Kulvi Outer Seraji Bible
2 इतिहास 30
राज़ै हिजकिया किई ऊवार्णे थैर मनाऊंणे तैरी
राज़ै हिजकिया दैनअ इज़राईल अर यहूदा मुल्खै सोभी लै समाद, एप्रैम अर मनिश्शे गोत्रा लै बी दैनअ तेऊ च़िठी लिखी समाद। तेऊ किअ सोभी लै छ़ांदअ कि राज़धानी एरुशलेम मनाऊंणअ इज़राईले परमेशर बिधाता लै ऊवार्णैओ थैर, तेता लै लोल़ी सोभै आऐ। राज़ै अर कार-करिंदै किई आप्पू मांझ़ै सट-सलाह कि ऐहा बारी मनाऊंणअ हाम्हां ऊवार्णैओ थैर बशाहै। एही ता मनाऊंआं तै ऊवार्णैओ थैर च़ैत्रै पर अज़ी ती कई प्रोहते शुधी हणीं बाकी अर सारै का होर लोग बी निं एरुशलेम अज़ी पुजै तै। तेखअ हुऐ ऐहा गल्ला लै राज़अ अर सारी सभा दी सोभ राज्ज़ी कि ऊवार्णैओ थैर मनाऊंणअ बशाहै। तेखअ पजैल़अ तिन्नैं दखण बेर्शेबा उझै उतर दान तैणीं सोभी इज़राईली सेटा समाद कि सोभै लोल़ी बधाने साबै आपणैं परमेशर बिधाते ऊवार्णे थैरा मनाऊंदै एरुशलेम आऐ। तधू आऐ तेऊ थैरा लै एतरै खास्सै मणछ कि तेतरै निं कधि आऐ तै। राज़ै हिजकिया ज़ुंण दूत छ़ाडै, तिंयां डेऊऐ इज़राईल अर यहूदा मुल्खै सारै दी तिन्नां का थिअ च़िठी लिखी इहअ सारी परज़ा लै इहअ छ़ांदअ दैनअ द,
“इज़राईली मणछो, ज़ुंण तम्हैं अश्शूरी राज़ै का बच़ै दै आसा, ऐबै फिरा आपणैं दाद-बाब आबराम, इसहाक अर इज़राईले परमेशर बिधाता बाखा, तै जाणअ बिधातो कोप तम्हां का दूर हई। थारै दाद-बाब अर इज़राईली मांझ़ै होर भाई-बंध ज़ुंण आपणैं परमेशर बिधाता लै शुचै-पाक्कै नांईं रहै, तम्हां निं तिन्नां ज़िहै हई। तम्हैं भाल़अ आपणीं आछी कि बिधाता तिन्नां लै केही सज़ा दैनी। तम्हैं निं तिन्नां ज़िहै जर्ड हई अर तम्हैं करै तिहअ ज़िहअ बिधाता हुकम करा। तम्हैं लोल़ी एरुशलेम बिधाते भबना लै आऐ, ज़ुंण भबन म्हारै परमेशर बिधाता सदा लै पबित्र किअ कि तिधी तेऊए पूज़ा होए। तेखअ जाणअ बिधातो कोप तम्हां का दूर हई। ज़ै तम्हैं बिधाता बाखा बापस एछे, तै जाणीं दुशमणा थारै तिन्नां भाई-बंधा लै झींण फिरी ज़ुंण तिन्नैं कैद करी गलामी दी आसा निंयैं दै अर तिंयां हेरनै तिन्नां घअरा लै बापस छ़ाडी। म्हारअ परमेशर बिधाता आसा झणैल़ू अर सह झ़ूरा हाम्हां लै खास्सअ। ज़ै तम्हैं तेऊ बाखा फिरे, तेखअ निं लाई तेऊ तम्हां बाखा पिठ डाही फरेऊई।”
नगरी-नगरी हांढदी पुजअ अह समाद एप्रैम, मनिश्शे, उतरा बाखा बस्सै दै ज़बलून गोत्रा आल़ै सेटा, पर तिंयां सोभै लागै तिन्नां लै हास्सदै अर सुहांगा करदै। पर तज़ी बी थिऐ आशेर, मनिश्शे अर ज़बलून गोत्रा मांझ़ै कई भलै मणछ अर तिंयां आऐ एरुशलेम नगरी लै। यहूदा सारै देशै बी हुअ बिधातो इहअ प्रतप्प कि तिंयां तैर्हुऐ ज़िहअ बोलअ तिहअ ई करना लै ज़िहअ राज़ै हिजकिया अर तेऊए कार-करिंदै हुकम किअ त।
राज़धानी एरुशलेम मनाऊंअ ऊवार्णैओ थैर
बशाहै झाल़्हुऐ राज़धानी एरुशलेम ऊवार्णे अर आखरी रोटीए थैरा मनाऊंदै खास्सै मणछ। बिधाते भबना छ़ाडी एरुशलेम होर्ती नगरी ज़िधी बी बल़ीदान अर धूप ज़ाल़णा लै बेदी थिई बणाईं दी, तिंयां काढी तिन्नैं पोर्ही संघा शोटी किद्रोन नाल़ै। ज़ांऊं च़ौदा बशाहै लोग ऊवार्णै लै मिम्मूं काटदै लागै, प्रोहत अर लेबी पल़अ आप्पू लै शर्मिंदै हणअ, तेखअ किई सोभी आपणीं शुधी संघा आणै बिधाते भबनै हूम बल़ीदान। तेखअ हुऐ तिंयां तेऊ साबै बिधाते भबनै आपणीं-आपणीं ज़ैगा खल़ै ज़िहअ परमेशरे दास मोसा तिन्नां लै बधाना दी आसा लिखी डाहअ द। लेबी आणअ बल़ीदान किऐ दै पशूओ लोहू प्रोहता सेटा अर तिन्नैं छ़ल़िकअ सह बेदी दी। किल्हैकि लोगा मांझ़ै बी थिऐ इहै ज़ुंण अज़ी बी छ़ोतलै थिऐ। तिन्नैं लोगै ज़ुंण ऊवार्णे चैणैं बिधाता लै ज़ुदै शुचै तै डाहै दै, तिन्नें तिंयां मिम्मूं काटै तेखअ लेबी आप्पै संघा किऐ बिधाता लै अर्पण।
इना का लाऊआ ज़ुंण एप्रैम, मनिश्शे, इस्साकार अर ज़बलून गोत्रा का थिऐ आऐ दै, तिन्नां मांझ़ै निं खास्सै ज़ण्हैं बधाने साबै आपणीं शुधी आथी ती किई दी। पर तिंयां बी हुऐ ऊवार्णे मिम्मूंए शिखा खाणां लै साझ़ू। राज़ै हिजकिया भाल़अ कि तिन्नैं किज़ै किअ अर तेऊ किई तिन्नां लै बिधाता सेटा अरज़, “परमेशर बिधाता, एही ता निं आसा ईंयां बधाने साबै शुचै आथी हुऐ दै! तूह करै इनो पाप-दोश माफ, किल्हैकि ईंयां बी आसा इने दादा-बाबा ज़िहै तत्त-दिला का ताह बिधाता सेटा तेरी पबित्र ज़ैगा माथै टेक्कदै आऐ दै।” बिधाता शूणीं हिजकिया राज़े अरज़ संघा किऐ तिन्नें पाप-दोश माफ अर तिन्नें निं किछ़ हान्नी हुई। इज़राईली मांझ़ा का ज़ेतरै लोग एरुशलेम नगरी कठा हुऐ तै, तिन्नैं मनाऊंअ खुशी-खुशी साता धैल़ी तैणीं आखरी रोटीओ थैर अर हर धैल़ै करा तै लेबी अर प्रोहत गाज़ै-बाज़ै संघै बिधाते ज़ै-ज़ैकार। ऊवार्णे थैरा लै लेबी अर प्रोहतै ज़ेही समझ़कारी संघै काम किअ, तेते किई राज़ै हिजकिया खास्सी तिन्नें सर्राफी।
ऊवार्णैओ थैर मनाऊंअ साता धैल़ै होर
तेखअ रहै तेता बाद साता धैल़ै तैणीं भिई सोभ लोग थैरा मनाऊंदै लागी। संघा किअ मेल़-ज़ोल़े बल़ीदान करी सोभी लोगै आपणैं दादा-बाबे परमेशर बिधातो शूकर। सोभै हुऐ ऐहा गल्ला लै राज्ज़ी संघै रहै तेता बाद भिई होर साता धैल़ी तैणीं खुशी-खुशी ऊवार्णे थैरा मनाऊंदै लागी। यहूदा मुल्खे राज़ै हिजकिया दैनै लोगा लै एक हज़ार बाछ़ू, सात हज़ार भेडा-बाकरी हेल़्ही बल़ीदान करी धाम। कार-करिंदै बाखा बी दैनै लोगा लै एक हज़ार बल्द अर दस हज़ार भेडा। तेखअ किई खास्सै प्रोहतै बधाने साबै आपणीं शुधी। यहूदा मुल्खे प्रोहत, लेबी संघी सारी सभा, यहूदा बस्सै दै सोभ लोग, इज़राईल मुल्खा का आऐ दै लोग अर परदेसी बी ज़ुंण ऊवार्णे थैरा लै थिऐ आऐ दै तिंयां थिऐ सोभ खुश हुऐ दै। सारी नगरी ती फेर-फिरदी खुशी किल्हैकि एचल़अ बडअ थैर निं आझ़ तैणीं एरुशलेम नगरीए बस्सै दै लोगै इज़राईले राज़ै दाबेदे शोहरू सुलैमाने ज़मानै ओर्ही भाल़अ ई आथी त। तेखअ हुऐ खिरी प्रोहत अर लेबी खल़ै संघा मांगी सोभी लोगा लै बिधाता का बर्गत। बिधाता शूणीं स्वर्गै तिन्नें अरज़।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.