Kulvi Outer Seraji Bible
2 इतिहास 31
राज़ै हिजकिया किई आपणैं देशा का मुहुर्ती पूज़ा दूर
ज़ांऊं ऊवार्णैओ थैर मुक्कअ, सोभ इज़राईली डेऊए यहूदा मुल्खै सोभी नगरी संघा पाऐ हर ज़ैगा ओडै अर अशेरा देबीए डौंड चोल़ी फाल़ी, उछ़टी धारे गान-स्तान अर बेदी बी पाई तिन्नैं ढोल़ी। ज़ांऊं एप्रैम, बिन्यामीन अर मनिश्शे गोत्रे इज़राईली आपणीं नगरी घअरै पुजै, तेथ बी किअ तिन्नैं तिहअ ई।
राज़ै हिजकिया बांडै लेबी अर प्रोहत भिई तिन्नें कामें साबै ज़ुदै-ज़ुदै दला दी। तिन्नां मांझ़ै दैनी कोई लै हूम अर मेल़-ज़ोल़े बल़ीदाने ज़िम्मैंबारी अर कोई दला लै दैनी बिधाता लै शूकर करने बल़ीदाने ज़िम्मैंबारी। इना कामां लै डाही बिधाते भबनै भितरी अर बागै च़ाकरी करना लै ज़ुदै-ज़ुदै दला लै ज़िम्मैंबारी सभाल़ी। बिधाते भबनै धैल़ दोत्ती अर उडै बल़ीदान, बशैघे धैल़ी अर पुनूंईए धैल़ै बधाने साबै ज़ुंण हूम बल़ीदान लागा तै करनै, तेता लै पशू दैणें ज़िम्मैंबारी मनी राज़ै आपणीं भेडा-बाकरीए हेल़्ही का दैणी।
तेता का लाऊआ डाहअ राज़ै एरुशलेम बस्सी दी परज़ा लै इहअ बोली कि तिंयां करै प्रोहत अर लेबी लै भैंट दैई ज़ुंण सूल आसा। ताकि तिंयां कबल्लै बधाने साबै बिधाते च़ाकरी करदै रहे। ज़िहअ ई राज़ै हिजकिया हुकम किअ, इज़राईली मणछ लागै आपणीं साल-फसला मांझ़ै नाज़, दाखो रस, जैतूनो तेल, मखीर अर होरी पज़ैआ मांझ़ै पैहली घाण बिधाते भबनै भैंट आणदै। होरी सोभी च़िज़ो बी करा तै तिंयां दसुअ निसब आणी। यहूदा मुल्खे होरी नगरी बस्सै दै इज़राईली अर यहूदी बी लागै आपणैं डागै-चैणें हेल़्ही मांझ़ै दसुअ निसब बिधाते भबना लै आणदै। होर बिधाता लै बांधअ ज़ुंण होर च़िज़ा ज़ुदी हआ ती डाही दी, तेता बी लागै आणदै। ज़ेठा पोर्ही रहै काती तैणीं लोग बिधाते भबनै भैंट आणदै लागी, भबने भढारै डाहै रूल़ लाई। ज़ांऊं राज़ै हिजकिया अर तेऊए कार-करिंदै भाल़अ कि परज़ा दैनी बिधाते भबना लै खास्सी भैंट, तिन्नैं किअ बिधातो अर इज़राईली परज़ो शूकर। खास्सी भैंट भाल़ी पुछ़अ राज़ै हिजकिया लेबी, प्रोहत अर सदोके शोहरू माहा प्रोहत अजर्याह का, “ज़धा ओर्ही लोग भैंट दैंदै आसा लागै दै, तधा ओर्ही निं खाणैं-पिणें निऊल़ पल़ी अर तेता का लाऊआ बच़ा म्हारै खास्सी ज़िणस पिछ़ू। किल्हैकि बिधाता दैनी आपणीं परज़ा लै खास्सी बर्गत। इधी भाल़ा ज़िणसीए किहै रूल़ आसा बच़ै दै!”
तेखअ किअ राज़ै हिजकिया हुकम कि बिधाते भबने भढारै बणाआं कठैरी। तिन्नैं बझ़ैल़ी कारीगीरा का कठैरी बणाणैं अर बिधाते भबनै दैनी दी भैंटा का ज़ेतरी च़िज़ा बच़ी दी थिई, तिंयां डाही तिन्नैं कठैरी दी ज़ुदी-ज़ुदी हाल़्है। तेते भढारी डाहै तिन्नैं लेबी मांझ़ै कननया अर तेऊ संघै दुजअ तेऊओ भाई शिमी। बिधाते भबनै तिन्नां संघै च़ाकरी लै डाहै राज़ै हिजकिया अर अजर्याह माहा प्रोहतै लेबी मांझ़ै दस ज़ण्हैं होर। तिंयां थिऐ जेहीएल, नाहात, अजाज्या, असाहेल, जरमोत, जोजबाद, एलीएल, इसमाकिया, महात, बेनियाह। लेबी मांझ़ै इमनो शोहरू कोराह बणाअं बिधाते भबनै पुर्बा बाखा प्रऊल़ीए पहरै करने आल़ैओ प्रधान। तेऊए ज़िम्मैंबारी ती बिधाता लै रगाऊई दी भैंट प्रोहता लै बांडी दैणी। तेऊ संघै च़ाकरी लै थिऐ लेबी मांझ़ै छ़ह ज़ण्हैं होर डाहै दै, तिन्नां का थिई ज़िम्मैंबारी सभाल़ी दी कि होरी नगरी बस्सै दै प्रोहता बी बिधाता लै रगाऊई दी भैंटा मांझ़ै भाग भेटे। तिंयां छ़ह ज़ण्हैं तै एदेन, मिन्यामीन, जेशूआ, शमयाह, अमर्या अर शकनया। तिंयां रहा तै तिन्नां ई नगरी ज़ेथ-ज़ेथ प्रोहत तै बस्सै दै। तिंयां दैआ तै तिन्नां सोभी लेबी लै बिधाते भैंटा मांझ़ै तिन्नें कामें साबै ज़िणस बांडी। भेंटो भाग दैआ तै तिंयां तिन्नां सोभी प्रोहता मांझ़ै तिन्नां लै तिन्नें पदबीए साबै ज़ुंण तिहा साले या तेता का खास्सी अमरे होए अर बिधाते भबनै धैल़ च़ाकरी करा।
प्रोहता लै थिऐ बिधाते भबनै तिन्नें टोलीए साबै काम सभाल़ै दै। च़ाकरी लै हआ तै लेबी मांझ़ै सिधै तिन्नें नाअं लिखै दै ज़ुंण बिहा साले अर तेता खास्सी अमरे होए। तिन्नें नाअं हआ तै तिन्नें बेटल़ी अर शोहरू-शोहरी अर होरी टबरा संघी दर्ज़ डाहै दै करी। किल्हैकि तिंयां रहा तै शुचै-पाक्कै रही बिधाते भबनै च़ाकरी करना लै च़ांगै-च़ोखै। यहूदा मुल्खै ज़ुंण नगरी हारणे आद-लुआदे हेस्सै ती आई दी, राज़ै हिजकिया छ़ांटे लेबी मांझ़ै होर बी ज़ुंण तिन्नां नगरी ओरी-पोरी घैहणीं तै बस्सै दै लेबी अर प्रोहता सेटा बी बिधाता लै रगाऊई दी भैंटा मांझ़ै भाग बांडी दैए।
इहअ करै दैआ त राज़अ हिजकिया सारै यहूदा मुल्खै प्रोहता अर लेबी लै ज़िणस बांडी। तेऊ किअ शुचअ-पाक्कअ रही तिहअ ई ज़िहअ बिधाता च़ाहा अर ज़ेता लै बिधाता खुश हआ त। राज़ै हिजकिया यहूदा मुल्खै ज़ुंण बी काम किऐ, सह हुअ तेता लै सफल। किल्हैकि तेऊ किऐ सारै काम बधाने साबै, तेऊ किऐ सोभै काम तत्त-दिला का अर परमेशरे डरा हेठै रही।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.