ कि हाम्हां सोभिए प्रभू ईशूए झींण लोल़ी सदा तम्हां सोभी लै हुई।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.