Kulvi Outer Seraji Bible
2 थिस्सलूणी 2
पापो शोहरू मतलब बनाशो शोहरू
भाईओ, हाम्हैं लाई तम्हां का धख गल्ला प्रभू ईशू मसीहे फिरी एछणें बारै अर तेऊ बगते बारै खोज़ी ज़ेभै हाम्हां सोभै कठा तेऊ का मिलणैं। तम्हैं निं आपणीं सोठदै रही धखी का झाखुई आथी या इहअ शूणीं कि प्रभू एछणें सह धैल़ी आसा एछी मुक्की दी। कई सका तम्हां लै इहअ समाद खोज़ी या एही गल्ला खोज़ी या च़िठी दैई कि अह आसा तम्हां लै हाम्हां बाखा आई दी।
लोगे इना एही झ़ुठी गल्लो विश्वास करी निं कबाता पल़ी। किल्हैकि मसीहा फिरी एछणैं का आजी एछणअ इहअ बगत तेभै हणैं खास्सै मणछ परमेशरे द्रोही। ज़हा कदुष्टो परमेशरा न्हैरी जम्परी बनाश करनअ, सह हणअ तेभै प्रगट। तेऊ करनअ परमेशरो अर तिन्नां सोभी गल्लो बरोध ज़ेता लोग पूज़ा अर देअ बोला। तेऊ बोल़णअ इहअ कि सह आसा इना सोभी का महान। होर ता होर तेऊ कदुष्टा बोल़णअ परमेशरे भबनै बेशी सोभी का कि सह आसा आप्पू ई परमेशर।1
तम्हां कै आद निं रही कि ज़धू हुंह तिधी तम्हां सेटा थिअ, हुंह करा त इना गल्ला तम्हां का खोज़ी? एभै निं अज़ी परमेशरो दुशमण सह कदुष्ट प्रगट हुअ आथी, किल्हैकि किज़ै एही च़िज़ा आसा ज़ुंणी सह रोक्की आसा डाहअ द। तम्हां हणीं आद रही दी कि सह कुंणी आसा रोक्की डाहअ द। सह कदुष्ट निखल़णअ तेभै आप्पै ज़ुंण बगत तेऊ लै परमेशरै आसा डाहअ द। किल्हैकि तेऊ कदुष्टे शगती करा अज़ी गुप्त रुपै एऊ संसारै परमेशरे खलाफ काम। पर एक आसा इहअ ज़ुंणी सह शगती रोक्की आसा डाही दी अर तेऊ डाहणीं सह तेभै तैणीं रोक्की ज़ेभै तैणीं परमेशर तेऊ दूर नां करे।
तेखअ हणअ सह कदुष्ट प्रगट, पर बादा का ज़ांऊं प्रभू ईशू एछणअ तेऊ करनअ सह कदुष्ट आपणीं खाखा का एक बैण बोली अर आपणैं एछणें प्रतप्पा करै खतम।2
ज़ेभै परमेशरो दुशमण सह कदुष्ट प्रगट हणअ, तेऊ लै दैणीं राख्सा आपणीं शगती। संघा करनै तेऊ कदुष्टा कई रंगे नछ़ैण अर च़मत्कार अर लोगा सोठणअ इहअ कि एता आसा परमेशर लागअ द करदअ। तेऊ करनअ तिन्नां लै सोभी साबै बूरअ अर तिंयां पाणै कबाता ज़ुंण परमेशरा करै बरैबाद हणैं। किल्हैकि तिंयां हुधूऐ तैहा झ़ूरी अर तेऊ सत्ता मनणै का ज़ुंणी तिंयां बच़ाऊऐ दै आसा।
तैही छ़ाडणीं परमेशरा एही शगती ज़ुंण तिन्नां सत्ता का कबाता पाए अर तिंयां झ़ुठी गल्ला दी विश्वास करे। ज़ेतरै लोग सत्ता दी विश्वास नांईं करदै पर पाप करनै करै खुश रहा, तिन्नां सोभी लै भेटणीं सज़ा।
मज़बूत रहा बणी
भाईओ, तम्हां लागा हर बगत परमेशरो शूकर करनअ, तम्हां लै करा प्रभू झ़ूरी किल्हैकि परमेशरै आसा पैहलै ई तम्हैं पबित्र आत्मां करै पापा का दूर किऐ दै अर सत्ता दी थारै विश्वास करनै पिछ़ू उद्धार हणां लै छ़ांटै दै।3
ज़ुंण खुशीओ समाद तम्हां का हाम्हैं खोज़अ, तेता करै शादै तेऊ तम्हैं उद्धार हणां लै ताकि तम्हां म्हारै प्रभू ईशूए प्रतप्पा दी साझ़ू हई सके।
भाईओ, तैही बोला हुंह, पाक्कै रहा टेक्की, तिन्नां गल्ला दी डाहा विश्वास ज़ुंण हाम्हैं तम्हां संघै रहंदी या तम्हां लै च़िठी लिखी करै सखाऊई।
हाम्हैं करा आपणैं प्रभू ईशू मसीहा अर म्हारै बाब परमेशरा का प्राथणां ज़ुंण हाम्हां लै झ़ूरी करा अर सह ज़सरअ जश हाम्हां लै सदा लै हैअ अर पाक्की आशा दैआ। हुंह करा प्राथणां कि परमेशर तम्हां लै हैअ दैए अर तम्हां लै एही तागत दैए कि तम्हैं हर बगत भली गल्ला करदै अर खोज़दै रहे।
Source notes (3)
- Cross-reference एज. 28:2; दान. 11:36-37
- Cross-reference आयू. 4:9; ईशा. 11:4
- Cross-reference इफि. 1:4-5; 1 पत. 1:1-5; बधा. 33:12
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.